ރެއާލްއާއި ލިވަޕޫލް، ޕީއެސްޖީ ވާދަކުރަން ޖެހުނީ ބަޔާންއާ

ޗެމްޕިއަންސް ލީގު ދެވަނަ ބުރުގައި ޗެމްޕިއަން ރެއާލް މެޑްރިޑާއި, ލިވަޕޫލް އަދި ޕީއެސްޖީއަށް ބަޔާން މިއުނިކާ ވާދަކުރަން ޖެހިއްޖެއެވެ.

މިދިޔަ ސީޒަންގައި ރެއާލް މެޑްރިޑުން ޗެމްޕިއަންސް ލީގުގެ ތަށި އުފުލާލީ ފައިނަލްގައި ލިވަޕޫލް ބަލިކޮށްފައެވެ. މިފަހަރު ދެޓީމަށް ވާދަކުރަން ޖެހެނީ ގަދަ 16 ޓީމްގެ ބުރުގައެވެ. މިދިޔަ ސީޒަންގެ ފައިނަލްގައި ރެއާލްއިން ލިވަޕޫލް ބަލިކުރީ 1-0 ނެވެ. ފައިނަލްގެ މެޗުގެ ހަމައެކަނި ލަނޑު 59 ވަނަ މިނިޓްގައި ޖެހީ ބްރެޒިލްގެ ވިނީޝިއުސް ޖޫނިއަރއެވެ.

މުބާރާތުގެ ތަށި ހޯދަން އެންމެ ބޮޑަށް މަސައްކަތް ކުރަމުން އަންނަ ދެޓީމްގެ ތެރެއިން ޕީއެސްޖީއަށްވެސް ދެވަނަ ބުރުގައި އޮތީ އުނދަގޫ މެޗެކެވެ. ޕީއެސްޖީ ވާދަކުރަން ޖެހެނީ ޖަރުމަނުގެ ޗެމްޕިއަން ބަޔާން މިއުނިކާއެވެ. އިނގިރޭސި ޗެމްޕިއަން މެންޗެސްޓަރ ސިޓީ ދެވަނަ ބުރުގައި ވާދަކުރަން ޖެހެނީ ޖަރުމަނުގެ އާރުބީ ލައިޕްޒިގްއާއެވެ. ޓޮޓެންހަމް ވާދަކުރަން ޖެހެނީ އިޓަލީގެ އޭސީ މިލާންއާއެވެ. ޗެލްސީއަށް ލައްވާނީ ޖަރުމަނުގެ ބޮރޫޝިޔާ ޑޯޓްމަންޑެވެ. ކްލަބް ބުރީޖް ވާދަކުރާނީ ބެންފީކާއާއެވެ. ފްރޭންކްފާޓް ވާދަކުރާނީ ނަޕޯލީއާއެވެ.

ދެވަނަ ބުރުގެ ފުރަތަމަ ލެގުގެ މެޗުތައް ކުޅޭނީ އަންނަ އަހަރުގެ ފެބްރުއަރީ މަހުގެ 14-15 އަދި 21-22 ގައެވެ. ދެވަނަ ލެގުގެ މެޗުތައް ކުޅޭނީ މާރޗް މަހުގެ 7-8 އަދި 14-15 ގައެވެ.

ޗެމްޕިއަން ރެއާލް މެޑްރިޑަކީ 14 ފަހަރު މުބާރާތް ކާމިޔާބުކޮށްފައިވާ ޓީމެވެ. މިދިޔަ ހަ ސީޒަންގެ ތެރެއިން ހަތަރު ސީޒަންގައި ރެއާލްއަށް ވަނި ލިވަޕޫލާ ވާދަކުރަން ޖެހިފައެވެ. މިއީ ހަތަރުވަނަ ފަހަރެވެ. މީގެތެރެއިން ދެފަހަރު ވާދަކުރަން ޖެހުނީ ފައިނަލްގައެވެ. ފައިނަލްގައި ވާދަކުރި ދެފަހަރުވެސް ކާމިޔާބު ހޯދީ ރެއާލް މެޑްރިޑެވެ.