ގާޒީގެ ސައިކަލުގައި ރޯކޮށްލިކަމުގެ ތުހުމަތުގައި ހައްޔަރުކުރި މީހުންގެ ބަންދަށް 12 ދުވަސް!
ގާޒީގެ ސައިކަލް ރޯކޮށްލި މައްސަލައިގެ ތުހުމަތުގައި ހައްޔަރުކުރީ އުމުރުން 22 އަހަރާއި 30 އަހަރުގެ ދެ ފިރިހެނުން
ސައިކަލްގައި ރޯކޮށްލީ ގާޒީ ފަތިސްނަމާދަށް ހުންނަވަނިކޮށް -- ފޮޓޯ:ރާއްޖެ އެމްވީ
ގއ. ކަނޑުހުޅުދޫ ކޯޓުގެ ގާޒީ، ހަސަން ދީދީގެ ސައިކަލުގައި ރޯކޮށްލި މައްސަލާގެ ތުހްމަތުގައި ހައްޔަރުކުރި ދެ މީހުންގެ ބަންދަށް 12 ދުވަސް ކޯޓުން ޖަހައިފި އެވެ.
ފުލުހުން ބުނީ އެ މައްސަލައިގެ ތުހުމަތުގައި ހައްޔަރުކުރި އުމުރުން 22 އަހަރާއި 30 އަހަރުގެ ދެ ފިރިހެނުންގެ ބަންދުގެ މުއްދަތު އިތުރު ކުރީ ހުކުރު ދުވަހު ގެމަނަފުށީ މެޖިސްޓްރޭޓް ކޯޓަށް އެމީހުން ހާޒިރު ކުރުމުންނެވެ. އެ މީހުން ހައްޔަރުކޮށްފައިވަނީ ގާޒީއަށް އިންޒާރު ދީ، ޕެޓްރޯލް އަޅައި ސައިކަލުގައި ރޯކޮށްލި ކަމުގެ ތުހުމަތުގައެވެ.
މި ހާދިސާއާ ގުޅޭ ގޮތުން، އެރަށުގެ ރައްޔިތަކު ބުނީ، އެރަށު މެޖިސްޓްރޭޓް ކޯޓުގެ އިސް ގާޒީ ހަސަން ދީދީ، ފަތިސް ނަމާދަށް ހުންނަވަނިކޮށް ސައިކަލްގައި ރޯކޮށްލާފައިވާ އިރު، އެރަށުގެ ސްކޫލުގެ ލީޑިން ޓީޗަރެއްގެ ސައިކަލު ވެސް ރޯކޮށްލި ކަމަށެވެ. އެހެން ނަމަވެސް ޓީޗަރުގެ ސައިކަލަށް މާބޮޑު ގެއްލުންތަކެއް ނުވާ ކަމަށް ރަށުން ވާހަކަދެއްކި މީހާ ބުންޏެވެ.
މިކަމަކީ ރަށުގެ ރައްޔިތުންގެ މެދުގައި އުފެދިފައިވާ ސިޔާސީ ހިތްހަމަނުޖެހުންތަކެއްގެ ސަބަބުން ދިމާވި ކަމެއް ކަމަށް ބެލެވޭ ކަމަށް ގއ. ކަނޑުހުޅުދޫއިން ވާހަކަދެއްކި ފަރާތުން މައުލޫމާތުދީފައިވެއެވެ.
