ކ. ކާށިދޫގެ ކުރުހިންނަ ތަރާގަނޑު ސަރަޙައްދު ސާފު ކުރުމުގެ މަސައްކަތް ފަށައިފި
13 ނޮވެމްބަރު 2022 | އާދީއްތަ 09:02ކުރިއަތް އޮތް ހަފްތާތަކުގެ ތެރޭގައި މަސައްކަތް ނިންމާ، ތަން ސާފުކޮށް ބެލެހެއްޓޭނެ
ކ. ކާށިދޫގެ ކުރުހިންނަ ތަރާގަނޑު ސަރަޙައްދު ސާފު ކުރަނީ
ކ. ކާށިދޫގެ ކުރުހިންނަ ތަރާގަނޑު ސަރަޙައްދު ސާފު ކުރުމުގެ މަސައްކަތް ހުކުރު ދުވަހު ފަށައިފިއެވެ.
ރާއްޖެއެމްވީއަށް މައުލޫމާތު ދެއްވަމުން ހެރިޓޭޖް މިނިސްޓްރީގެ ޑިރެކްޓަރ ކޮމިއުނިކޭޝަން އިސްމާޢީލް ނާއިލް ނަޝީދު ވިދާޅުވީ އެތަން ސާފުކުރުމަށް ހުށަހެޅުއްވީ ކާށީދޫ ދާއިރާގެ މެންބަރު އަބްދުﷲ ޖާބިރުގެ އިސްނެންގެވުމުގެ މަތިން ކަމަށެވެ. އަދި އެ ރަށުގެ ރައްޔިތުންނާއި ކައުންސިލާއި ގުޅިގެން ތަން ސާފުކުރުމަށް އެދިވަޑައިގެންނެވި ކަމަށެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުގެ އިރުޝާދުގެ ދަށުން މަސައްކަތް ފަށާފައިވާއިރު ކުރިއަތް އޮތް ހަފްތާތަކުގެ ތެރޭގައި މަސައްކަތް ނިންމާ، ތަން ސާފުކޮށް ބެލެހެއްޓޭނެ ކަމަށް ނާއިލް ވިދާޅުވިއެވެ.
އެ ސަރަޙައްދު ސާފު ކުރުމުގެ މަޤްސަދަކީ އެތަން ރައްޔިތުންނަށް ބަލާލެވޭ ގޮތަށް، ތާރީޚު އެނގޭ ގޮތަށް، ރައްކާތެރި ކަމާއެކު ބެލެހެއްޓޭ ތަނަކަށް ހެދުން ކަމަށް ވެސް ވިދާޅުވިއެވެ. އަދި އުއްމީދަކީ ރަށުގެ ތާރީޚާއި ތަނުގެ ތާރީޚީ މަޢުލޫމާތު ލިބޭނެ އިންތިޒާމެއް ހަމަޖެހިގެން ދިއުން ކަމަށް ނާއިލް ވިދާޅުވިއެވެ.
ނާއިލް އިތުރަށް ވިދާޅުވީ ރަށްރަށުގައި ހުރި މިފަދަ އާސާރުތައް ހިމާޔަތްކޮށް، ރައްކާތެރިކޮށް ބެލެހެއްޓުމުގެ އެންމެ ބޮޑު ބޭނުމަކީ ސަޤާފީ ފަތުރުވެރިކަމުގެ ތެރެއިން ރަށްރަށަށް ނަފާ ވަންނާނެ ގޮތެއް ހޯދުން ކަމަށެވެ.
މިފަދަ ކޮންމެ މަސައްކަތަކަށް ރައްޔިތުންގެ މަޖިލީހުގެ މެންބަރުންނާއި ރައްޔިތުންނާއި ކުންފުނިތަކާއި ކައުންސިލްތަކުން ވެސް އިސްނަންގަވާކަމީ އުފާކުރާ ކަމެއްކަން ނާއިލް ފާހަގަކުރެއްވިއެވެ.
ކާށިދޫ ކުރުހިންނަ ތަރާގަނޑަކީ މިހާތަނަށް ރާއްޖޭގައި އާކިއޮލޮޖިކަލް ހަމަތަކުގެ މަތިން ކޮނެ، ދިރާސާ ކުރެވިފައިވާ ހަމައެކަނި އާސާރީ ސަރަޙައްދެވެ. 1996 ން 1998 އާއި ދެމެދު 1880 އަކަމީޓަރުގެ ސަރަޙައްދެއް ކޮނެގެން ކުރި ދިރާސާތަކުން އެނގުނު ގޮތުގައި އެ ސަރަޙައްދަކީ މީލާދީން 7 ވަނަ ޤަރުނާއި 8 ވަނަ ޤަރުނާއި ދެމެދު (މީގެ 1300-1400 އަހަރު ކުރި) ބުޑިސްޓު އެކުވެންޏެއްގެ ގޮތުގައި ބޭނުންކުރި ތަނެކެވެ. އެތަނުގައި ފެންނަންހުރީ މުރަކަ ގަލުން ހަދާފައިވާ ބިނާތަކެއްގެ ތަރާގަނޑުތަކެކެވެ. އަދި އޭރު ކުރެވުނު ދިރާސާތަކުން އެ ޒަމާނުގައި ދިވެހިންގެ ދިރިއުޅުން ހުރި ގޮތާއި ގުޅޭ ބައެއް މަޢުލޫމާތު ވަނީ އެއްކުރެވިފައެވެ.
