ފަހު މެޗުގައި އިންޓަ އިން އެޓަލަންޓާ ބަލިކޮށްފި

ވޯލްޑް ކަޕަށް އިޓާލިއަން ލީގުގައި ކުޅުނު ފަހު މެޗުގައި އިންޓަ މިލާނުން އެޓަލަންޓާ ބަލިކޮށްފިއެވެ.

އެޓަލަންޓާގެ ދަނޑުގައި އާދިއްތަ ދުވަހުގެ ރޭ ކުޅުނު މެޗު އިންޓަ އިން ކާމިޔާބުކުރީ 3-2 އިންނެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ އެޓަލަންޓާ އިންނެވެ. އެއީ މެޗުގެ 25 ވަނަ މިނެޓުގައި ލިބުނު ޕެނަލްޓީއަކުން އެޑެމޮލާ ލޫކްމަން ޖެހި ލަނޑުންނެވެ. ނަމަވެސް ފުރަތަމަ ހާފު ނިމުމުގެ ކުރިން ލައުޓާރޯ މާޓިނޭޒްގެ އެހީތެރިކަމާއެކު އެޑިން ޖެކޯ ވަނީ އިންޓަ އަށް ނަތީޖާ ހަމަހަމަ ކޮށްދީފައެވެ. ދެ ވަނަ ހާފަށް ނުކުމެ މެޗުގެ 56 ވަނަ މިނެޓުގައި އިންޓަ އަށް ލީޑު ނަގައިދިނީ ވެސް ޖެކޯއެވެ. އިންޓަގެ ތިން ވަނަ ލަނޑަކީ އެޓަލަންޓާގެ ލުއިސް ޕަލޯމިނޯގެ އަތުން ބައިކޮޅަށް ވަތް ލަނޑެކެވެ. ނަމަވެސް މެޗުގެ 77 ވަނަ މިނެޓުގައި ޕަލޯމިނޯ ވަނީ އެޓަލަންޓާގެ ދެ ވަނަ ލަނޑު ޖަހައިދީފައެވެ.

މެޗުން މޮޅުވެ އިންޓަ އޮތީ ތާވަލްގެ ފަސް ވަނަ މަގާމުގައެވެ. އެއީ އެ ޓީމު ކުޅުނު 15 މެޗުން 30 ޕޮއިންޓާއެކުއެވެ. މެޗުން ބަލިވި އެޓަލަންޓާ ވަނީ ހަ ވަނަ މަގާމަށް ވެއްޓިފައެވެ. އެ ޓީމަށް 15 މެޗުން ލިބެނީ 27 ޕޮއިންޓެވެ.