އެމްޑަބްލިއުއެސްސީގެ "އާރޯ" ފެން ތައާރަފުކޮށްފި

އެމްޑަބްލިއުއެސްސީން ތައްޔާރުކޮށް ބާޒާރަށް ނެރޭ "އާރޯ" ޕްރިމިއަމް ފެން ތައާރަފުކޮށްފިއެވެ.

ކްރޮސްރޯޑްސްގައި ހޯމަ ދުވަހުގެ ރޭ ބޭއްވި ރަސްމިއްޔާތެއްގައި އާރޯ ބްރޭންޑު ތައާރަފުކޮށްދެއްްވީ ޓްރާންސްޕޯޓް މިނިސްޓަރު އާއިޝަތު ނަހުލާއެވެ. މިއީ ރާއްޖޭގައި އުފައްދައި ނެރެންފެށި ފުރަތަމަ ޕްރިމިއަމް ބްރޭންޑުގެ ފެނެވެ.

Advertisement

އެމްޑަބްލިއުއެސްސީގެ މެނޭޖިންގ ޑިރެކްޓަރު ހަސަން ޝާހު ވިދާޅުވީ، އާރޯގެ ނަމުގައި ތައާރަފުކުރި މި ފެނުގެ އުފެއްދުން ރަމްޒުކޮށްދެނީ "މޯލްޑިވްސް އިން އަ ބޮޓްލް" ނުވަތަ ފުޅިއެއްގައި ރާއްޖެ ކަމަށެވެ. މި ފެން ތައްޔާރުކޮށްފައިވަނީ ފަތުރުވެރިންނާއި އާއްމުންނަށްވެސް އެންމެ ކަމުދާގޮތަށް ގުދުރަތީ މައުދަންތައް ހިމަނައިގެން ކަމަށާއި، މިއީ ފެންވަރު ރަނގަޅު ކޮލިޓީ މިނަރަލް ފެނެއްކަމަށް އޭނާ ވިދާޅުވިއެވެ.

ޝާހު ވިދާޅުވީ އާރޯ ފެން ފުޅީގައި ރާއްޖޭގެ ޚާއްސަ ތިން ކަމެއް ސިފަކޮށްދީފައިވާ ކަމަށެވެ. އެއީ ރާއްޖޭގެ ސްލޯގަނާ އެއްގޮތަށް "ދަ ސަނީ ސައިޑް އޮފް ލައިފް" ކަމަށާއި، އެގޮތުން ރާއްޖޭގެ މޫދާއި ގޮނޑުދޮށާއި އިރުވައި މޫސުން މި ފެންފުޅީގެ ބޭރުން ރަމްޒުވާނެކަމަށް އޭނާ ވިދާޅުވިއެވެ.

މިއީ ރާއްޖޭގެ ރީތިކަން ފަތުރުވެރިންނަށް އިޝްތިހާރުކޮށް، ގުދުރަތީ ވެށި ހިމާޔަތްކުރުމަށް އެޅުނު މުހިންމު ފިޔަވަޅެއްކަން ޝާހު ފާހަގަކުރެއްވިއެވެ. އަދި ރާއްޖޭގެ ފަތުރުވެރިކަން ކުރިއަރަމުން އަންނައިރު ދެމެހެއްޓެނިވި ގޮތެއްގައި އެ ސިނާއަތް ކުރިއަށްގެންދެވޭނީ އާރޯފަދަ ދިވެހި އުފެއްދުންތައް ބާޒާރަށް ތައާރަފު ކުރެވިގެން ކަމަށްވެސް ޝާހު ވިދާޅުވިއެވެ.

އާރޯ ބްރޭންޑުގެ ފެނާއެކު ކުރިއަށް އޮތްތަނުގައި އެ ބްރޭންޑުގެ އިތުރު އުފެއްދުންތައްވެސް ތައާރަފުކުރެވިގެންދާނެ ކަމަށް ޝާހު ވިދާޅުވިއެވެ. އަދި އެ ބްރޭންޑުގެ އުފެއްދުންތަކަކީ ބޭރުގެ ބްރޭންޑުތަކާ އެއްހަމައެއްގައި ފައިތިލަ ސާބިތުކުރާނެ ބްރޭންޑަކަށް ވާނެކަމުގެ ޔަގީންކަން އެބައޮތް ކަމަށްވެސް އޭނާ ވިދާޅުވިއެވެ.

އެމްޑަބްލިއުއެސްސީން ބުނެފައިވާގޮތުގައި އެ ކުންފުނިން އާރޯ ބްރޭންޑުގެ ފުޅި އުފެއްދުމުގައި ވިސްނި ކަންކަމަކީ ސަރުކާރުގެ ސިޔާސަތާ އެއްގޮތަށް، ތިމާވެއްޓާ ރައްޓެހި އުފެއްދުމެއް ބާޒާރަށް ނެރުމަށެވެ. އަދި ފެން އުފައްދާ ފެކްޓްރީއަކީ 100 އިންސައްތަ ފުލީ އޮޓޮމޭޓެޑް ސްޓޭޓް އޮފް އާޓް ޓެކްނޮލޮޖީ ބޭނުންކުރާ ފެކްޓްރީއެއްކަމަށާއި، ފުޅީގައި ފެން ބަންދުކޮށްގެން ފެކްޓްރީން ބޭރުވާއިރު 100 އިންސައްތަ ކޮލިޓީގެ ޔަގީންކަން އޮންނާނެކަމަށް އެ ކުންފުނިން ބުންޏެވެ.

މި ބްރޭންޑުގެ އުފެއްދުންތައް ސީރީޒެއްގޮތަށް ނެރުމަށް އެ ކުންފުނިން ވަނީ ނިންމާފައެވެ. މި އުފެއްދުންތަކުގެ ސަބަބުން ރާއްޖޭގެ އުފެއްދުންތެރިކަން އިތުރުވެ، ދިވެހި ހުނަރުވެރިންނަށް ފުރުސަތުތައް ލިބިގެންދާނެ ކަމަށްވެސް އެމްޑަބްލިއުއެސްސީން ބުނެއެވެ.

ރާއްޖޭގެ މަންޒަރުތައް ސިފަވާގޮތަށް ހަދާފައިވާ އާރޯ ފުޅީގެ ބޭރު ޑިޒައިންކޮށްފައިވަނީ ދިވެހި ކުރެހުންތެރިއެއްކަމަށްވާ އަލީ ޝިމްހާގުއެވެ.

މި ރަސްމިއްޔާތުގައި އާރޯ ބްރޭންޑުގެ ލަވަވެސް ވަނީ ލޯންޗުކޮށްފައެވެ.