ސަރުކާރާ އިދިކޮޅު ޕާޓީއެއްގެ ގޮތުގައި ހަރަކާތްތެރިވުމަށް އެމްއެންޕީން ނިންމައިފި
އިދިކޮޅު ޕާޓީއެއްގެ ގޮތުގައި އޮތުމަށް ގައުމީ ހިންގާ ކައުންސިލުގައި ތިއްބެވި ހުރިހާ ބޭފުޅުންގެ އިއްތިފާގުން ވަނީ ފާސްކޮށްފައި
އެމްއެންޕީގެ ޤައުމީ ހިންގާ ކައުންސިލްގެ ފުރަތަމަ ބައްދަލުވުމުގައި ޕާޓީގެ ރައީސް މުޙައްމަދު ނާޒިމް
މޯލްޑިވްސް ނޭޝަނަލް ޕާޓީ (އެމްއެންޕީ)ން ދެން ހަރަކާތްތެރިވާނީ ސަރުކާރު ޒިންމާދާރުކުރުވާ އިދިކޮޅު ޕާޓީއެއްގެ ގޮތުގައި ކަމަށް އެޕާޓީން ނިންމައިފިއެވެ.
އެމްއެންޕީގެ ޤައުމީ ހިންގާ ކައުންސިލްގެ ފުރަތަމަ ބައްދަލުވުން ވަނީ ބުދަ ދުވަހުގެ ރޭ ބާއްވާފައެވެ. އެބައްދަލުވުމުގައި އެޕާޓީގެ ޤައުމީ ހިންގާ ކައުންސިލްގެ 52 މެންބަރުން ވަނީ ބައިވެރިވެފައެވެ.
އެމްއެންޕީން ބުނީ ގައުމީ ހިންގާ ކައުންސިލްގެ ބައްދަލުވުމަށް ޕާޓީގެ ނާއިބު ރައީސް އަޙްމަދު ޝަރީފް ހުށަހަޅުއްވީ އެމްއެންޕީން އިދިކޮޅު ޕާޓީއެއްގެ ގޮތުގައި، ސަރުކާރު ޒިންމާދާރުކުރުވާ ޕާޓީގެއެއްގެ ގޮތުގައި އޮތުމަށެވެ. މިހުށަހެޅުމަށް ތާޢީދުކުރެއްވީ ނާއިބު ރައީސް ޙުސައިން އިސްމާޢީލެވެ. މިހުށަހެޅުމަށް ކުރެވުނު ބަހުސްގައި ގިނަ މެންބަރުން ފާހަގަކުރެއްވީ ރައްޔިތުންނަށް މަންފާހުރި ކަންކަމަށް ސަރުކާރުން އެންމެ އެކަށީގެންވާ އިޖާބަ ނުދޭކަމަށާއި، ރައްޔިތުންގެ ކަންބޮޑުވުންތަކަށް ޖަވާބުދާރީ ނުވާ ކަމުގައެވެ. އަދި ރައްޔިތުންގެ މަޖިލީހުގައި ރައްޔިތުންގެ ހައްގުގައި ކުރާ މަސައްކަތްތަކަށް އެއްބާރުލުން ވެސް ނުލިބޭކަމުގައެވެ. މި ހުށަހެޅުން ހާޒިރުވި ހުރިހާ މެންބަރުންގެ އިއްތިފާގުން ވަނީ ފާސްކޮށްފައިކަމަށް އެޕާޓީން ބުނެއެވެ.
މިބައްދަލުވުމުގައި ނިންމުނު މުހިއްމު އަނެއް ނިންމުމަކީ ދައުލަތުން ޓެކްސް ބޮޑުކުރުމަށް ހުށަހަޅާފައިވާ ބިލަށް ތާޢީދު ނުކުރަން ނިންމި ނިންމުމެވެ. ޕާޓީގެ ޤައުމީ ހިންގާ ކައުންސިލުން މިފަދަ ނިންމުމެއް ނިންމި ކަމުގައިވީ ނަމަވެސް، އެމްއެންޕީގެ ސިޔާސަތަކީ ވިޕެއް ނެރި ވަކި ވަކި މެންބަރުން ވޯޓަށް ނުފޫޒު ނުފޯރުވާ ރައްޔިތުންގެ އިޙްސާސްތަކާ އެއްގޮތަށް މަޖިލީހުގައި ވޯޓު ދިނުމަށް ބާރުއެޅުން ކަމަށް ވެސް ޕާޓީގެ ރައީސް މުޙައްމަދު ނާޒިމް ވިދާޅުވިއެވެ.
އެމްއެންޕީގެ ފުރަތަމަ ޤައުމީ ކައުންސިލް ބައްދަލުވުމުގައި އިތުރަށް މަޝްވަރާކުރެވުނު ކަންތައްތަކުގެ ތެރޭގައި 2023 ވަނަ އަހަރަށް ދައުލަތުން ލަފާކުރާ ބަޖެޓާ ބެހޭ ގޮތުންނާއި، ރާއްޖޭގެ އިޤްތިސާދީ ހާލަތާ ބެހޭ ގޮތުންނާއި، މިހާރު ރައްޔިތުންގެ ކަންބޮޑުވުން އެންމެ ބޮޑަށް އޮތް އެއް މައްސަލަ ކަމަށްވާ ޗާގޮސް މައްސަލައިގައި ވެސް ޤައުމީ ކައުންސިލްގެ މެންބަރުންގެ މެދުގައި ފުޅާ ދާއިރާއެއްގައި ވަނީ މަޝްވަރާކުރެވިފައެވެ.
އެމްއެންޕީގެ ޤައުމީ ހިންގާ ކައުންސިލަކީ ޕާޓީގެ ޤައުމީ ޖަލްސާ، ދަ ނެޝަނަލްސް ކޮންވެންޝަން އަށް ފަހު ޕާޓީގެ އެންމެ އިސް ޒިންމާތަކާއި މަސްޢޫލިއްޔަތުތައް އަދާކުރާ ގުނަވަނެވެ. ޕާޓީގެ ޤައުމީ ހިންގާ ކައުންސިލްގައި ހިމެނެނީ ޕާޓީގެ ރައީސުންނާއި ނާއިބު ރައީސުން، ޕާޓީގެ ވިމެންސް ވިންގާއި ޔޫތު ވިންގުގެ ލީޑަރުގެ އިތުރުން ޕާޓީގެ ހުރިހާ ދާއިރާތަކެއް ރައީސުންނާއި ދީނީ އިލްމުވެރިންގެ މަޝްވަރާ މަޖިލިސްގެ ޗެއަރއެވެ. ޕާޓީގެ ގައުމީ ހިންގާ ކައުންސިލްގެ ބައްދަލުވުމެއް ކޮންމެ 3 (ތިނެއް) މަހަކުން އެއް ފަހަރު ބާއްވަމުން ގެންދާނެ ކަމަށް އެ ޕާޓީން ބުނެއެވެ.
