ޔޫރޮޕާ ލީގު ޕްލޭއޮފްގައި މެންޗެސްޓަރ ޔުނައިޓެޑާއި ބާސެލޯނާ ވާދަކުރަން ޖެހިއްޖެ
ޕްލޭއޮފް މެޗުތައް ކުޅޭނީ އަންނަ އަހަރުގެ ފެބްރުއަރީ މަހު
ޔޫރޮޕާ ލީގުގެ ޕްލޭއޮފްގައި ވާދަކުރަން ޖެހުނު ޓީމްތައް
ޔޫރޮޕާ ލީގުގެ ދެވަނަ ބުރުން ޖާގަ ހޯދަން ކުޅޭ ޕްލޭއޮފްގައި މެންޗެސްޓަރ ޔުނައިޓެޑާއި ބާސެލޯނާ ވާދަކުރަން ޖެހިއްޖެއެވެ.
ބާސެލޯނައަކީ ޗެމްޕިއަންސް ލީގު ގްރޫޕް ސްޓޭޖުން ކަޓައިގެން ޕްލޭއޮފް ކުޅެން ޖެހުނު ޓީމެވެ. މެންޗެސްޓަރ ޔުނައިޓެޑަށް ޔޫރޮޕާ ލީގުގެ ގްރޫޕް ސްޓޭޖްގައި, ގްރޫޕްގެ އެއްވަނަ ނުހޯދުމުން ޕްލޭއޮފް ކުޅެން ޖެހުނީއެވެ. ޔުނައިޓެޑް ހިމެނުނު ގްރޫޕުން އެޓީމް ފަހަތަށް ޖައްސާލުމަށްފަހު ރެއާލް ސޮއިއެޑާޑް އެއްވަނަ ހޯދީ ޕޮއިންޓްގެ ގޮތުން އެއްވަރުވެ, އެގްރިގޭޓުންނެވެ. މެންޗެސްޓަރ ޔުނައިޓެޑްގެ ކުރީގެ ކޯޗު މޮރީނިއޯގެ ރޯމާ ޕްލޭއޮފްގައި ވާދަކުރަން ޖެހޭނީ އެފްސީ ސަލްޒްބާގާއެވެ. އިޓަލީގެ ޔުވެންޓަސް ވާދަކުރަން ޖެހުނީ ނަންޓްސްއާއެވެ. ހަ ފަހަރު ޔޫރޮޕާ ލީގު ކާމިޔާބުކޮށްފައިވާ ސެވިއްޔާ ވާދަކުރަން ޖެހެނީ ޕީއެސްވީ އެއިންދޯވްއާއެވެ. ބަޔާ ލެވަކޫސަން ވާދަކުރާނީ މޮނާކޯއާއެވެ.
ޔޫރޮޕާ ލީގުގެ ގްރޫޕް ސްޓޭޖައި ދެވަނަ ހޯދި 8 ޓީމްވެސް ވާދަކުރަން ޖެހޭނީ ޕްލޭއޮފްގައެވެ. އެޓީމްތައް ޕްލޭއޮފްގައި ވާދަކުރަން ޖެހޭނީ ޗެމްޕިއަންސް ލީގު ގްރޫޕް ސްޓޭޖްގައި ތިންވަނައަށް ދިޔަ ޓީމްތަކާއެވެ.
ޕްލޭއޮފްގެ ފުރަތަމަ ލެގު ކުޅޭނީ އަންނަ އަހަރުގެ ފެބްރުއަރީ މަހުގެ 16 ވަނަ ދުވަހުއެވެ. ދެވަނަ ލެގު ކުޅޭނީ އެމަހުގެ 23 ވަނަ ދުވަހުއެވެ. ދެ ލެގުން ކުރި ހޯދާ ޓީމްތަކަށް ޔޫރޮޕާ ލީގުގެ ދެވަނަ ބުރުން ޖާގަ ލިބޭނެއެވެ.
