މިހާތަނަށް 2.5 ބިލިއަން ރުފިޔާގެ ލޯނު އަނބުރާ ދައްކައިފި
2.8 ބިލިއަން ރުފިޔާގެ ލޯނު ދެއްކުމަށް އެޕްރޫވްކޮށްފައިވޭ
ފިނޭންސް މިނިސްޓްރީ
އަހަރުގެ މިހާތަނަށް 2.5 ބިލިއަން ރުފިޔާ ލޯނު އަނބުރާ ދައްކައިފިއެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން އޮކްޓޯބަރު 27ގެ ނިޔަލަށް ދައުލަތުން ވަނީ ދެ ބިލިއަން ފައްސަތޭކަ ތިރީސް އަށްމިލިއަން ރުފިޔާގެ ލޯނު އަނބުރާ ދައްކާފައެވެ. އަދި މިހާތަނަށް 2.8 ބިލިއަން ރުފިޔާގެ ލޯނު އަނބުރާ ދެއްކުމަށް އެޕްރޫވްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާ ބަލާއިރު ދަށް އަދަދެކެވެ. މިގޮތުން މިދިޔަ އަހަރުގެ މި މުއްދަތުގައި 3.8 ބިލިއަން ރުފިޔާގެ ލޯނު އަނބުރާ ދައްކާފައިވާކަމަށް ފިނޭންސް މިނިސްޓްރީގެ ތަފާސްހިސާބުން ހާމަކުރެއެވެ.
ދައުލަތުން އެކި މަސައްކަތްތައް ކުރުމަށް ބޭރުގެ ގައުމުތަކުން ލޯނު ނަގަމުންދާތީ ސަރުކާރަށް ދަނީ ބޮޑެތި ފާޑުކިޔުންތަކެއް އަމާޒުވަމުންނެވެ. މިގޮތުން ލޯނު އަނބުރާ ދެއްކޭނެ ގާބިލުކަން ނެތްކަމަށް ދަނީ ބުނަމުންނެވެ. އެހެންނަމަވެސް ފިނޭންސް މިނިސްޓަރު އިބްރާހިމް އަމީރު ވަނީ ލޯނުތައް އަނބުރާ ދެއްކުމުގައި ދައްޗެއް ނެތް ކަމަށް ވިދާޅުވެފައެވެ.
ކޮވިޑް-19 އަށްފަހު ރާއްޖޭގެ އިގްތިސާދު ކުރިއަރަމުން އަންނަ ކަމަށް ފިނޭންސް މިނިސްޓަރު އަމީރު ވިދާޅުވެފައިވާއިރު، އަހަރުގެ މިހާތަނަށް ދައުލަތަށް އާމްދަނީގެ ގޮތުގައި ލިބިފައިވަނީ 22.2 ބިލިއަން ރުފިޔާ ވަނީ ލިބިފައެވެ. ޓެކުހުން 16 ބިލިއަން ރުފިޔާގެ އާމްދަނީއެއް ލިބިފައިވާއިރު، ޓެކްސް ނޫން އެހެނިހެން ގޮތްގޮތުން 6 ބިލިއަން ރުފިޔާގެ އާމްދަނީއެއް ލިބިފައިވާކަމަށް ފިނޭންސް މިނިސްޓްރީން ބުނެފައިވެއެވެ.
މިހާތަނަށް 33 ބިލިއަން ރުފިޔާ ބަޖެޓުން ޚަރަދުކޮށްފައިވާއިރު، ރިކަރަންޓު ޚަރަދުގެ ގޮތުގައި 22.5 ބިލިއަން ރުފިޔާ ހިނގާފައިވާ ކަމަށް ފިނޭންސްގެ ތާފސްހިސާބުން ދަައްކައެވެ. ކެޕިޓަލް ޚަރަދުގެ ގޮތުގައި 8.2 ބިލިއަން ރުފިޔާ ހިނގާފައިވެއެވެ. މަލްޓިލޭޓެރަލް އެޖެންސީތަކަށް ސަބްސްކްރިޕްޝަންގެ ގޮތުގައި 22 މިލިއަން ރުފިޔާ ޚަރަދުކޮށްފައިވާއިރު، ސޮވެރިން ޑިވެލޮޕްމެންޓް ފަންޑަށް 653 މިލިއަން ރުފިޔާ ފޮނުވާފައިވެއެވެ. އަދި ޕީއެސްއައިޕީ މަޝްރޫއުތަކަށް 6.1 ބިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ހާމަކުރެއެވެ.
