މާލެ ސަރަހައްދުގައި ބޯހިޔާވަހިކަމުގެ 54 ޓަވަރެއްގެ މަސައްކަތް ކުރިއަށް އެބަދޭ: އާރިފް
ކޮންމެ ޓަވަރެއްގައި 100 އަށްވުރެ ގިނަ ޔުނިޓު ހިމެނޭ
މުހައްމަދު އާރިފް
މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް މިވަގުތު ބޯހިޔާވަހިކަމުގެ 54 ޓަވަރެއްގެ މަސަައްކަތް އެކި މަރުހަލާތަކުގައި ކުރިއަށްދާކަަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރ މުހައްމަދު އާރިފް ވިދާޅުވެއްޖެއެވެ.
މާލެ ސަރަހައްދުގައި މިހާރު ކުރިއަށްދާ ބޯހިޔާވަހިކަމުގެ ބައެއް މަސައްކަތްތައް ހައުސިން މިނިސްޓްރީގެ ފަރާތުން ވަނީ އަންގާރަ ދުވަހު ނޫސްވެރިންނަށް ދައްކާލާފައެވެ. މިގޮތުން އެޗްޑީސީން އެކި ފަރާތްތަކާ ހަވާލުކޮށްގެން ކުރިއަށްގެންދާ އެކި ފަންތިތަކުގެ ބޯހިޔާވަހިކަމުގެ މަސައްކަތްތަކާއި، ސަރުކާރުން ހިންގާ ސޯޝަލް ހައުސިންގެ މަސައްކަތްތަކާބެހޭ ފަހުގެ މައުލޫމާތުތައް މިނިސްޓްރީން ވަނީ ތަފްސީލުކޮށްދީފައެވެ.
މި މައުލޫމާތުތައް ހިއްސާކުރެއްވުމަށްފަހު ނޫސްވެރިންނަށް މައުލޫމާތުދެއްވަމުން އާރިފް ވިދާޅުވީ 54 ޓަވަރުގެ މަސައްކަތް ސަރުކާރުން އެވޯޑުކޯށްގެން ކުރިއަށްގެންދާއިރު މިއިން ކޮންމެ ޓަވަރެއްގައި 100 އަށްވުރެ ގިނަ ހައުސިން ޔުނިޓު ހުންނަ ކަމަށެވެ. ސަރުކާރުގެ އަމާޒަކީ ހުރިހާ ފަންތިއެއްގެ މީހުންނަށްވެސް ގަނެވޭ ފެންވަރުގެ ތަންތަން ގާއިމުކުރުން ކަމަށް އާރިފް ވިދާޅުވިއެވެ. އެގޮތުން ބައެއް ކޮންޓްރެކްޓަރުންނާ ހަވާލުކޮށްގެން ކުރިއަށްގެންދާ މަސައްކަތްތަކަކީ އެ މަޝްރޫއުތަކުގެ އަގު ކޮންޓްރޯލްކޮށް ފުރަތަމަ ފަހަރަށް ގެ ގަންނަން ބޭނުންވާ ފަރާތްތަަކަށް އަމާޒުކޮށްގެން ކުރިއަށްގެންދާ މަސައްކަތްތައް ކަމަށެވެ.
އާރިފް ވިދާޅުވީ މާލެ ސަރަހައްދުގައި ނޫނަސް އަތޮޅުތެރޭގައިވެސް މި ސަރުކާރުން ބޯހިޔާވަހިކަމުގެ ގިނަ މަޝްރޫއުތަކެއް ހިންގާފައިވާކަމަށެވެ. އަދި މިހާތަނަށް މި ސަރުކާރުން ހިންގާފައިވާ ގިނަ މަޝްރޫއުތަކެއް ނިމި އެތަންތަނުގައި މީހުން ދިރިއުޅެންވެސް ފަށާަފައިވާކަން އޭނާ ވަނީ ފާހަގަކުރައްވާފައެވެ. މި މަޝްރޫއުތަކަކީވެސް ގިނަ ބަޔަކަށް ބޯހިޔާވަހިކަން ލިބިގެންދާނެ މަޝްރޫއުތަކެއް ކަމަށް އާރިފް ވިދާޅުވިއެވެ.
އާރިފް ވިދާޅުވީ މި ދައުރު ނިމުމުގެ ކުރިން ބައެއް ޓަވަރުތަކުގެ މަސައްކަތް ނިމޭނެ ކަމަށެވެ. އަންނަ އަހަރުގެ މެއި މަހާ ހަމައަށް ދާއިރު ބައެއް ޓަވަރުތަކަށް މީހުންނަށް ވަދެވޭނެ ކަމުގެ ޔަގީންކަން ކޮންޓްރެކްޓަރުން ދީފައިވާކަމަށެވެ. އަދި 2024 ގެ ތެރޭގައި މި މަސައްކަތްތައް އެއްކޮށް ނިންމާލެވޭނެކަމަށް ކޮންޓްރެކްޓަރުން ވަނީ ބުނެފައެވެ.
