ޝަލަބީގެ ފުރަތަމަ ވީޑިއޯ ލަވަ ބަލައިފިންތަ؟

ޝަލަބީގެ ފުރަތަމަ ވީޑިއޯ ލަވަ "އާދޭސް" މިވަނީ ހޮނިހިރުދުވަހުގެރޭ އާންމުންނާއި ހަމައަށް އައިސްފައެވެ. މިހާރު މި ލަވަ ޔޫޓިއުބް މެދުވެރިކޮށް އާންމުންނަށް ފެންނާނެއެވެ.

މިލަވަ ފެށިގެން އަންނަނީ އެއްވެސް ތަރުތީބުކަމެއް ނެތި އެއްޗެހި އުކާލާފައިވާ ކޮޓަރިއެއްގެ ތެރޭގައި ހުންނަ، ގޮތްހުސްވެފައިވާ ޝަލަބީ ފެންނަ ހިސާބުންނެވެ. މިލަވައިގައި ޝަލަބީ ދެރަވެ ހިތްހަމަ ނުޖެހިގެން ހުރެ އަންހެން ކުއްޖާއާއި ދުރަށް ދިއުމަށް އޭނާގެ ހިތުގެ އުދާސްތައް ބޭރުކޮށްލައެވެ.

ޝަލަބީގެ މެނޭޖަރ ޝަފީގް އަލީ (ސައްޕެ) ބުނިގޮތުގައި އެ ލަވައަކީ "ޑިޕްރެޝަން ލަވްސްޓޯރީއެއް" ކަމަށެވެ. މި ލަވައިގެ ޝޫޓިން 3 މަސްދުވަހުން ނިންމާލާފައިވާއިރު ބޮޑުބައެއް ނަގާފައިވަނީ ގުދަނެއްގެ ތެރޭގައި ބޮޑު ސެޓެއްގައެވެ.

މި ލަވަ ބަލާލުމުންވެސް ލަވައިގެ ވީޑިއޯ ފުރިހަމަ ކުރުމަށްޓަކާ ކޮށްފައިވާ މަސައްކަތް ފެނެއެވެ.

"އާދޭސް" ގެ ލިރިކްސް ހަދާފައިވަނީ ޝަލަބީގެ ބޭންޑް ކަމަށްވާ "ހައުސްއޮފް މިއުޒިކް" އިންނެވެ. މި ލަވައިގައި ޝަލަބީގެ އިތުރުން ފެނިގެން ދާނީ މޮޑެލް ޝައްމަތު އިބްރާހިމް އަދި ހައުސް އޮފް މިއުޒިކް ބޭންޑެވެ. ޝައްމަތަކީ ދާދި ފަހުން ނިކުތް މުންކޮގެ ފިލްމު ކަމަށްވާ "އިލްނޮއިސް" އިންވެސް ފެނިގެންދިޔަ ފަރާތެކެވެ.

ޝަލަބީ އާންމުކޮށް ކިޔަނީ ވަރަށް މަޑުމައިތިރި ލަވައެވެ. އެހެން ނަމަވެސް ސައްޕެ ބުނީ މިލަވައަކީ އާންމުކޮށް ޝަލަބީ ނުކިޔާ ވައްތަރުގެ ލަވައެއްކަމަށެވެ.