ކޯޑިނޭޓަރު މުއާ ކަފާލާތުގެ ދަށުން މިނިވަންކޮށްފި

މަސްތުވާތަކެތީގެ މައްސަލައެއްގައި ގޭބަންދުގައި ބަހައްޓާފައިހުރި ނެޝެނަލް ސެންޓަ ފޯ ދި އާޓްސް (އެންސީއޭ) ގެ ކޯޑިނޭޓަރު އަދި ފިލްމީ ތަރި އަބްދުﷲ މުއާޒް ކަފާލާތުގެ ދަށުން މިނިވަންކޮށްފިއެވެ.

ކަފާލާތުގެ ދަށުން މުއާ މިނިވަން ކޮށްފައިވަނީ ބުރާސްފަތި ދުވަހުއެވެ. އަދި މުއާ މިނިވަންކޮށްފައި ވަނީ ކްރިމިނަލް ކޯޓުގައި 5000ރ ބަހެއްޓުމަށްފަހުގައި ޝަރުތުތަކާއިއެކުގައެވެ.

ނަމަވެސް މުއާ މިނިވަން ކުރުމާއި ގުޅޭގޮތުން ރަސްމީ އެއްވެސް ފަރާތެއް ރަސްމީ ބަހެއް ވަނީ ލިބޭގޮތް ނުވެފައެވެ.

ފުލުހުންގެ މީޑިއާ އޮފިޝަލް ވިދާޅުވެފައިވަނީ މިމަހުގެ 16 ވަނަ ދުވަހުގެ ރޭގެ ވަގުތު މުއާޒްގެ އިތުރުން އިތުރު ހަތަރު މީހަކު ހައްޔަރުކޮށްފައިވާ ކަމަށެވެ. އަދި ހައްޔަރުކުރި ތަނުން ހަތަރު ފުޅި ބަނގުރާ ވެސް ފެނިފައިވާ ކަމަށް އޮފިޝަލް ވިދާޅުވިއެވެ.

މުއަޒު ހައްޔަރުކުރުމަށްފަހު ބަންދުގެ މުއްދަތު އިތުރުކުރުމަށް ކޯޓަށް ހާޒިރު ކުރުމުން ކޯޓުން ވަނީ ފަސް ދުވަހަށް މުއާޒު ގޭބަންދަށް ބަދަލުކޮށްފައެވެ.

ޔޫތު މިނިސްޓްރީގެ ދަށުން ހިންގަމުން އަންނަ އެންސީއޭގެ ކޯޑިނޭޓަރުގެ މަގާމަށް މުއާޒު ފުރަތަމަ އައްޔަން ކުރައްވާފައިވަނީ ރައީސް ޔާމީންގެ ސަރުކާރުގެ ކުރީކޮޅެވެ. އޭގެފަހުން އެމްއެމްޕީއާރުސީގެ ހިޔާނާތާއި ގުޅިގެން ކުރީގެ ނައިބު ރައީސް އަހުމަދު އަދީބު ހައްޔަރުކޮށް، އަދީބާ ގުޅުން އޮންނަ ގިނަ ބަޔަކު ސަރުކާރުގެ މަގާމުތަކުން ވަކިކުރިއިރު މުއާޒުވެސް އެދުވަސްވަރު ކޯޑިނޭޓަރުގެ މަގާމުން ވަނީ ވަކިކޮށްފައެވެ. ނަމަވެސް ދާދިފަހުން ހަމަ އެމަގާމަށް މުއާޒު ވަނީ އައްޔަން ކުރައްވާފައެވެ.