ވޯލްޑް ކަޕްގެ ސެމީ ފައިނަލަށް ފްރާންސް ދަތުރު ނުކޮށްފިނަމަ ކޯޗުގެ ވަޒީފާ ގެއްލިދާނެ

މި މަހު ފަށާ ފީފާ ވޯލްޑް ކަޕްގެ ސެމީ ފައިނަލަށް ފްރާންސް ޓީމު ދަތުރު ނުކޮށްފިނަމަ އެޓީމުގެ ކޯޗު ޑިޑިއޭ ޑެޝަމްޕްސްގެ މަގާމު ގެއްލިދާނެކަމުގެ އިޝާރާތެއް ފްރާންސް ފުޓްބޯޅަ ފެޑެރޭޝަނުން ކޮށްފިއެވެ.

ފްރެންޗް ފުޓްބޯޅަ ފެޑެރޭޝަންގެ ރައީސް ނޯއެލް ލުގްރޭޓް ވަނީ ދާދި ފަހުން ޓީމުގެ ކޯޗާއި ބައްދަލުކޮށްފައެވެ. މި ބައްދަލުވުމުގައި ލުގްރޭޓް ވިދާޅުވީ ވޯލްޑް ކަޕަށްފަހު ޓީމުގެ ކޯޗުކަމުގައި ޑެޝަމްޕްސް ބެހެއްޓުމާއި މެދު ގޮތެއް ނިންމާނީ މުބާރާތުގެ ނަތީޖާއަށް ބެލުމަށްފަހު ކަމަށެވެ. މުބާރާތުގައި ފްރާންސް ޓީމު ސެމީ ފައިނަލަށް ދަތުރު ކޮށްފިނަމަ، މުބާރާތަށްފަހު މަގާމުގައި ހުރުމާއި މެދު ގޮތް ނިންމާނީ ކޯޗުކަމަށް ލެގްރޭޓް ވިދާޅުވިއެވެ. ނަމަވެސް ސެމީއަށް ދަތުރު ނުކޮށްފިނަމަ ދެން ގޮތް ނިންމާނީ ފުޓްބޯޅަ ފެޑެރޭޝަނުން ކަމަށްވެސް ލެގްރޭޓް ފާހަގަކުރެއްވިއެވެ.

ފްރާންސަކީ ވޯލްޑް ކަޕްގެ އެންމެ ފަހުގެ ޗެމްޕިއަނުންނެވެ. މިފަހަރުގެ މުބާރާތުގައި ފްރާންސް ހިމެނެނީ އޮސްޓްރޭލިއާ، ޑެންމާކް އަދި ޓިއުނީޝިޔާ އާއެކު ގްރޫޕް ޑީގައެވެ. މުބާރާތުގައި ފްރާންސްގެ ފުރަތަމަ މެޗުގައި މި މަހުގެ 23 ވަނަ ދުވަހު ފްރާންސް ނުކުންނަން ޖެހޭނީ އޮސްޓްރޭލިއާ އާއި ދެކޮޅަށެވެ.