މޯލްޑިވްސް ފައިނޭންސް ފޯރަމް އަންނަ ބުދަ ދުވަހު ބާއްވަނީ
މި އަހަރުގެ ފޯރަމުގެ މައުޟޫއަކީ "ދިވެހި ރާއްޖޭގެ ފައިނޭންޝަލް އިންފްރާސްޓްރަކްޗަރ ތަރައްގީ ކުރުން"
ފައިނޭންސް ފޯރަމް
ޕެންޝަން އޮފީހުން ބާއްވާ "މޯލްޑިވްސް ފައިނޭންސް ފޯރަމް 2022" އަންނަ ބުދަ ދުވަހު ބާއްވާ ގޮތަށް ތާވާލުކޮށްފިއެވެ.
ޕެންޝަން އޮފީހުން މައުލޫމާތު ދޭ ގޮތުގައި މި ފޯރަމް ކުރިއަށްދާނީ ކުރުނބާ މޯލްޑިވްސްގައެވެ. މިއީ ރާއްޖޭގެ މާލީ ދާއިރާ ކުރިއަރުވައި، ތަރައްގީ ކުރުމައްޓަކައި ކުރެވެންހުރި ކަންތައްތަކާ ބެހޭގޮތުން މަޝްވަރާ ކުރުމަށް ކުރިއަށްގެންދާ ފޯރަމެކެވެ.
މި އަހަރުގެ ފޯރަމުގެ މައުޟޫއަކީ "ދިވެހި ރާއްޖޭގެ ފައިނޭންޝަލް އިންފްރާސްޓްރަކްޗަރ ތަރައްގީ ކުރުން" އެވެ. މި ފޯރަމުގައި ރާއްޖޭގެ މާލީ ދާއިރާގައި ހަރަކާތްތެރިވާ އިސް ފަރާތްތަކާއި ވިޔަފާރި އާއި އިގްތިސާދާއި ސިޔާސީ، ތައުލީމީ، އަދި އިޖުތިމާއީ ދާއިރާގެ އިސް ބޭފުޅުން ބައިވެރިވެވަޑައިގަންނަވާނެ ކަމަށް ބީއެމްއެލްއިން ބުނެއެވެ.
ޕެންޝަން އޮފީހުން ބުނީ މިއަހަރުގެ ފޯރަމުގައި ރާއްޖޭގެ ފައިނޭންޝަލް އިންފްރާސްޓްރަކްޗަރ މިހާރު އެކުލެވިފައިވާގޮތާއި، ފައިނޭންޝަލް އިންފްރާސްޓްރަކްޗަރު ތަރައްގީ ކުރުމަށް ހިންގަމުންދާ، އަދި ކުރިއަށް އޮތްތަނުގައި ހިންގުމަށް ހަމަޖެހިފައިވާ މަޝްރޫއުތަކާ ބެހޭގޮތުން މައުލޫމާތު ބަދަލު ކުރާނެ ކަމަށެވެ. އަދި ފުރިހަމަ މާލީ ނިޒާމެއް ގާއިމު ކުރުމަށް ރާއްޖޭގެ ފައިނޭންޝަލް އިންފްރާސްޓްރަކްޗަރަށް ގެންނަން ޖެހޭ ތަރައްގީއާއި ކުރިއެރުންތަކާ ގުޅޭގޮތުން މަޝްވަރާ ކުރާނެ ކަމަށް ވެސް އެ އޮފީހުން ބުނެއެވެ.
މިއަހަރުގެ މައުޟޫ ކަނޑައެޅުމުގައި ބެލީ ރާއްޖޭގެ އެންމެ ބޮޑު އިންސްޓިޓިއުޝަނަލް އިންވެސްޓަރުގެ ހައިސިއްޔަތުން ޕެންޝަން އޮފީހަކީ ރައްޖޭގެ މާލީ ދާއިރާ ކުރިއެރުވުމަށް، ވަކިން ހާއްސަކޮށް އިންވެސްޓަރުންނަށް ހުރި ފުރުސަތުތައް އިތުރުކުރުމަށާއި، ޕެންޝަން ފަންޑުން އިންވެސްޓު ކުރުމަށް ފަހި މާހައުލެއް ގާއިމުކުރުމަށް މަސައްކަތް ކުރަމުންދާ މުއައްސަސާއަކަށް ވާތީ، އެކަމާ ގުޅުންހުރި ދާއިރާއަކަށް ސަމާލުކަން ދިނުމަށް ކަމަށް އެ އޮފީހުން ބުނެއެވެ.
