ސޫރިޔާގެ ރެފިއުޖީ، ލުބްނާންގެ ކާރިޘީ އަނދަވަޅުން ހޯދީ ޚަޒާނާއެއް!

1975 އިން 1990 އަށް ވަރުގަދަ ދާޚިލީ ހަނގުރާމައެއް ކުރި ލުބްނުން މިއަދު ގުނަން ފަށާފައި ވަނީ މާލީ ހީނަރު ކަމުގެ ކާރިޘީ 4 ވަނަ އަހަރުގެ ދުވަސްތަކެވެ. އިޤްތިޞާދީ އަދި މާލީ ހީނަރުކަމުގެ އިތުރުން ސިޔާސީ ހަމަނުޖެހުންތަކާއެކު އާންމު ދިރިއުޅުމުގެ މައިދާނުގައި ބޮޑެތި ގޮންޖެހުންތަކެއް ގިރާ ކުރަން ޖެހިފައިވާ ލުބްނާންގެ ރައްޔިތުންނާއި އެ ޤައުމުގައި ވަޒަންވެރިވެފައިވާ އެހެން ޤައުމުތަކުގެ މީހުންވެސް މިއަދު ދަނީ އަދުގެ ހާލަތަށް އަހުލުވެރިވުމަށް މަސައްކަތްތަކެއްކޮށް، ޤުރުބާނީތަކެއް ވަމުންނެވެ.

ސަރުކާރުން ނުވަތަ ދަޢުލަތުގެ ކަމާ ބެހޭ ފަރާތްތަކުގެ މައްޗަށް ޒިންމާ ދޫކޮށްލައިގެން ނުތިބެ، ލުބްނާންގައި ދިރިއުޅޭ އާންމުން ދަނީ، ދިރިއުޅުމުގެ ޚަރަދުތައް ދެކޮޅު ޖެއްސުމަށް ފަރުދީ ފެންވަރުގައި އިޤްތިޞާދު ކުރެވޭތޯ ބަލަމުންނެވެ. އެފަދަ އެއް މިސާލު ފެނިގެންދަނީ ލުބްނާންގެ ވެރިރަށް ބެއިރޫތުގެ މަޝްހޫރު ބާޒާރަކުންނެވެ. އެތަނުން މިއަދު މުޅިންހެންވެސް ލިބެން ހުރީ، މީގެ ކުރިން ބަޔަކު ބޭނުން ކޮށްފައި ހުރި، އަދި ދެވަނަ ބަޔަކަށް އަލުން އެ ބޭނުން ކުރެވޭ ފަދަ ސަމާނުތަކެވެ.

ކާރޫބާރު ބޮޑު ޞަބްރާ ބާޒާރުގައި ކުޑަ ފިހާރައެއް ހިންގާ އެކަކީ ހުސައިން އަޙްމަދުއެވެ. އެކި ކަހަލަ އަންނައުނާއި، ބޫޓާއި، ކަރަންޓު ސަމާނާއި ގެވެހި ކަންވާރުތަކުގެ އިތުރުން ކުޅިވަރު މުބާރާތްތަކުން ލިބިފައިވާ މެޑަލްތައްވެސް ވިއްކަން ހުރި އެ ފިހާރައިން ފެންނަ ތަކެއްޗަކީ، މީގެ ކުރިން ބަޔަކު ބޭނުން ކޮށްފައި ވާ ސާމާނެވެ. އަތްމަތި ދަތިވެ، ދިރިއުޅުމުގެ މައިދާން ތަކުލީފަކަށް ވުމުން، ތަސައްލީއެއް ހޯދުމަށް ވިއްކާލާފައިވާ ސަމާނެވެ.

އިރެއްގައި އިންޖިނޭރުކަން ކިޔަވަމުން ދިޔަ އަޙުމަދަކީ، ސޫރިޔާގެ ޙަލަބުން ލުބްނާނަށް ހިޖުރަ ކުރި ޒުވާނެކެވެ. އުޖާލާ ދިރިއުޅުމެއްގެ ފޮނި ޢުއްމީދުތަކާއެކު ލުބްނާނަށް ދިޔަ ޒުވާނެކެވެ. ލުބްނާނަށް ދިރިއުޅުން ބަދަލު ކުރުމަށް ފަހު އޭނާ މަސައްކަތް ކުރަމުން ދިޔައީ ކޮންސްޓްރަކްޝަންއާއި އާބާތުރަ ފިލުވުމުގެ ދާއިރާގައެވެ. އަދި ވިލާތުގައި އުފައްދާ ފޭރާންތައް ވިއްކުމުގެ މަސައްކަތްވެސް ކުރިއެވެ. ނަމަވެސް އިޤްތިޞާދީ ކާރިޘީ އޮއެވަރު ގަދަވާން ފެށުމުން، ފެހުމާއި އެމްބްރޮއިޑަރީގެ މަސައްކަތް ދަސްކޮށް، އެކި ކަހަލަ އަންނައުނާއި، ބޫޓު އަދި ސްކޫލު ދަބަސް ފަދަ ތަކެތި މަރާމާތު ކުރަން ދަސްކުރިއެވެ.

އިޤްތިޞާދީ ކާރިޘާއާއެކު، ލުބްނާންގައި މުދާ ގަތުމަށް އޮންނަ ޑިމާންޑް ވަރަށް ބޮޑަށް ދަށަށް ދިޔައެވެ. ލުބްނާން ފައިސާގެ އަގު، އިންތިހާއަށް ދަށަށް ދިއުމާއެކު އާންމުންގެ ގިނަ ބަޔަކަށް މަޖުބޫރު ވީ ފަރުނީޗަރާއި ކަރަންޓު ސަމާނުތައް ވިއްކާލުމަށެވެ.

އަޙުމަދުގެ ފިހާރައަށް އެފަދަ ސަމާނުތައް ވިއްކާލުމުން، ހަލާކުވެފައި ހުރި އެއްޗެއް ވިއްޔާ އޭނާ އެ މަރާމާތު ކުރެއެވެ. އަދި ސެކަންޑް-ހޭންޑް އުފެއްދުންތަކެއްގެ ގޮތުގައި، ހެޔޮ އަގެއްގައި އޭނާ އެ ވިއްކާލައެވެ.

އަޙުމަދުގެ ފިހާރައަށް، ފުރިޖަކާ ދޮންނަ މެޝިނެއް ވިއްކާލަން އައި އަންހެނަކު ބުނި ގޮތުގައި، އޭނާ މިހާރުވެސް ވަނީ އޭނާގެ ގޭގައި ހުރި ޓީވީއާއި އެނޫންވެސް އެފަދަ ސަމާނުތައް ވިއްކާލާފައެވެ. އެކަން އޭނާ ކުރީ، ދަރިންގެ ސްކޫލް ފީ ދެއްކުމަށް މަޖުބޫރު ވެގެން ކަމަށްވެސް، ވީޑިއޯ ނުކުރުމަށް އެދި ރޮއިޓަރޒްއާ ވާހަކަ ދެއްކި، އެ އަންހެން މީހާ ބުނެފައިވެއެވެ.

ކާމިޔާބު ވިޔަފާރިވެރިއަކަށް ވުމުގެ ފޮނި ހުވަފެންތައް ދެކެމުން ދިޔަ އަޙުމަދަކީ މިހާރު، ހަފުތާއަކު 7 ދުވަހު، އެންމެ ޗުއްޓީއެއްވެސް ނުނަގާ، ގަދަ ހިތްވަރާއެކު މަސައްކަތް ކުރަމުން ދާ ޒުވާނެކެވެ. އަމިއްލަ ދިރިއުޅުން ކޮޅަށް ޖަހާ، އާރާސްތު ކުރުމުގެ ޒިންމާ، އަމިއްލައަށް އުފުލައިގެން ހުރި ހިތްވަރުގަދަ ފަހުލަވާނެކެވެ.

ލުބްނާންގެ މާލީ ކާރިޘާއަށް 3 އަހަރު ވެގެން ދިޔައިރު، އެ ޤައުމުގެ ފައިސާގެ އަގު، 90 ޕަސެންޓަށް ވުރެ ބޮޑަށް ވެއްޓި، އިންތިހާ ފަޤީރުކަން ފެތުރި، މާލީ ނިޒާމުގެ ވާގި ނެތިއްޖެއެވެ.

މިއަދު އެ ޤައުމުން ތަޖުރިބާ ކުރަމުން ދާ ތަކުލީފުތަކަކީ، ދާޚިލީ ހަނގުރާމައިގެ ދުވަސްވަރަށް ފަހު އެ ޤައުމަށް ކުރިމަތިލާން ޖެހުނު އެންމެ ގެއްލުން ދެނިވި ތަކުލީފުތަކެވެ.