މަސްވެރިންނާއި އެއްބަސްވާ މުއްދަތުގެ ތެރޭގައި ފައިސާ ދެމުން އެބަގެންދަން: ހޮރައިޒަން ފިޝަރީޒް
14 ނޮވެމްބަރު 2022 | ހޯމަ 02:30ކުންފުނި ބަދުނާމުވާގޮތަށް ދައްކާފައިވާ ވާހަކަތަކަކީ ކަނޑައެޅިގެން ޙަގީގަތާ ޚިލާފު ވާހަކަތަކެއް ކަމަށް ބުނޭ
ހޮރައިޒަން ފިޝަރީޒް ކޮމްޕްލެކްސް މާންދޫ
ލ. މާންދޫގައި ހިންގާ ކާރުޚާނާއަށް މަސްވެރިން ބާނާ މަސް ގަތުމުގައި އެއްބަސްވެފައިވާ މުއްދަތުގެ ތެރޭގައި ދޭން ޖެހޭ ފައިސާ ދިނުމަށް ވަރަށް ބޮޑު އިސްކަމެއް ދީގެން އެ މަސައްކަތް ކުރަމުންގެންދާ ކަމަށް ހޮރައިޒަން ފިޝަރީޒް އިން ބުނެފިއެވެ.
އެ ކުންފުނިން ހޮނިހިރު ދުވަހު ނެރުނު ބަޔާނުގައި ބުނީ މާންދޫ މަސް ފެކްޓްރީ ބޭރުގައި މުޒާހަރާކޮށް، މުޒާހަރާގެ ތެރޭގައި އެ ކުންފުނި ބަދުނާމުވާގޮތަށް ދައްކާފައިވާ ވާހަކަތަކަކީ ކަނޑައެޅިގެން ޙަގީގަތާ ޚިލާފު ވާހަކަތަކެއް ކަމަށެވެ. އެ ކުންފުނިން އެއްބަސްވެފައިވާ މުއްދަތުގެ ތެރޭގައި މަސް ގަތުމަށްފަހު ފައިސާ ދޭ ކަމަށާއި ސަރުކާރުން ސަބްސިޑީ ލިބޭ ކުންފުނިތަކުން މަސް ގަނެ، ތެޔޮ ވިއްކާ އަގުތަކުގައި މަސް ގަނެ، ތެޔޮ ވިއްކުމަކީ ޕްރައިވެޓް ކުންފުނިތަކަށް ކުރެވޭނެ ކަމެއް ނޫން ކަމަށެވެ.
މިވަގުތު ދުނިޔޭގެ އެކި ހިސާބުތަކުގައި ހިނގަމުންދާ ކަންކަމާއި ގުޅިގެން، މަސްގަތުމުގެ އިންތިޒާމު މިހާރަށްވުރެ ފަސޭހަކޮށް ހަމަޖައްސައިދިނުމަށް ކުރަމުންގެންދާ މަސައްކަތަށް ދަތިތަކާއި ކުރިމަތިވެފައިވާކަން ފާހަގަކޮށް ހޮރައިޒަނުން ބުނީ އެ ކުންފުނިން ކުރިއަށް ގެންދިއުމަށް ރާވާފައިވާ އެކި މަޝްރޫއުތަކަށް ވެސް ގޮންޖެހުންތަކާ ކުރިމަތިވެފައިވާ ކަމަށެވެ. އަދި މަސްވެރިންނާއި ދާއިރާއަށް ދިމާވެފައިވާ ދަތިތަކަށް ހައްލުހޯދުމަށް އެ ކުންފުނިން ކަމާބެހޭ މުއައްސަސާތަކާއި ގުޅިގެން މަސައްކަތް ކުރަމުންދާ ކަމަށެވެ.
މާންދޫ ފިޝަރީޒް ކޮންޕްލެކްސްއަށް މަސް ކިރާ ދޯނިތަކާއި މަޝްވަރާކޮށް ދިމާވެފައިވާ ދަތިތަކަށް ހައްލުހޯދުމަށް މަސައްކަތް ކުރަމުންދާ ކަން ވެސް ހޮރައިޒަން ފިޝަރީޒްގެ ބަޔާނުގައި ވަނީ ފާހަގަކޮށްފައެވެ.
އެ ކުންފުނިން އިތުރަށް ބުނީ މަސްވެރިކަމުގެ ސިނާއަތަކީ ދުނިޔޭގެ މަސްރަހުގައި ހިނގަމުންދާ އެކި ކަންކަމަށް ބަރޯސާވެފައިވާ ސިނާއަތެއް ކަމަށާއި އޭގެ ތެރޭގައި ދުނިޔޭގެ އިގުތިސާދީ ހާލަތާއި، ބޭނުން ކުރާ ތަކެތީގެ އަގާއި ދުނިޔޭގެ މާކެޓްގެ ވާދަވެރިކަން ހިމެނޭކަމަށެވެ. އަދި މިވަގުތު ދުނިޔޭގެ މާކެޓްގައި މަހުގެ އަގު ވަނީ ވަރަށް ބޮޑަށް ދަށްވެފައިވާ ކަމަށާއި މީގެ ސަބަބުން ރާއްޖޭގައި ބާނާ މަހަށް ދެކޮޅުޖެއްސޭފަދަ އަގެއް ނުލިބޭތީ ކުންފުނި ހިންގުމަށް ދަތިވެފައިވާ ކަމަށް ވެސް އެ ކުންފުނިން ބުނެއެވެ.
ހޮރައިޒަން ފިޝަރީޒް އިން ބުނީ މަހުގެ އަގާއި ދަތުރު ފަތުރާއި ތަކެތީގެ އަގަށް އައިސްފައިވާ ބަދަލުގެ ސަބަބުން ފާއިތުވި އަހަރުތަކުގައި އެ ކުންފުނި ހިންގަމުން ދަނީ ބޮޑު ގެއްލުމެއްގައި ކަމަށެވެ. ނަމަވެސް އެއްބަސްވެވޭ މުއްދަތުގެ ތެރޭގައި މަސްވެރިންނަށް ފައިސާ ދެމުން އަންނަ ކަމަށާއި އެ ފައިސާ ދެނީ އެކިގޮތްގޮތުން ދަރަންޏަށް ފައިސާ ހޯދައިގެންނާއި، އެކުންފުނި ހިމެނޭ ގްރޫޕްގެ އެހެން ކުންފުނިތަކުގެ އެހީތެރިކަމާ އެކުގައި ކަމަށެވެ.
އެ ކުންފުނިން ވަނީ ރައްޔިތުންގެ ހިތުގައި ކުންފުންޏާމެދު އުފެދިފައިވާ އިތުބާރާއި، ލޯބި ފަނޑުކޮށްލަން ސޯޝަލް މީޑިއާ އަދި މުޒާހަރާ މެދުވެރިކޮށް، ގަސްތުގައި އެކިފަހަރުމަތިން މަސައްކަތް ކޮށްފައިވާކަން ފާހަގަކޮށް އެއީ ހަގީގަތް އޮޅުވާލުމަށް ހިންގާފައިވާ، ވަރަށް ނާތަހުޒީބު އަމަލުތަކެއް ކަމަށް ބުނެފައެވެ. އަދި އެ ކުންފުނި ބަދުނާމުވާގޮތަށް މަސްވެރިންނާއި އާންމު ރައްޔިތުންގެ މެދުގައި ކުންފުންޏަށް އޮތް އިތުބާރު ގެއްލޭގޮތަށް، ހަގީގަތާ ޚިލާފު، ދޮގު ވާހަކަތައް ނުފެތުރުމަށް ވަނީ އިލްތިމާސްކޮށްފައެވެ.
