ޗެމްޕިއަންސް ލީގު ގްރޫޕް ސްޓޭޖް ފަހު މެޗުގައި ލިވަޕޫލުން ނަޕޯލީ ބަލިކޮށްފިއެވެ. މުބާރާތުގައި ނަޕޯލީން ދަމަހައްޓަމުން އައި މޮޅުވުމުގެ ސިލްސިލާ އަށް ލިވަޕޫލުން ނިމުން ގެނަޔަސް ގްރޫޕް ސްޓޭޖް ނިންމާލަން ޖެހުނީ ނަޕޯލީގެ ފަހަތުން ދެ ވަނައިގައެވެ.

މެޗުގެ ފަހު ވަގުތު ޖެހި ދެ ލަނޑުން, ލިވަޕޫލްގެ އެންފީލްޑްގައި މެޗު ކާމިޔާބުކުރީ 2-0 ނެވެ. މެޗުގައި ލިވަޕޫލްގެ ފުރަތަމަ ލަނޑު މުޙައްމަދު ސަލާޖު ޖެހީ 85 ވަނަ މިނެޓުގައެވެ. ދެ ވަނަ ލަނޑު ޑާވިން ނޫނޭޒް ޖެހީ މެޗުގެ އިތުރު ވަގުތުގައެވެ. މެޗުން މޮޅުވެ ލިވަޕޫލުން ވަނީ ހަ މެޗުން 15 ޕޮއިންޓު ހަމަކޮށްފައެވެ. ނަޕޯލިއަށް ވެސް ހަ މެޗުން ލިބުނީ 15 ޕޮއިންޓެވެ. ގޯލްގެ ފަރަގަށް ބަލާއިރު ނަޕޯލީއަށް ކުރި ލިބެނީ ތިން ގޯލްގެ ތަފާތަކާއެކުއެވެ. ނަޕޯލީ ގްރޫޕްގެ އެއް ވަނަ ހޯދީ ހެޑް ޓު ހެޑުން ކުރި ހޯދައިގެންނެވެ. ރަނގަޅު ފޯމެއް ދަމަހައްޓަމުން އައި ނަޕޯލީ ބަލި މިވީ 21 މެޗަށްފަހުއެވެ. އިޓާލިއަން ސެރީ އޭ ތާވަލްގެ އެއް ވަނައިގައި އޮތީ ވެސް ނަޕޯލީއެވެ. އެއާ ހިލާފަށް ނަޕޯލީ އާ ދެކޮޅަށް ލިވަޕޫލް ނުކުތީ ޕްރިމިއަރ ލީގުގައި އެންމެ ފަހުން ކުޅުނު ދެ މެޗުން ވެސް ބަލިވުމަށްފަހުއެވެ.

މިގްރޫޕްގައި ދެން ވާދަކުރި ރޭންޖަރސްގެ މައްޗަށް އަޔެކްސް ކުރި ހޯދީ 3-1 ނެވެ. ތިން ވަނައިގައި އަޔެކްސް ނިންމާލީ ހަ ޕޮއިންޓާ އެކުއެވެ. ރޭންޖަރސް އަށް ޕޮއިންޓެއް ނުލިބެއެވެ.