އެމްޓީސީސީން ކަރަންޓު ބަސްތަކެއް ގެނެސްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ކަރަންޓު ބަސްތަކެއް ގެނެސްފިއެވެ.

އެކުންފުނިން ވަނީ ކަރަންޓުން ދުއްވާ 6 މިނީ ބަސް އާރްޓީއެލްގެ ފްލީޓަށް ގެނެސްފައެވެ. މިއީ 11 މީހުންގެ ޖާގައިގެ ބަސްތަކެކެވެ. އަދި ފުރޮޅުލީ ގޮނޑީގައި ބަހަށް އަރާ މީހުންނަށް ޚާއްސަ ބަސްތަކެއް ވެސް މެއެވެ.

އެމްޓީސީސީން ބުނީ މި ބަސްތައް ގެނައުމުގެ މައިގަނޑު މަގުސަދަކީ، 2030 ގެ ކުރިން ރާއްޖެއަކީ ނެޓްޒީރޯ ގައުމަކަށް ހެދުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ފައްޓަވާފައިވާ މަސައްކަތުގައި ބައިވެރިވުން ކަމަށެވެ.

އާރުޓީއެލް ބަހުގެ ޚިދުމަތް ރާއްޖޭގެ އެކި ކަންކޮޅުތަކަށް އެމްޓީސީސީން ދެމުންގެންދާއިރު، މިހާރު މި ޚިދުމަތް ދިނުމަށް ބޭނުންކުރަނީ ތެޔޮ އަންދައިގެން ދުއްވާ ބަސްތަކެކެވެ. އެންމެ ފުރަތަމަ އެމްޓީސީސީން ނިންމީ އިލެކްޓިކް ބަސްތަކަކާ އެކު މި ޚިދުމަތް ފެށުމަށެވެ. އެހެންނަމަވެސް ވީހާވެސް އަވަހަށް މި ޚިދުމަތް ފެށުމުގެ ގޮތުން އެ ކުންފުނިން ގެނައީ ތެޔޮ އަންދައިގެން ދުއްވާ ބަސްތަކެކެވެ.