އާޓެޓާގެ ތާރީޚީ މެޗުގައި ޗެލްސީ ބަލިކޮށް އާސެނަލް އަލުން އެއްވަނައަށް!

އާސެނަލްގެ ކޯޗުގެ ގޮތުގައި އާޓެޓާ ނުކުތް ތާރީޚީ މެޗުގައި ޗެލްސީ ބަލިކޮށް, ޕްރިމިއަރ ލީގު ތާވަލްގެ އެއްވަނައަށް އަލުން ޓީމް ގެންގޮސްދީފިއެވެ.

ޗެލްސީ އަތުން 1-0ން މޮޅުވި މެޗަކީ އާސެނަލްގެ ކޯޗުކަމުގައި އާޓެޓާ ނުކުތް 150 ވަނަ މެޗެވެ. އާޓެޓާ ވަނީ ކުޅުންތެރިއެއްގެ ގޮތުގައިވެސް އާސެނަލްއަށް 150 މެޗު ކުޅެފައެވެ. އެހެންކަމުން މި މެޗު ވީ ތާރީޚީ މެޗަކަށެވެ. މެޗުން މޮޅުވުމުން އާސެނަލް ވަނީ އަލުން ތާވަލްގެ އެއްވަނައަށް ޖެހިލާފައެވެ. އެއީ 13 މެޗުން 34 ޕޮއިންޓާއެކުއެވެ. މެންޗެސްޓަރ ސިޓީ ދެވަނާގައި އޮތީ 13 މެޗުން 32 ޕޮއިންޓާއެކުއެވެ. މެޗުން އާސެނަލް މޮޅުކޮށްދިން ލަނޑު 63 ވަނަ މިނިޓްގައި ޖެހީ ގަބްރިއެލް މާޓިނޭލީއެވެ.

މިއީ އާސެނަލްގެ ކުރީގެ ކެޕްޓަން އޮބަމަޔަން އެ ކްލަބް ދޫކޮށްލިފަހުން އެޓީމާ ދެކޮޅަށް ނުކުތް ފުރަތަމަ މެޗެވެ. އާސެނަލް ދޫކޮށް ބާސާއަށް ބަދަލުވުމަށްފަހު މިސީޒަންގައި އެނބުރި ޕްރިމިއަރ ލީގަށް ބަދަލުވީ ޗެލްސީއަށެވެ. މިމޮޅާއެކު އާސެނަލްއިން އެމީހުންގެ ރަނގަޅު ފޯމް އަންނަނީ ދަމަހައްޓަމުންނެވެ. އެއްވަނާގައި އޮތީ ދެ ޕޮއިންޓްގެ ލީޑަކާއެކުއެވެ.