ކުރިއަށް އޮތް 3 ދުވަހު ރޭގަނޑު 10 ޖަހަންދެން ބަހުސް ކުރިއަށް ގެންދާނެ
މަޖިލިސް ޖަލްސާގެ ތެރެއިން
ވަގުތު އިތުރުކޮށްގެން ބަޖެޓް ބަހުސް ކުރިއަށް ގެންދިއުމަށް ފާސްކޮށް، ބަޖެޓް ބަހުސް ފަށައިފިއެވެ.
އަންނަ އަަހަރަށް ދައުލަތުން ލަފާކުރާ ބަޖެޓުގެ ބަހުސަށް ހުޅުވާލުމުގެ ކުރިން ރިޔާސަތުން، ނައިބު ރައީސް އީވާ އަބްދުﷲ ވިދާޅުވީ 2023 ވަނަ އަހަރަށް ލަފާކުރާ ދައުލަތުގެ ބަޖެޓުގެ ބަހުސް މަރުހަލާގައި މެންބަރުންނަށް ވަހަކަ ދައްކަވަން ދެވޭނީ 15 މިނެޓުގެ 1 ފުރުސަތު ކަމަށެވެ. އަދި ކޮމިޓީގެ ރިޕޯޓު ހުށަހެޅުމަށްފަހު ކޮމިޓީގެ ރިޕޯޓަށް ކޮންމެ މެންބަރަކަށް އިތުރު 7 މިނެޓު ދެވޭނެ ކަމަށް އާންމު ކޮމިޓީން ލަފާދީފައިވާ ކަމަށެވެ.
އަދި ބަޖެޓުގެ ބަހުސް ކުރިއަށްދާ ވަގުތު މެންބަރުންނަށް ފާހަގަވާ ނުކުުތާތަކަށް ޖަވާބު ދެއްވުމަށް ފިނޭންސް މިނިސްޓަރު 45 މިނެޓު މަޖިލީހުގައި ހޭދަކުރައްވަން އާންމު ކޮމިޓީން ކަނޑައަޅާފައިވާ ކަމަށެވެ. އަދި ފިނޭންސް މިނިސްޓަރު އަންގާރަ ދުވަހު މަޖިލީހަށް ވަޑައިގަންނަވާނެކަން އަންގަވާފައިވާ ކަމަށް ވެސް އީވާ ވިދާޅުވިއެވެ.
މެންބަރު ޝިފާއުގެ ނިޒާމީ ނުކުތާއާ ގުޅިގެން ރިޔާސަތުން ވިދާޅުވީ މެންބަރު ނެންގެވީ ނިޒާމާއި ބެހޭ ނުކުތާއެއް ނޫން ކަމަށެވެ. އަދި ރައްޔިތުންގެ މަޖިލީހުގެ މަސައްކަތް މެންބަރުން ކުރިއަށް ގެންދަންޖެހޭ ކަމަށާއި، މެންބަރުން އަންގާރަ އަދި ބުދަ ދުވަހު ބަހުސްކުރައްވާ ބަހުސްގެ މަރުހަލާ ނިންމަވާލައްވައިފިއްޔާ ބުރާސްފަތި ދުވަހުގެ ރޭ ޖުމްހޫރީ ދުވަހުގެ ޖަލްސާއަށް އިހަވަންދޫ ދާއިރާގެ މެންބަރަށް ވަޑައިގެންނެވޭނެ ކަމަށެވެ.
އެކަމަކު ބުރާސްފަތި ދުވަހުގެ ރެޔާ ހަމައަށް ހުރިހާ މެންބަރުންނަށް ދައުލަތުގެ ބަޖެޓުގެ ބަހުސް ކުރުމަށް ރިޔާސަތުން ފުރުސަތު ދޭންޖެހޭ ކަމަށާއި، އެގޮތުން އެހެން އަހަރުތަކެކޭ ވެސް އެއްފަދައިން މެންބަރުން ވަގުތު ބަހާލައިގެން ކުރިއަށް ގެންދާނެ ކަމަށެވެ.
ބަޖެޓުގެ ބަހުސް ކުރިއަށް ގެންދިއުމަށް ހުރިހާ މެންބަރުން ވާހަކަ ދެއްކެވުމަށް ފުރުސަތު ދީ ނިމެންދެން އަދި ހުސްވަގުތުކޮޅަށް ވެސް ތަންދެމުން އެ ދުވަހުގެ ޖަލްސާގެ ވަގުތު އިތުރުކުރުމާ މެދު ނެގި ވޯޓު ފާސްކުރުމަށް 37 މެންބަރުން ވަނީ ވޯޓު ދެއްވާފައެވެ.
