މަސްތުވާތަކެތިން ސަލާމަތްވާން ބޭނުންވާ އަންހެނުންނަށް ހާއްސަ މަރުކަޒެއް ހުޅުވައިފި
ހުޅުމާލޭ ހާފްވޭ ހައުސްގައި އެއްފަހަރާ 20 މީހުންނަށް ފަރުވާދެވޭނެ
ހުޅުމާލޭ ހާފްވޭ ހައުސްގައި ގާއިމްކުރި މަރުކަޒު
މަސްތުވާތަކެތިން ސަލާމަތްވާން ބޭނުންވާ އަންހެނުންނަށް ހާއްސަ މަރުކަޒެއް ހުޅުމާލޭގައި ހުންނަ ހާފްވޭ ހައުސްގައި ހުޅުވައިފިއެވެ.
ހުޅުމާލޭގައި ހުންނަ ހާފްވޭ ހައުސްގައި މި ސެންޓަރު ހުޅުވައިދެއްވީ ރައީސް އޮފީހުގެ މިނިސްޓަރ ޑރ. މުސްތަފާ ލުތުފީއެވެ. މިތަން ބަލަހައްޓަނީ ނެޝަނަލް ޑްރަގް އެޖެންސީންނެވެ. މީގެ ކުރިންވެސް އެތަނުގައި މަރުކަޒެއް ހިންގި ނަމަވެސް ފަހުން އެތަނުގެ މަސައްކަތް އެންމެ ރަނގަޅަށް ކުރިއަށް ނުގެންދެވޭތީ އެތަން ބަންދުކުރުމަށްފަހު، އެމްޓީސީސީން އެތަނުގައި ހިލޭ އިމާރާތްކުރި ބްލޮކާއެކު އަލުން އެތަން ވަނީ ހުޅުވާފާއެވެ.
ހުޅުމާލޭ ހާފްވޭ ހައުސްގައި އަލަށް ހުޅުވި މަރުކަޒާއި ގުޅޭގޮތުން ވާހަކަައްކަވަމުން އެންޑީއޭގެ ސީއީއޯ އިމާދު ޞާލިޙު ވިދާޅުވީ އެންޑީއޭއަކީ ހަމައެކަނި މަސްތުވާތަކެތީ ފަރުވާދޭތަނެއްގެ ގޮތުގައި ލޭބަލް ވެފައި އޮތްނަމަވެސް އެތަނުގެ ޒިންމާ ވަރަށް ބޮޑު ކަމަށެވެ. އަދި އަލަށް ހުޅުވިގެން ދިޔަ މަރުކަޒާއެކު ބަދަލުތަކެއް ފެންނާނެ ކަމަށެވެ. އަދި މި މަސައްކަތް ކުރުމަށް އެންޑީއޭއަށް ކަމާއި ގުޅުންހުރި މުއައްސަސާތަކުގެ އެއްބާރުލުން ބޭނުންވާ ކަމަށް އިމާދު ވިދާޅުވިއެވެ.
ހުޅުމާލޭ ހާފްވޭ ހައުސްގައި އެއްފަހަރާ 20 މީހުންނަށް ފަރުވާދެވޭނެއެވެ. އަދި ބެޗްތަކަށް ބަހާލައިގެން ފަރުވާ ދޭއިރު، ހޯމަ ދުވަހުން ފެށިގެން އެތަނުގައި ރަސްމީކޮށް ހިދުމަތްދޭން ފެށޭނެކަމަށް ހެލްތް މިނިސްޓްރީން ބުނެއެވެ. މީގެ އިތުރުން ފަރުވާއަށް ފަސްޖެހޭ ފަރާތްތަކަށް ދިމާވެފައިވާ މައްސަލަތައް މި މަރުކަޒާއެކު ހައްލުކުރެވިގެންދާނެކަމަށް ހެލްތް މިނިސްޓްރީން ބުނެއެވެ.
