އިހުގެ ފިލްމީ މަންޒަރެއް ހަމަ ލޮލަށް

ޕެނީ ފާދިންގްއޭ ބުނުމުން އެއީ ކޮން އެއްޗެއްކަން މާ ފަސޭހައިން ފަޙުމްވާ މީހުން މަދުވުމަކީ، ފަހަރުގައި އެކަށީގެންވާ ކަމެކެވެ. ނަމަވެސް އެއީ ކުރީ ފުރޮޅު އުސްކޮށް އަދި އިންތިހާ ބޮޑުކޮށް ހުންނަ ބައިސްކަލެކޭ ބުނުމުން އިތުރު ތަޢާރަފަކަށް ބޭނުން ނުވާނެކަން ޤައިމެވެ. ވަކިން ހާއްސަކޮށް، އެންމެ އިހުގެ ފިލްމުތައް ބަލާ މީހުންނަށް، ޕެނީ ފާދިންގް ބައިސްކަލުގެ އިތުރު ތަޢާރަފަކަށް ބޭނުމެއް ނުވާނެއެވެ.

ޘަޤާފަތާއީ ތާރީޚީ އާދަތައް ދިރުވުމުގެ އާ އޮއެވަރެއްގައި ޖެހިފައި ވާ އަދުގެ ދުނިޔޭގައި، ޕެނީ ފާދިންގް ބައިސްކަލުގެ އެނބުރިއައުންވެސް ދޭތެރެ ދޭތެރެއިން ފެނެއެވެ. މިއީވެސް އެކަހަލަ ކަމެކެވެ.

ޕްރާގްގެ ޕާކެއްގެ ތެރެއިން ނޮވެމްބަރު 5 ވަނަ ދުވަހު ފެނިގެން ދިޔަ މަންޒަރަކީ، ގިނަ ޢަދަދެއްގެ ބަޔަކު، ޕެނީ ފާދިންގް ބައިސްކަލު ދުއްވަމުން ދިޔަ މަންޒަރެވެ. ގިނަ ބަޔަކު، އެ މަންޒަރު ބަލަންވެސް ޖަމާވެ ތިއްބެވެ. ޕެނީ ފާދިންގް ނުވަތަ ބޮޑު ފުރޮޅު ބައިސްކަލު ދުއްވަމުން ދިޔަ މީހުން އެކަން ކުރަމުން ދިޔައީ ޖާނާއި މާލުން އެކަމަށް ޤުރުބާން ވަމުންނޭވެސް ދެންނެވިދާނެއެވެ. އަޅައިގެން ތިބި ހެދުން، އެކަމުގެ ހެއްކަކަށް ފުދެއެވެ.

ޕާކުގައި ޖަހާފައި ހުރި ރާގަށް ބުރު ހަމަވާ ގޮތަށް ފަރި ބަނޑިތައް ލައްވަމުން އެއްބަޔަކު ބައިސްކަލު ދުއްވަމުން ދިޔައިރު، އަނެއް ބަޔަކު ދިޔައީ އެކި ރޭސްތަކުގައި ބައިވެރިވަމުންނެވެ. ރޭހަކީ އެންމެ އަވަހަށް ނިންމޭ މީހާ ހޮވާ އުސޫލުން ހިނގާ މުބާރާތަކަށް ވީ ނަމަވެސް، ޕެނީ ފާދިންގް މުބާރާތުގައި، ބެލަންސް ކޮށްގެން އެންމެ ލަހުން ދުއްވާ މީހާއަކީ މޮޅު ލިބޭ މީހާ ކަމަށް ބަލާ ރޭހެއްވެސް ޖަހައެވެ.

މުބާރާތް އިންތިޒާމް ކުރި 'ޗެކް ވެލޯސިޕީޑިސްޓް ކްލަބް'ގެ ވެބްސައިޓްގައި ބުނެފައި ވާ ގޮތުގައި، ދުނިޔޭގެ ތާރީޚުގައި ފުރަތަމަ ފަހަރަށް ބައިސްކަލް ރޭހެއް ބާއްވާފައި ވަނީވެސް އަދުގެ ޗެކް ރިޕަބްލިކްގައެވެ. އެއީ މީލާދީން 1868 ވަނަ އަހަރުގެ ތެރޭގައި ކަމަށްވެއެވެ.

އެއް ފުރޮޅަށްވުރެ އަނެއް ފުރޮޅު އިންތިހާ ބޮޑުކޮށް ހުންނަހެން ފަރުމާކޮށްފައިވާ ޕެނީ ފާދިންގް ބައިސްކަލު އުފައްދާފައި ވަނީ 1870ގެ އަހަރުތަކާ ހިސާބުގައެވެ. އަދި 1880ގެ އަހަރުތަކުގައި، ދެފުރޮޅުގެ ސައިޒް އެއްވަރު އަދި ޗޭނު ލީ ބައިސްކަލުތައް ތަޢާރަފުވުމާ ހަމައަށް، ޕެނީ ފާދިންގްއަކީ އިންތިހާއަށް މަޤުބޫލު އުޅަނދެއްވެސްމެއެވެ. މިހާރު މި ފެންނަ ގިނަ ބައިސްކަލުތައް ފަރުމާކޮށްފައި ހުންނަނީ 1880ގެ އަހަރުތަކުގެ ތެރޭގައި ފަރުމާ ކުރި ބައިސްކަލާ އެއްގޮތަށެވެ.

ޕެނީ ފާދިންގްއަށް އެފަދައިން ކިޔާ އުޅުނީ، އިނގިރޭސި ފައިސާ ފޮތީގެ ގޮތުގައި ބޭނުން ކުރާ ޕެނީއާއި ފާދިންގްއަށް ރިޢާޔަތް ކޮށެވެ. ސައިޒުގެ ގޮތުން ބަލާއިރު، ފާދިންގް ފައިސާ ފޮއްޗަށްވުރެ، ޕެނީ ފައިސާ ފޮތި ބޮޑުވާނެއެވެ. މި ކަހަލަ ބައިސްކަލަށް، ބައެއް މީހުން ވެލޯސިޕީޑްއޭވެސް ކިއާ އުޅެއެވެ. ނަމަވެސް ޕެނީ ފާދިންގްއަކީ، ވެލޯސިޕީޑްއަށްވުރެވެސް އުސް ބައިސްކަލެކެވެ.