ފީފާ ވޯލްޑް ކަޕަށް ސީޒަން މެދު ކަނޑާލުމަށްފަހު، ސީޒަން ފަށާއިރު މެންޗެސްޓަރ ސިޓީ އަސްލު އޮންނަންވާ ހިސާބު ފެންނާނެ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.
ގާޑިއޯލާ މިހެން ބުނީ ވޯލްޑް ކަޕްގެ ކުރިން ލީގުގައި ކުޅުނު ފަހު މެޗުން ބްރެންޓްފޯޑު އަތުން ބަލިވުމުންނެވެ. ލީގުގައި ސިޓީން ދައްކަމުން އަންނަ ކުޅުމާ ގުޅުވައިގެން ގާޑިއޯލާ ބުނީ ޓީމުގެ ކުޅުން ރަނގަޅު ކަމަށެވެ. ގާޑިއޯލާ ބުނީ ލީގު މެދުކަނޑާލާއިރު ބަލިވުމުގެ ނަތީޖާއާއެކު ދާން އުނދަގޫ ކަމަށާއި، ނަމަވެސް އެއީ ހަގީގަތްކަމަށެވެ.
މީގެ އިތުރުން ގާޑިއޯލާ ބުނީ ޔުއެފާ ޗެމްޕިއަންސް ލީގުގެ ގްރޫޕް ސްޓޭޖު ސިޓީން ނިންމާލީ އެއް ވަނައިގައި ކަމަށާއި، ކަރަބޯ ކަޕްގައި ސިޓީ އޮތީ ހަތަރު ވަނަ ބުރުގައި ކަމަށާއި، ޕްރިމިއާ ލީގުގައި އާސެނަލްގެ ފަހަތުން ވާދަކުރަމުން އަންނަ ކަމަށެވެ. ގާޑިއޯލާ ބުނީ އެއީ ސިޓީގެ ކުޅުން ވެސް އަދި ފެންވަރު ވެސް ރަނގަޅުކަމުގެ ހެއްކެއް ކަމަށެވެ. ނަމަވެސް ބްރެންޓްފޯޑު އަތުން ބަލިވުމުން ލީގުގައި ތަން ކޮޅެއް ފަހަތަށް ޖެހުނުކަން ފާހަގަ ކުރަމުން ގާޑިއޯލާ ބުނީ، ދެން ސީޒަން ފަށާއިރު ސިޓީ އޮންނަންވީ ހިސާބުގައި އޮންނާނެ ކަމަށެވެ.
ގާޑިއޯލާ ބުނީ ޕްރިމިއާ ލީގުގެ ތާވަލްގެ އެއް ވަނައިގައި އޮވެވޭނީ އެ ޓީމެއް މޮޅުވީމަ ކަމަށެވެ. އޭނާ ބުނީ އާސެނަލުން ދައްކަމުން އަންނަނީ މޮޅު ކުޅުމެއް ކަމަށެވެ. ނަމަވެސް ސިޓީން މަސައްކަތް ކުރާނީ އަލުން އެނބުރި އައިސް ރަނގަޅުކުރަން ކަން އޭނާ ވަނީ ފާހަގަކޮށްފައެވެ.
ވޯލްޑް ކަަޕަށްފަހު ލީގު އަލުން ފަށާއިރު ސިޓީ އަށް ފުރަތަމަ އޮންނާނީ ކަރަބޯ ކަޕްގެ ހަތަރު ވަނަ ބުރުގައި ވާދަވެރި ލިވަޕޫލާ ދެކޮޅަށް ކުޅޭ މެޗެވެ.
