މާލޭގައި ޑްރަގް އެންފޯސްމެންޓުން ހިންގި އޮޕަރޭޝަންއެއްގައި ހައްޔަރުކުރި ފުލުސް އޮފިސަރު ވަޒީފާއިން ސަސްޕެންޑުކޮށްފައިވާކަމަށް ފުލުހުންގެ އިދާރާއިން ބުނެފިއެވެ.
މި އޮޕަރޭޝަންގައި ހައްޔަރުކުރި އޮފިސަރަކީ ފުލުހުންގެ ޑްރަގް އެންފޯސްމެންޓުގައި މަސައްކަތްކުރަމުންދާ ފުލުހެކެވެ. ފުލުހުން ބުނީ އޭނާގެ މައްޗަށް ތުހުމަތުކުރެވޭ ޖިނާއީ މައްސަލައާއި، އިދާރީ މައްސަލަ ތަހުގީގުކުރަމުންދާކަމަށެވެ.
ފުލުހުން ބުނީ ފުލުހުން ހިންގާ އޮޕަރޭޝަންތަކުގައި ހައްޔަރުކުރާ މީހާއަކީ ޑްރަގް އެންފޯސްމެންޓުގައި އުޅޭ ފުލުހެއް ނަމަވެސް އެއްވެސް އިސްތިސްނާއެއްނެތި އެމީހަކާ ދޭތެރޭ ފިޔަވަޅު އަޅާނެ ކަމަށެވެ.
ފުލުހުން ވަނީ އެ ފުލުހަކީ ޑްރަގް އެންފޯސްމެންޓުގެ ބެލުމުގެ ދަށަށް ގެނެވޭ މަސްތުވާތަކެތި ބަލަހައްޓާ ޓީމުގައި ހިމެނޭ ފުލުހެއް ނަމަވެސް، އެ އިދާރާގެ ބެލުމުގެ ދަށަށް ގެނެވޭ މަސްތުވާތަކެތި ބެލެހެއްޓުމުގައި އަމަލުކުރާ އުސޫލު ހަމަޖެހިފައި އޮންނަ ގޮތުން، އެ ތަކެތި ނަހަމަ ގޮތުގައި ބޭނުންކުރުމުގެ އެއްވެސް ފުރުސަތެއް އެ ފުލުހަށް އަދި އެއްވެސް ފުލުހަކަށް ނޯންނާނެ ކަމުގެ ޔަގީންކަން ދީފައެވެ.
ބުރާސްފަތި ދުވަހުގެރޭ ފުލުހުންގެ ޑްރަގް އެންފޯސްމެންޓުން ހިންގި އޮޕަރޭޝަނެއްގައި 12 މީހަކު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. އެމީހުން ހައްޔަރުކޮށްފައިވަނީ މަސްތުވާތަކެއްޗާއެކު ޕާޓީކުރަން ތިއްބައެވެ. މި މީހުންގެ ތެރޭގައި ޑްރަގް އެންފޯސްމެންޓުގެ އޮފިސަރު ހިމެނެއެވެ.
