ސައްތަ އިން ސައްތަ ރެކޯޑާއެކު ވެލެންސިއާ އިން ޔޫތު ލީގު ކާމިޔާބުކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ 14 އަހަރުން ދަށުގެ ޔޫތު ލީގު ޗެމްޕިއަންކަން ކުލަބް ވެލެންސިއާ އިން ހޯދައިފިއެވެ.

ވެލެންސިއާ އިން ލީގު ކާމިޔާބުކުރީ ފަހު މެޗުގައި ހުކުރު ދުވަހުގެ ރޭ މާޒިޔާ ސްޕޯޓްސް އެންޑް ރެކްރިއޭޝަންގެ މައްޗަށް 4-0 އިން ކުރި ހޯދައިގެންނެވެ. މާޒިޔާ އަށް ލީގު ޗެމްޕިއަންކަން ލިބެން އޮތީ ފަހު މެޗުގައި ވެލެންސިއާ ބަލިކޮށްގެންނެވެ.

މެޗުގައި ވެލެންސިއާގެ ހަތަރު ލަނޑު ވެސް ފެނުނީ ދެ ވަނަ ހާފުގައެވެ. ވެލެންސިއާ އަށް ލީޑު ނަގައިދިނީ އީތަން އިބްރާހިމް ޒަކީއެވެ. ވެލެންސިއާ އަށް ލީޑު ފުޅާކޮށްދިނީ އަޙުމަދު ކައިންއެވެ. ވެލެންސިއާގެ ތިން ވަނަ ލަނޑު އިލާން އިމްރާން ޖެހިއިރު، ފަހު ލަނޑު ޖެހީ އީތަންއެވެ.

ލީގު ޗެމްޕިއަންކަން ވެލެންސިއާ އިން ހޯދީ ކުޅުނު އަށް މެޗުން 24 ޕޮއިންޓާއެކުއެވެ. މާޒިޔާ އާއި ސުޕަ ޔުނައިޓެޑް ސްޕޯޓްސް (ސަސް) އަށް ލިބެނީ 19 ޕޮއިންޓެވެ. ނަމަވެސް ލަނޑުގެ ތަފާތުން ކުރި ހޯދީ ސަސްއެވެ. ލީގުގެ ހަތަރު ވަނަ އަށް ދިޔައީ 13 ޕޮއިންޓާއެކު އެޑްވެންޗާސް ފުޓުބޯޅަ އެކަޑަމީއެވެ. ފަސް ވަނައިގައި އެމްއެސް މޭޓްސް އަށް ލިބެނީ 10 ޕޮއިންޓެވެ. ނުވަ ޕޮއިންޓާއެކު ހަ ވަނައިގައި ފްރެންޑްސް އެންޑް ފެމިލީ ފުޓުބޯޅަ އޮތް އިރު، ހަތް ވަނައިގައި އޮތް ބީޖީ ސްޕޯޓްސް އަށް ވެސް ލިބެނީ ނުވަ ޕޮއިންޓެވެ. އަށް ވަނަ އަށް ދިޔަ ހުޅުމާލޭ ޔޫތް ސްޕޯޓްސް އާއި ނުވަ ވަނަ އަށް ދިޔަ ދަ ގްރާންޑޭ ސްޕޯޓްސް އަށް ލިބެނީ އެއް ޕޮއިންޓެވެ.

މުބާރާތުގެ އެންމެ މޮޅު 11 ކުޅުންތެރިންނަކީ ޗެމްޕިއަން ވެލެންސިއާގެ އީތަން، އިލާން، ކައިން، ޔޫސުފް އަޔާން އާމިރު، އަޙުމަދު މިފްޒާލް، މާޒިޔާގެ ލޫތް ބިން ސައުތު، މުޙައްމަދު ލާމިހު އިމްތިޔާޒް، ސަސްގެ ޢަބްދުﷲ އައިދާން ސާޖިދު، އަލީ ހައިޒޫމް ޙަސަން، މުޙައްމަދު ޝަޔާން ޝިފާއުގެ އިތުރުން އެޑްވެންޗާސްގެ މުޙައްމަދު ޖައިޝް ޖައުދުއެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އަށް ދޭ ރަން ބޫޓު ލިބުނީ ވެލެންސިއާގެ އިލާންއަށެވެ. އިލާން ވަނީ އަށް މެޗުން 35 ލަނޑު ޖަހާފައެވެ. އެންމެ މޮޅު ކޯޗަކީ ވެލެންސިއާގެ ސޮބާހު މުޙައްމަދު (ސޮބާ)އެވެ.