"އަލަށް ލިބޭ ޗާގޮސް"، ސިޔާސީ ބޮޑު ނަފާވެރިކަމެއް

ޗާގޮސްގެ ވާހަކަތޯއެވެ؟ މިއޮތީ ވާ ވާހަކައެވެ. އިރެއްގާ ޗާގޯސް ނޫނީ އޭރުގެ ދިވެހިން ދަންނަ ނަމުން ނަމަ ފޯޅަވަހީގެ ވާހަކަ އަހަރުމެން ދިވެހިން އަހަމުން އައީ އިހު ދިވެހިންގެ ތެރެއިން ބަޔަކަށް ދޯނި ފަހަރުގައި ދަތުރުކުރި ކުރުމުގައި ދެވޭ ރަށްތަކެއްގެ ވާހަކައިގެ ގޮތުގައެވެ. ރާއްޖެ އާއި މާދުރު ނޫން ހިސާބެއްގައި އޮންނަ ފޯޅަވައްސަށް ދިޔަ ވާހަކަ އަކީ ސަޅިބާސާ ނޫނީ ޔޯލަ ވާހަކަތަކުގެ ތެރެއިން ދަތުރުވެރިންގެ ދޫދޫ މަތިން އިވި ފަރިތަ ވާހަކައެވެ. އެހެނަސް މިއަދު ދިވެހިން ޗާގޮސްގެ ވާހަކަދެއްކުން އިހުނަށް ވުރެ ފަރިތަވެއްޖެއެވެ.

ކުދިވެރިންނާއި އުމުރުން ދުވަސްވީ ރަށްވެހިންގެ ދުލުން ވެސް ޗާގޮސްގެ ވާހަކައެއް ނުފިލައެވެ. ހޮޅުއަށިތަކާއި ޖޯލިފަތިތަކުން ފެށިގެން ސައިހޮޓާތަކުގެ މޭޒުމަތީގައި ވެސް އެންމެ ފަރިތަ ވާހަކައަކީ ހަމަ ޗާގޮސްގެ ވާހަކައެވެ. ސިޔާސީ ވެރިންގެ ޕޯޑިއަމްތަކުން ފެށިގެން ސިޔާސީ ސައްލާ މޭޒުތަކުގައި ވެސް ދައްކަނީ ފޯޅަވަހީގެ ވާހަކައެވެ. ކޮންމެ މީހަކީ މި މައްސަލައިގައި ޚިޔާލެއް، އަމިއްލަ ފިކުރެއް އޮތް މީހެކެވެ. އެދުރުންނާއި ރޯނު އެދުރުންނެވެ.

ޗާގޮސް އަކީ ރާއްޖޭގެ ތަނެއްތޯ ނުވަތަ ނޫންތޯ ކުރެވޭ ބަހުސެވެ. ޗާގޮސް މައްސަލައިގައި އިހުމާލުވިތޯ އާއި ވެފައި ވާ ނަމަ އެ އިހުމާލުވި ބަޔަކީ ކޮބައިތޯ ކުރާ ސުވާލެވެ. ކޮންމެއަކަސް އެއްބަޔަކު ގަބޫލުކުރާ ގޮތުން ޗާގޮސް އަކީ ދިވެހިންގެ އިމުން އެއްކިބާވެފައިވާ ދިވެހިންގެ މިލްކެކެވެ. މިކަމަށް ހެކިދޭ ލިޔުމެއް ނޫނީ ބާރުދޭ ހެއްކެއް ނެތެވެ. އެހެންނަމަވެސް ބަހުސްގެ ބޭނުމަށްޓަކާ މިއީ މަޖާޒީ ގޮތުން ތެދެއް ކަަމަށް ބަލަމާތޯއެވެ؟ އެހެންކަމަށް ވާނަމަ ދިވެހިންނަށް އަލަށް ލިބޭ ޗާގޮސް އާއި އެކު ދިވެހިންނަށް ލިބޭނީ ކޯޗެއްތޯއެވެ؟ ދިވެހިންނަށް ލިބޭނީ ކޯއްޗެއްތޯއެވެ؟ ހަނދާނަށް އަންނަނީ ދާދިފަހުން ރައްޔިތުންގެ މަޖިލީހުގައި ކަށިދޫ ދާއިރާގެ މެމްބަރު އަބްދުﷲ ޖާބިރު ދެއްކެވި ވާހަކައެވެ.

ޖާބިރު އެ ވިދާޅުވަނީ ދޮގެއް ނޫނެވެ. ޗާގޮސް އަކީ ރާއްޖޭގެ ތަނަކަށް ވާނަމަ އެތާގައި ތިބެން ވާނީ މުސްލިމުންނެވެ. ރާއްޖޭގެ ޤާނޫނު އަސާސީ ބުނާގޮތުން ދިވެހިންނަކީ ސުންނީ މުސްލުމްނެނެވެ. ދިވެހިރައްޔިތަކަށް ވުމުގެ ސިފަ ފުރިހަމަ ވަނީ މުސްލިމަކަށް ވުމުންނެވެ. ދިވެހިންގެ ވެރިންނާއި އިސް މަޤާމުތަކަށް ކުރިމަތިލެވެނީ އެ ޝަރުތު ފުރިހަމަވެގެންނެވެ.

އެހެންވީމަ ދެން އުފެދޭ ސުވާލަކީ ޗާގޮސް އަކީ ރާއްޖޭގެ ސިޔާދަތީ ބާރު ހިނގާ ތަނެއް ކަމަށް ވާނަމަ، އަލަށް ލިބޭ ޗާގޮސްގެ ރައްޔިތުން އެންމެން އެއްފަހަރާ އިސްލާމްދީނަށް ވައްދާނީތޯއެވެ؟ އެހެނެއް ނުވާނެތާއެވެ. ޗާގޮސް އަކީ އަދި ދިވެހިންގެ ތަނަކަށް ވިއެއްކަމަކު އެތަނުން ރައްޔިތުން ފައްސާލާފައި އެތަނެއް ނުލިބޭނެއެވެ. ޗާގޮސް ބަލައިގަންނަނީ އެތަނުގެ ހަސަބާއި، ސިފަވަންތަކަމާއި އެކުގައި ކަމަށް ވާނަމަ ދެން އޮތީ އަދި މުޅިން ތަފާތު މައްސަލައެކެވެ.

އެ ހިސާބުން ދިވެހިންނަކީ އެއް ބަހަކުން ވާހަކަދައްކާ، އެއް ދީނެއްގެ، އެއް ނަސްލެއްގެ، އެއް ސަގާފަތެއްގެ ބައެއް ކަމަށް ބުނާ ބުނުން ނިމުމަކަށް އައީތާއެވެ. ދިވެހިންގެ ދިވެހި ވަންތަކަން ޒަމާނުއްސުރެ ސިފަކުރަމުން އައި ގޮތް ބަދަލުވީތާއެވެ.

ޗާގޮސް މައްސަލައިގައި ބަސްބުނާ މީހުން ދުވަހަކަށް ވުރެ ދުވަހެއް ގިނަ ވަމުން ދާއިރު ކުރީގެ ބަންޑާރަނައިބުންނާއި ކުރީގެ ހޯމް މިނިސްޓަރުން ވެސް ދަނީ މި މައްސަލައިގައި ޚާއްސަ ޝައުގުވެރިކަމެއް ބާއްވަމުންނެވެ. އެގޮތުން ފޯޅަވައްސަކީ ދިވެހިންގެ ތަނަކަށް ވެއްޖެ ނަމަ ސައްތައިން ސައްތަ މުސްލިމު ގައުމެއްގެ ގޮތުގައި ރާއްޖެ އޮތް އޮތުން ނިމުމަކަށް އަންނާނެ ކަމަށް ކުރީގެ ހޯމް މިނިސްޓަރުކަން ކުރެއްވި ބޭފުޅަކު ވަނީ ވިދާޅުވެފައެވެ. މީގެ އިތުރުން ޗާގޯސް އައިލެންޑްސްްއަކީ މޮރީޝަސްގެ ސިޔާދަތުގެ ބައެއް ކަމަށް ރާއްޖެއިން ތާއިދުކޮށް ނިންމާފައިވާ ނިންމުމަކީ ދައުލަތުގެ އެންމެ މަތީ މަސްލަހަތަކަށް ފަހިވާ ނިންމުމަކަށް ނުވާކަމަށާއި ނިންމުން އަނބުރާާ ގެންދިއުމަށް ކުރީގެ ދެ ބަންޑާރަ ނައިބުކަން ކުރެއްވި ދެކަނބަލަކު ވަނީ ގޮވާލައްވާފައެވެ.

ކަންމިހެން ހުރި އިރު ޗާގޮސް ރާއްޖެ އަށް ލިބޭ ނަމަ އެހިސާބުން ކަން ހިނގާނެ ގޮތަކާއި މެދު ލައްކަ ސުވާލުތައް އެބަހުއްޓެވެ. ޗާގޮސް ރާއްޖެ އަށް ލިބިއްޖެ ނަމަ ޗާގޮސްގެ ރައްޔިތުންނަށް ހަދާނީ ކިހިނެއްތޯއެވެ؟ އެ މީހުންނަށް އެތަން ދޫކޮށް ދާން އަންގާނީތޯއެވެ؟ ނޫނީ ގާނޫނޫ އަސާސީ ބަދަލުކުރާނީތޯއެވެ؟ ބަދަލު ނުކުރާނަމަ ދިވެހިންނަކީ ސައްތައިން ސައްތަ މުސްލިމުންގެ ގޮތުގައި އޮތް އޮތުން ދަމަހައްޓާނީ ކިހިނެތްތޯއެވެ؟

މިއިން އެއްވެސް ވާހަކައެއް ޗާގޮސް މައްސަލައިގައި ވާހަކަދައްކަވާ ބޭފުޅުން ނުދައްކަވައެވެ. އެކަމަކު މިއީ ޖާއިޒް ސުވާލުތަކަކަށް ނުވޭތޯއެވެ؟ ކޮންމެ އަކަސް ޗާގޮސްގެ ވާހަކަ އަކީ މިހާރު ފޫހިވެފައި ތިބި ބަޔަކަށް ދައްކާލަން ލިބުނު ޝައުގުވެރި ސިޔާސީ ވާހަކައަކަށް ވެއްޖެއެވެ. ސިޔާސީ މީހުން މި ވާހަކަ ދައްކަނީ އެ ބަޔަކު ބޭނުން ރަހައެއް ލައްވާލާ ފުށްގަނޑެއްގެން މޮޑެގެންނެވެ. އެއް ބަޔަކު ރިޔާސީ އިންތިޚާބަށް ވިއްކާ ވާހަކަ އަކަށް، އަނެއް ބަޔަކު ގަންނަ އެއްޗަކަށް ޖާގޮސްވެއްޖެއެވެ.

އެނގޭހާވެސް ކަމަކީ ޗާގޮސްގެ މައްސަލަ އާއި ދިވެހިންގެ ޖަޒުބާތުތަކާއި ގުޅުން އެބަ ހުރިކަމެވެ. އެހެންވީމަ ދިވެހިން ޖަޒުބާތުގައި ޖައްސާ ދިވެހިންނަށް އެ ވާހަކަ ވިއްކައިގެން ކުރި ލިބިދާނެ ކަަމަށް ހީވަނީ ތޯއްޗެވެ. ބުދަ ދުވަހު މަޖިލީހުގައި މެމްބަރު ޖާބިރު ވަނީ މިފަދަ މިސާލެއް ޖައްސަވާފައެވެ. އެއީ ބުދު ހެދި މީހާ ބުދު ނުވިކިގެން އެއީ ދީނެއް ކަަމަށް ދައްކާ އެ ވިއްކުމުގެ މަސައްކަތް ކުރި ވާހަކައެވެ. އެހެންވީމަ ޗާގޮސްގެ ވާހަކަ ދައްކާ މީހުން ޗާގޮސްގެ ނިވަލުގައި ތިމާމެންގެ ލޮނުމަޑުވެފައިވާ ސިޔާސީ ހަޔާތުގެ ރަހަމީރު ކުރެވިދާނެ ކަމަށް ދެކުން އެއީ އެންމެ ރަނގަޅު ގޮތްތޯއެވެ؟

ޗާގޮސް ހޯދަން މިވަރަކުން ފޫގަޅާ އިރު ބައެއް މީހުން ބުނެއެވެ. ޗާގޮސްގެ މައްޗަށް ސިޔާދަތީ ބާރު އޮންނަ ވާހަކަ އަށް ވުރެ މަލިކު އާއި ދިވެހިންނާއި ގުޅުމެއް އޮތް ކަމަށް ގަބޫލުކުރަން މާ ފަސޭހަވީހެވެ. އެހެނީ ހެދުން އެޅުމުގެ ވައްތަފާޅި އާއި އުޅުމާއި ބަސްމޮށުންތެރިކަމަށް ބެލިއަސް އެތަނުގައި ތިބި މީހުންގެ ދިވެހި ސިފަވަންތަކަން ބޮޑެވެ. އަދި ދީނާއި ސަގާފަތުގެ ގޮތުން ވެސް ދިވެހިންނާ ބޮޑަށް ދޯޅީ މަލިކު މީހުން ކަމަށްވާތީ އެވެ.