"ވީޑިއޯ ގޭމް" ގެ ނަން ދީފައިވާ އެ ވީޑިއޯގެ މަންޒަރުތައް ނަގާފައި ވަނީ މި އަހަރުގެ ހޫނު މޫސުމުގެ ދުވަސްވަރު
މިއީ މިދިޔަ 2 އަހަރެއްހާ ދުވަހުގެ ތެރޭގައި ވިބްމަރ ރިލީޒް ކުރި ފުރަތަމަ ވީޑިއޯ
ހުސް ވަގުތުތަކުގައި ކުރިމަތިވާ ފަޅުކަމާއި އެކަނިވެރިކަން ފިލުވާލުމަށް އެކި މީހުން ކޮށް އުޅޭނީ އެކި ކަންކަމެވެ. ހުސް ވަގުތު ތަކުގައި ކުރާ މަސައްކަތަށް އާދަޔާ ޚިލާފު ލޯތްބެއް ޖެހި، ދުވަހުގެ ތާވަލުން ބޮޑު ބައެއް އެކަމަށް ހުސްކޮށްލެވޭ ދަރަޖައަށްވެސް ބައެއް ފަހަރު ކަންކަން ދެއެވެ. ހުސް ވަގުތު ފުރާލުމަށް އާންމު ގޮތެއްގައި ކޮށް އުޅެނީ ލުއިލުއި ކަންތައްތަކެއް ކަމުގައި ވީ ނަމަވެސް، ބައެއް މީހުންނަކީ، އެ ކަންތައްތައް، އާ އުސްމިންތަކަކަށް ގެންދާ މީހުންނެވެ. އޮސްޓްރިއަރގެ ބައިސްކަލް ދުއްވުންތެރިޔާ ފަބިއޯ ވިބްމަރ އަކީވެސް، އާންމު ގޮތެއްގައި ހުސް ވަގުތުތަކުގައި މީހުން ކޮށް އުޅޭ ކަމެއް، އާ އުސްމިނަކަށް ގެންދިޔަ، އާދަޔާ ޚިލާފު ހުނަރުވެރިއެކެވެ.
މަޝްހޫރު ބައިކަރ، ވިބްމަރ، މި ފަހަރު އޭނާގެ ފޭނުން އާޝޯޚް ކުރުވީ، ދުނިޔެއަކީ ބިމަށް ދަމާ ބާރު ހުންނަ ތަނެކޭ ހަނދާނުން ކަސިޔާރު ކުރުވާ ފަދަ ހަރަކާތްތަކަކާއެކުގައެވެ. ނުވަތަ ގްރެވިޓީ ޑިފައީންގް ސްޓަންޓްތަކަކާއެކުގައެވެ. ވިބްމަރގެ ސްޓަންޓްތަކަށް އޭނާއަށް ހިތްވަރު ލިބުނީ، އޭނާ އެންމެ ގަޔާވާ ވީޑިއޯ ގޭމްތަކުންނެވެ.
"ގޭމިފިކޭޝަން" ނުވަތަ 3 ވަނަ މީހާގެ ނަޒަރިއްޔާއިން ގޭމްގެ ތަޖުރިބާތައް ކިޔާދޭ އުސޫލުން މަންޒަރުތައް ނަގާފައިވާ އެ ވީޑިއޯ ބަލާލި ކޮންމެ މީހަކަށްވެސް ސިފަވާނީ، ވިބްމަރގެ ހަރަކާތްތަކުގެ ކޮންޓްރޯލް، އެމީހެއްގެ އަމިއްލަ މުށު ތެރޭގައި އޮތް ކަހަލަ އިޙްސާސްއެކެވެ.
ބަލާލި ކޮންމެ މީހެއްގެ ތަލިން ކުޅު ހިއްކާލާ ފަދަ މަންޒަރުތަކެއް ފެނިގެންދާ، "ވީޑިއޯ ގޭމް" ގެ ނަން ދީފައިވާ އެ ވީޑިއޯގެ މަންޒަރުތައް ނަގާފައި ވަނީ މި އަހަރުގެ ހޫނު މޫސުމުގެ ދުވަސްވަރުއެވެ. މިއީ މިދިޔަ 2 އަހަރެއްހާ ދުވަހުގެ ތެރޭގައި ވިބްމަރ ރިލީޒް ކުރި ފުރަތަމަ ވީޑިއޯއެވެ. އަދި ޖަންގައްޔެއްގެ ތަރޭގައި މަންޒަރުތައް ނަގަމުން ދަނިކޮށް ފައިގެ ކުޑަ ހުޅާއި އަތުގެ ކޮނޑުހުޅަށް ލިބުނު އަނިޔާއަށް ފަހު އޭނާ ކުރި ފުރަތަމަ މަސައްކަތެވެ. މީގެ ކުރިން އޭނާ ވަނީ "ހޯމް އޮފީސް" އާއި "ވިބްމަރޒް ލޯ"ގެ ނަމުގައިވެސް ކާމިޔާބު ވީޑިއޯތަކެއް އާންމު ކޮށްފައެވެ.
ފެންނަ ފެނުމަށް، އޭނާ އެކުރަނީ މާ ފަސޭހަ ކަމެކޭ ހީވި ނަމަވެސް، އެކަމަކަށް ވިބްމަރ ހާއްސަވާ ޓްރަޔަލް ބައިކިންގްއަކީ މާ އާދައިގެ ކަމެއް ނޫނެވެ. ޓްރަޔަލް ބައިކިންގްއަކީ ބިމުގައި ފައި ޖެއްސުމެއް ނެތި، ތަފާތު އެކި ކަހަލަ ހުރަސްތައް ގިރާ ކުރަމުންދާ ބައިސްކަލު ދުއްވުމެވެ. އެގޮތުން، ޤުދުރަތީ ގޮތުން ހުންނަ އެކި ކަހަލަ އަޑިގުޑަން ހުރަސް ތަކުގެ އިތުރުން، އަމިއްލައަށް އަޅާ ހުރަސް ޓްރެކްތަކުގެ ތެރެއިންވެސް ޓްރަޔަލް ބައިކިންގްގައި ބައިސްކަލު ދުއްވައެވެ.
