ސީރިއާގެ ރެފިއުޖީ ކޭމްޕުތަކުގައި ދިރިއުޅޭ އާއިލާތައް ބޭނުންކޮށްގެން ޓިކްޓޮކުން ނާޖާއިޒު ފައިދާ ނަގަނީ؟

ދުނިޔޭގައި އެންމެ ހަލުއިކަމާއެކު މަގުބޫލުވަމުން އަންނަ އެއް ސޯޝަލް މީޑިއާ އެޕްލިކޭޝަން ކަމަށްވާ ޓިކްޓޮކް، 2017 ވަނަ އަހަރު ވުޖޫދުވިފަހުން މިހާތަނަށް މިވަނީ 6.2 ބިލިއަން އެމެރިކާ ޑޮލަރުގެ އާމްދަނީ ހޯދާފައެވެ.

ޓިކްޓޮކަށް އާމްދަނީ ލިބޭ އެކި ވަސީލަތްތަކުގެ ތެރޭގައި މިހާރު މިވަނީ އެތައް މިލިއަން ފަގީރުންނެއްގެ އާދޭހާއި ކެކުޅުންވެސް ހިމެނިފައެވެ. މިއީ ތެދެކެވެ.

ސީރިއާފަދަ އިންސާނީ ކާރިސާތައް ކުރިމަތިވެފައިވާ ގައުމުތަކުގައި ދިރިއުޅޭ ބައެއް ރައްޔިތުން މިވަނީ ޓިކްޓޮކްގެ ލައިވް މެދުވެރިކޮށް އެ މީހުންގެ ހާލަތު ބަޔާންކޮށްދީ އެހީވުމަށް އާދޭސްކުރަންފަށާފައެވެ. އެގޮތުގެ މަތިން އެކި ފަރާތްތަކުން އެހީ ފޯރުކޮށްދޭއިރު، އެގޮތުން ލިބޭ ފައިސާގެ ވަކި ނިސްބަތެއް ޓިކްޓޮކަށްވެސް ލިބިގެންދެއެވެ. ބީބީސީގައި ރިޕޯޓުކޮށްފައިވާގޮތުން އެފަދަ އާއިލާތަކަށް ލިބޭ ފައިސާގެ ބޮޑު ނިސްބަތެއް ލިބެނީވެސް ޓިކްޓޮކަށެވެ.

ބީބީސީން ބުނާގޮތުގައި ސީރިއާގެ ކޭމްޕުތަކުގައި ވިއްސިވިހާލިވެފައިވާ ރައްޔިތުން ޓިކްޓޮކް ލައިވް މެދުވެރިކޮށް ސަލާން ޖަހައިގެން ހޯދާ ޑޯނޭޝަން ފައިސާގެ 70 އިންސައްތަ ޓިކްޓޮކް ހިންގާ ކުންފުނިން ނަގައެވެ.

އެފަދަ ބައެއް ވީޑިއޯތައް ދޭތެރެދޭތެރެއިން ފެންނައިރު، އާންމު ގޮތެއްގައި އެފަދަ ވީޑިއޯތަކުގައި ފެންނަނީވެސް ހާލުގައިޖެހިފައިވާ ކުޑަކުދިންނާއި އެކުދިންގެ އާއިލާތަކެވެ. އެގޮތުން އެތައް ގަޑިއިރެއް ވަންދެން ލައިވްސްޓްރީމް މެދުވެރިކޮށް އެ ފަރާތްތަކުން އާދޭސްކުރެއެވެ. ބައެއް ލައިވްސްޓްރީމްތަކުގައި، އާއިލާއަކަށް ގަޑިއިރަކު 1000 އެމެރިކާ ޑޮލަރު ލިބުނުނަމަވެސް، އެ ފައިސާގެ ތެރެއިން އާއިލާއަށް ލިބިގެންދަނީ މަދު ނިސްބަތެކެވެ. އެކި ފީތަކުގެ ނަމުގައި އޭގެ ބޮޑު ނިސްބަތެއް ނަގަނީ ކުންފުނިންނެވެ.

އެހެންނަމަވެސް ޓިކްޓޮކުން ވަނީ އެ ތުހުމަތުތައް ދޮގުކޮށްފައެވެ. އެގޮތުން ކުންފުނިން ބުނާގޮތުގައި، މަކަރާއި ހީލަތުން ފައިސާ ހޯދާ މައްސަލަތައް އެ ކުންފުނިން ހަރުކަށިކަމާއެކު ބަލާނެއެވެ. މަކަރާއި ހީލަތް އެކުލެވޭ ބާވަތްތަކުގެ ކޮންޓެންޓްތަކަކީ ޓިކްޓޮކް ޕްލެޓްފޯމުގައި ހުއްދަ ކޮންޓެންޓްތަކެއްވެސް ނޫންކަމަށް ކުންފުނިން ބުނެއެވެ.

ލައިވްސްޓްރީމް މެދުވެރިކޮށް ބެލުންތެރިންނަށް އެ އާއިލާތަކަށް "ވަރޗުއަލް ގިފްޓް" ފޮނުވެއެވެ. އެފަދަ ގިފްޓްތައް ފޮނުވުމަށް ބެލުންތެރިންގެ އަތުން ވަކި އަދަދެއްގެ ފައިސާ ޚަރަދުވެއެވެ. އެގޮތުން އެ ގިފްޓުތައް ފައިސާގެ ގޮތުގައި އާއިލާތަކަށް ޓިކްޓޮކް މެދުވެރިކޮށް ނެގެން އޮވެއެވެ. އެހެންނަމަވެސް، އޭގެ ތެރެއިން އާއިލާތަކަށް ލިބެނީ ލައިވްސްޓްރީމް މެދުވެރިކޮށް ލިބެންޖެހޭ ހަގީގީ އަދަދަށްވުރެ މަދު އަދަދެއްކަމަަށް ބައެއް އާއިލާތަކާ ހަވާލާދީ ބީބީސީގައި ރިޕޯޓުކޮށްފައިވެއެވެ.

ސީރިއާގެ ހުޅަނގު އުތުރުގައި ގާއިމުކޮށްފައިވާ ކޭމްޕުތަކުގައި ދިރިއުޅޭ މީހުންނާ ހަވާލާދީ ބީބީސީގައި ރިޕޯޓުކޮށްފައިވާގޮތުގައި، އެމީހުންނަށް ޓިކްޓޮކް މެދުވެރިކޮށް ލައިވްސްޓްރީމްކުރުމަށް ބޭނުންވާ އާލަތްތައް ހަމަޖައްސައިދިނީ އެކަމަށް ޚާއްސަކޮށް މެދުވެރިއެއްގެގޮތުގައި ހަރަކާތްތެރިވާ ވަކި ބައެކެވެ.

އެމީހުން ބުނާގޮތުގައި މެދުވެރިއެއްގެ ގޮތުގައި ހަރަކާތްތެރިވާ ފަރާތްތަކަކީ ޗައިނާއާއި މެދުއިރުމަތީގެ ޓިކްޓޮކް ހިންގާ އިސް ކުންފުނިތަކާ ގުޅުން އޮންނަ ފަރާތްތަކެވެ. އެގޮތުން މެދުވެރިންގެ މަސްއޫލިއްޔަތަކަށްވެފައި އޮންނަނީ ޓިކްޓޮކް މެދުވެރިކޮށް ލައިވްސްޓްރީމް ކުރާނެ އޯޑިއަންސްތައް ބޮޑުކުރުމެވެ.

އެގޮތުގެ މަތިން އެތައް އާއިލާތަކަކުން ޓިކްޓޮކްގައި ސަލާންޖަހަމުން ދިޔަނަމަވެސް، އޭގެ ހަގީގީ މަންފާ މި ލިބެނީ ވަކި ބަޔަކަށްކަމުގެ ތުހުމަތު މިވަނީ ބޮޑުވެފައެވެ. ވަކިން ޚާއްސަކޮށް، ވަރޗުއަލް ގިފްޓްތައް މެދުވެރިކޮށް ހޯދާ އާމްދަނީގެ އަދަދުތައް ޓިކްޓޮކުން ހާމަނުކުރާތީވެސް އެ ތުހުމަތުތަކުގެ އަޑު ވަކިން މިވަނީ ގަދަވެފައެވެ.