ޗާގޯސްގެ މައްސަލައިގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މޮރިޝަސްގެ ބޮޑުވަޒީރަށް ފޮނުއްވެވި ސިޓީފުޅާއި، އދ. ގައި ކުރިއަށްދާ މައްސަލައިގައި ރާއްޖޭގެ ސްޓޭންޑް ބަދަލުކޮށްފައިވާކަން މަޖިލީހާ ހިއްސާ ނުކުރާކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.

މަޖިލީހުގެ އިދާރާއިން މިހެން ބުނެފައިވަނީ ރާއްޖެއާ ޗާގޯސްއާ ދެމެދުގައި އޮތް ކަނޑުގެ ސަރަހައްދުގެ ތެރެއިން ފުށުއަރާ ސަރަހައްދާ ގުޅޭ މައްސަލައާ ގުޅޭގޮތުން އަންގާރަ ދުވަހުގެ ރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، އެޓަރނީ ޖެނެރަލް އިބްރާހީމް ރިފްއަތު ދެއްކެވި ވާހަކަފުޅުތަކަށް ރައްދުދީ ބުދަ ދުވަހު ނެރުނު ބަޔާނެއްގައެވެ. މި ބަޔާނުގައިި ބުނެފައިވަނީ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)ގައި ކުރިއަށްދާ މައްސަލައާގުޅޭ މައުލޫމާތު މަޖިލީހާ ހިއްސާކޮށްފައިވާކަމަށް އޭޖީ ވިދާޅުވިނަމަވެސް، ރައީސްގެ ސިޓީފުޅާއި، ޗާގޮސް މޮރިޝަސްއާ ހަވާލުކުރުމަށް ގޮވާލައި ގަރާރަށް އދ.ގެ އާއްމު މަޖިލީހުގައި ރާއްޖޭން މިހާތަނަށް ނަގަމުން އައި ސްޓޭންޑް ބަދަލުކޮށްފައިވާކަމާއި އެ ނިންމުން ބަދަލުކުރި ސަބަބު މަޖިލީހާ މިހާތަނަށް ހިއްސާކޮށްފައި ނުވާކަމަށެވެ.

މި މައްސަލައިގެ ޓައިމްލައިނެއް އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ހިއްސާކުރައްވައި އޭޖީ ވިދާޅުވީ، މަޖިލީހާ މައްސަލައިގެ ތަފްސީލު ހިއްސާކޮށްފައިވަނީ 17 ފެބްރުއަރީ 2022ގައި ކަމަށެވެ. އެގޮތުން، މަޖިލީހަށް ހުށަހެޅި ލިޔެކިޔުންތަކުގެ ތެރޭގައި މޮރިޝަސްގެ ފަރާތުން ހުށަހަޅާފައިވާ މައްސަލައާއި މޮރިޝަސްގެ ފަރާތުން ދީފައިވާ ޖަވާބާއި އެ މައްސަލައިގައި ރާއްޖޭގެ ފަރާތުން ދީފައިވާ ޖަވާބު މަޖިލީހަށް ފޮނުވި ސިޓީއާއެކު ހިއްސާ ކޮށްފައިވާ ކަމަށް އޭޖީ ވިދާޅުވިއެވެ.

މީގެ އިތުރުން މަޖިލީހަށް ފޮނުވި ސިޓީއާއެކު މި މައްސަލައާ ގުޅޭގޮތުން ހުށަހެޅިފައި ހުރި ޗާޓުތަކުގެ ކޮޕީ ވެސް މަޖިލީހާ ހިއްސާ ކޮށްފައިވާނެ ކަމަށް އޭޖީ ވިދާޅުވިއެވެ. ނޫސްވެރިންގެ ބައްދަލުވުމުގައި ރައީސްގެ ސިޓީ އާއި އދ. ގައި ކުރިއަށްދާ މައްސަލައިގެ ކަންކަމާ ގުޅޭ މައުލޫމާތު ހިއްސާ ކުރެއްވި ކަމަށް އޭޖީ ވެސް ވިދާޅެއް ނުވެއެވެ.

މި މައްސަލައިގައި އޭޖީ އޮފީހުން ދެ ސިޓީއެއް މަޖިލީހަށް ލިބުނު ކަމަށް ވެސް މަޖިލީހުން ނެރުނު ބަޔާނުގައި ވަނީ ބުނެފައެވެ.

މަޖިލީހުގެ ބަޔާނުގައި ބުނީ ޗާގޯސްގެ މައްސަލައިގައި ރާއްޖެއަށް ދައުވާ ރައްދުވާ ގޮތަށް މޮރިޝަސްއިން ދައުވާ އުުފުލާފައިވާތީއާއި، ރާއްޖޭން ކުރިން ދެކެމުން އައި ގޮތް ބަދަލުވެއްޖެކަން ޚަބަރުތަކުން އެނގޭކަމަށް ބުނެ، އެއީ ދިވެހި ދައުލަތުގެ ސިޔާދަތާ ގުޅުންހުރި ކަމެއް ކަމަށް ބަޔާންކޮށް އަމިއްލަ ފަރާތަކުން މަޖިލީހުގެ އިދާރާއަށް ފޮނުވި ސިޓީއަކާ ގުޅިގެން މި އަހަރުގެ ފެބްރުއަރީ މަހު އޭޖީ އޮފީހުގެ ކަމާ ގުޅުންހުރި ބޭފުޅުންނާ ބައްދަލުކުރެއްވުމަށް އެދުނު ކަމަށެވެ. އަދި އޭޖީއޮފީހުން ދެ ސިޓީއެއް ފޮނުވި ކަމަށާއި، އޭގައި ރާއްޖެއާ ޗާގޯސްއާ ދެމެދު އޮތް ކަނޑުގެ ސަރަހައްދުގެ ތެރެއިން ފުށުއަރާ ސަރަހައްދާ ގުޅޭގޮތުން ޓްރައިބިއުނަލަށް ހުށަހަޅާފައިވާ މައްސަލައާ ގުޅޭ މައުލޫމާތު ހިމަނާފައިވާކަމަށްވެސް މަޖިލީހުގެ ބަޔާނުގައި ވަނީ ބުނެފައެވެ.

މީގެ އިތުރުން އަޑު އެހުންތައް ބޭއްވުމާ ހަމައަށް އެ ލިޔެކިޔުންތަކުގެ ސިއްރު ހިފަހައްޓަންޖެހޭ ކަމަށާއި އޭގެ ފަހުން އިތުރު އެއްވެސް މައުލޫމާތެއް މަޖިލީހަށް ހިއްސާ ނުކުރާކަމަށްވެސް އެ އިދާރާއިން ބުނެއެވެ.

މި މައްސަލައާ ގުޅޭގޮތުން އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރ އަބްދުﷲ ޝާހިދު ވިދާޅުވެފައިވަނީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މޮރިޝަސްއަށް ފޮނުއްވެވި ސިޓީފުޅުގައި ވިދާޅުވީ، އިނގިރޭސިވިލާތުން ޗާގޯސް މޮރިޝަސްއާ ހަވާލުކުރަން ޖެހޭ ކަމަށް ނިންމި ނިންމުމާ ގުޅިގެން އިތުރަށް އދ.ގެ އާއްމު މަޖިލީހުގައި ވޯޓަކަށް އަހައިފިނަމަ ރާއްޖޭން ވޯޓު ދޭނީ މޮރިޝަސްއާ އެއްކޮޅަށް ކަމަށެވެ. ނަމަވެސް އިޓްލޮސްގެ ވޯޓެއް ލައިފި ނަމަ އެކަމާ އެއްވެސް ގުޅުމެއް ނޯންނާނެކަން ރައީސްގެ ސިޓީގައި ހާމަކުރައްވާފައިވާ ކަމަށް ވެސް އޭނާ ވިދާޅުވިއެވެ.

މީގެ އިތުރުން މިހާތަނަށް ރާއްޖޭގައި އެކުލަވާލި އެއްވެސް ގާނޫނު އަސާސީއެއްގައި ޗާގޯސްއަށް ރާއްޖޭގެ ސިޔާދަތީ ބާރު އޮތްކަން ކަނޑައަޅާފައި ނުވާ ކަމަށާއި، ކުރީ ދެ ސަރުކާރެއްގައި ދެ ގައުމަކާއެކު މިކަމުގައި އެއްބަސްވުންތަކެއް ހެދިކަމަށްވެސް ޝާހިދު ވިދާޅުވިއެވެ. އެގޮތުން، 1992 ވަނަ އަހަރު ރައީސް މައުމޫނުގެ ވެރިކަމުގައި އިނގިރޭސިވިލާތާއެކު އެއްބަސްވުމެއް ހަދާފައިވާއިރު، 2010 ވަނަ އަހަރު ރައީސް ނަޝީދުގެ ވެރިކަމުގައި މޮރިޝަސްގެ ސަރުކާރާއެކު މަޝްވަރާކޮށްފައިވާ ކަމުގެ ލިޔެކިޔުންތައް އެބަހުރިކަމަށް ޝާހިދު ވިދާޅުވިއެވެ.