ޕްރޮޖެކްޓުތަކުގެ ޕްރޮކިއުމެންޓު މަރުހަލާގައި ލަސްތައް ދިމާވޭ: ފިނޭންސް މިނިސްޓްރީ
ވޯލްޑް ބޭންކުގެ އެހީގެ ދަށުން 10 ޕްރޮޖެކްޓެއް ކުރިއަށްދޭ
ޖޮއިންޓް ކަންޓްރީ ޕޯޓްފޯލިއޯ ޕަރފޯމަންސް ރިވިއު 2022
ވޯލްޑް ބޭންކުގެ އެހީގެ ދަށުން ދިވެހިރާއްޖޭގައި ހިންގާ ޕްރޮޖެކްޓް ޕޯޓްފޯލިއޯ ރިވިއުގެ ހޯދުންތައް ފިނޭންސް މިނިސްޓްރީން ހިއްސާކޮށްފިއެވެ.
2022 ވަނަ އަހަރުގެ ޕޯޓްފޯލިއޯ ރިވިއު ކުރިއަށްގެންގޮސްފައިވަނީ ފިނޭންސް މިނިސްޓްރީއާއި ވޯލްޑްބޭންކާއިއެކު، މަޝްރޫއުތައް ހިންގަމުންގެންދާ މުއައްސަސާތަކާއިއެކު ކުރިއަށްގެންދެވުނު މަޝްވަރާތަކަކާއި ދިރާސާތަކަށް ބިނާކޮށްގެންނެވެ. މިއީ ވޯލްޑް ބޭންކުގެ ލޯން އަދި ހިލޭ އެހީގެ ދަށުން ކުރިއަށްގެންދާ މަޝްރޫއުތަކުގެ ކުރިއެރުންތަކާއި ދިމާވާ ގޮންޖެހުންތައް ދެނެގަނެ އެކަމަށް ހައްލު ހޯދުމަށް ކުރިއަށްގެންދިޔަ ރިވިއުއެކެވެ.
މިވަގުތު ވޯލްޑް ބޭންކުގެ އެހީގެ ދަށުން 10 ޕްރޮޖެކްޓް ކުރިއަށްދެއެވެ. އެއީ ކުނި މެނޭޖް ކުރުމުގެ ދާއިރާއިންނާއި، އިއާދަކުރުވަނިވި ހަކަތައިގެ ޕްރޮޖެކްތަކާއި، އިންސާނީ ވަސީލަތްތައް ކުރިއެވުމުގެ ދާއިރާއިންނާއި، ދެމެހެއްޓެނިވި މަސްވެރިކަމުގެ ދާއިރާއިންނާއި، އިޖްތިމާއީ އިންޝުއަރެންސް ފޯރުކޮށްދިނުމުގެ ޕްރޮޖެކްޓާއި އަދި އުމްރާނީ ތަރައްގީއާއި ކާރިސާތަކުން ވިލުންވެރިވެރިކަންއިތުރުކުމާއިގުޅޭ ޕްރޮޖެކްޓްއަކާއި، ޑިޖިޓަލް ޑިވެލޮޕްމަންޓްގެ ރޮނގުންނާއި ކޮވިޑްގެ ސިއްހީ ގެއްލުންތަކުން އަރައިގަތުމުގެ ގޮތުން ސިއްހީ ދާއިރާ ހަރުދަނާކުމަށް ކުރިއަށްގެންދާ ޕްރޮޖެކްޓްތަކެވެ.
މި ރިވިއުގައި މައިގަނޑު ގޮތެއްގައި ފާހަގަކޮށްފައިވަނީ ޕްރޮކިޔުމަންޓް މަސައްކަތުގައި ދިމާވާ ލަސްވުންތަކާއި، މަޝްރޫއު ހިންގުމަށް ބޭނުންވާ އެކަށީގެންވާ ފަންނީ މުއައްޒަފުން ހޯދުމުގެ ދަތިކަމުން ދިމާވާ މައްސަލަތަކެވެ. ފިނޭންސް މިނިސްޓްރީއިން ވަނީ ޕްރޮޖެކްޓްތައް ހިންގުން ހަރުދަނާ ކުރުމަށްޓަކައި އަޅާނެ ފިޔަވަޅުތަކެއް ކަރުދާހެއްގެ ގޮތުގައި އެކުލަވާލައި ވޯލްޑް ބޭންކްއާއި ހިއްސާކޮށްފައެވެ. އަދި ކުރިއަށް އޮތް ދުވަސްތަކުގައި ޕްރޮޖެކްޓް ހިންގާ ފަރާތްތަކާއި ވެސް ކަރުދާސް ހިއްސާކުރެވޭނެއެވެ.
މި ކަރުދާހުގައި މިހާރު ދިމާވާ "ޕްރިންސިޕަލް އެޖެންޓް" އަދި "އިންފޮމޭޝަން އެސިމެޓްރީ" މައްސަލަތަކަށް އަލިއަޅުވާލައި ހައްލު ބަޔާންކޮށްފައިވެއެވެ. އަދި ކުރިއަށް އޮތް ތަނުގައި ވަކި ވަކި ޕްރޮޖެކްޓް ހިންގުމަށް "ޕްރޮޖެކްޓް މެނޭޖްމަންޓް ޔުނިޓް" ތައް ހެދުމުގެ ބަދަލުގައި ގުޅުންހުރި އިދާރާގެ އިންސާނީ ވަސީލަތްތައް ބޭނުންކޮށްގެން މަޝްރޫއުތައް ކުރިއަށްގެންދިއުމުން ނުވަތަ "އިންސްޓިޓިއުޝަނަލައިޒް" ކުރުމުގެ ފައިދާތަކަށް އަލިއަޅުވާލިއެވެ. އޭގެ ތެރޭގައި ތަޖުރިބާއާއި ކަމާއި ބެހޭ އިލްމު އެތަނެއްގައި ދިގުމުއްދަތަކަށް ހިފެހެއްޓި، އުފެެއްދުންތެރިކަން އިތުރުވެގެން ދެއެވެ.
މީގެ އިތުރުން، ފިނޭންސް މިނިސްޓްރީ އިން ޕްރޮޖެކްޓް ހިންގުމާއި ހަވާލުވާ ޑައިރެކްޓަރުންގެ މަސައްކަތުގެ ފެންވަރު ޕްރޮޖެކްޓާއި އެކީ ވަޒަންކުރާނެއެވެ.
2022 ވަނަ އަހަރު މަޝްރޫއުކަގުގެ "ޑިސްބާސްމަންޓް" ނުވަތަ ކުރިއެރި މިންވަރު ވަނީ ފާއިތުވެދިޔަ އަހަރު ތަކާއިބަލައި އިތުރުވެފައެވެ. އަދި މި އަހަރު ތެރޭގައި ދެ މަޝްރޫއެއްވަނީ ކާމިޔާބުކަމާއިއެކު ނިންމައިފައެވެ.
ފިނޭންސް މިނިސްޓަރު ވަނީ ކުރިއަށްއޮތްތާގައި ލިބޭ ހިލޭ އެހީގައި ކުދި ކުދި އެކި ޕްރޮޖެކްޓްހިންގުމުގެ ބަދަލުގައި، އިގްތިސާދަށް ބޮޑެތި ކުރިއެރުންތައް ލިބޭނެ ބިޔަ ބޮޑެތު ޕްރޮޖެކްތަކަށް އަމާޒުކުރުމަށް އެދިފައެވެ.
