އެއާޕޯޓެއް ކާމިޔާބުކަމާއެކު ހިންގަން 8000 އެނދު، ކުރިޔަށް އޮތް ތިން އަހަރު ތެރޭ އުތުރުގައި 3700 އެނދު ހުންނާނެ

ސަރަހައްދެއްގައި އެއާޕޯޓެއް ކާމިޔާބުކަމާއެކު ކުރިއެރުމަށްޓަކައި އެސަރަހައްދަކަށް 8000 އެނދު ބޭނުންވާކަމަށާއި މިވަގުތު ހއ، ހދ އަދި ށ އަތޮޅުގައި ރިސޯޓް، ހޮޓާ އަދި ގެސްޓް ހައުސް ހިމެނޭގޮތުން 1724 އެނދު ރަޖިސްޓްރީކޮށްފައިވާކަމަށް ޓޫރިޒަމް މިނިސްޓަރު ޑރ އަބްދުﷲ މައުސޫމް ވިދާޅުވެއްޖެއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފު ޓޫރިޒަމާއި މިނިސްޓަރާއި ސުވާލުކުރެއްވީ ހަނިމާދޫ އިންޓަރނޭޝަނަލް އެއަރޕޯޓު 3.1 މިލިއަން ފަސިންޖަރުންނަށް ޚިދުމަތް ދެވޭގޮތަށް ތަރައްޤީކުރުމަށް ހަވާލުކޮށްފައިވާއިރު މިއެއާޕޯޓް ދެކޮޅު ޖެއްސުމަށް އެސަރަހައްދަށް ކިތައް އެނދު ބޭނުންވޭތޯއެވެ. އަދި އުތުރުގެ ބެޑު ކެޕޭސިޓީ އިތުރުކުރުމަށް ޕްލޭނެއް އެބައޮތްތޯ އާއި ޕްލޭނެއް އޮތްނަމަ އެޕްލޭނަކީ ކޮބައިތޯއެވެ.

Advertisement

މިސުވާލަށް ޖަވާބު ދެއްވަމުން މިނިސްޓަރު މައުސޫމް ވިދާޅުވީ ހއ، ހދ އަދި ށ ގައި ރަޖިސްޓްރީކޮށްފައިވާ 1724 އެނދުގެ ތެރެއިން 1524 އެނދު ހުރީ އޮޕަރޭޝަން ހާލަތުގައިކަމަށެވެ. އަދި ކުރިޔަށް އޮތް ދެ އަހަރުގެ ތެރޭގައި ހދ އަތޮޅުގައި ދެ ރިސޯޓެއްގެ ފޭސް 1 ހުޅުވިގެންދާނެކަމަށް ލަފާކުރެވޭކަމަށް މިނިސްޓަރު ވިދާޅުވިއެވެ. އެއީ ހދ ދިއްޕަރުފުށި އަދި ނާގޮހިކަމަށާއި އެތަނުން 234 އެނދު ހުޅުވޭނެ ކަމަށެވެ.

އަދި ކުރިޔަށް އޮތް ތިން އަހަރު ތެރޭގައި 1260 އެނދު ހިމެނޭހެން އިތުރު 4 ރިސޯޓެއް އޮޕަރޭޝަން ސްޓޭޖަށް އަންނާނެކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ހަނިމާދޫ އެއާޕޯޓް ފުލްކެޕޭސިޓީގައި ހިންގާނަމަ ދުވާލަކު ޑިޕާޗާ ޕަސެންޖަރުން އުޅޭނެކަމަށް ބެލެވެނީ 1780 ގައިކަމަށެވެ. އޭގެތެރެއިން ފުރަތަމަ އަހަރުތެރޭ ޖުމްލަ ކެޕޭސިޓީގެ 20 އިންސައްތައިގައި އޮޕަރޭޓްކުރާނެކަމަށް ބެލެވޭކަމަށާއި އެހެންކަމަށްވާ ނަމަ ދުވާލަކު 300 ޕަސެންޖަރުން އެ އެއާޕޯޓަށް އަންނާނެކަމަށެވެ.

އެއީ ޓޫރިސްޓުންކަމަށް ބަލާއިރު މިހާރު ހުރި ބެޑް ކެޕޭސިޓީ އިތުރުވާނެކަމަށް ބެލެވޭކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ޓޫރިޒަމް ކުރިޔަށް ގެންދިޔުމުގައި ބެޑް ކެޕޭސިޓީގެ އިތުރަށް ވަރަށް މުހިންމު އެހެން ކަންތައްތައް ހުންނަކަމަށެވެ. އެގޮތުން އެއާޕޯޓާއެކު އެސަރަހައްދެއްގެ ތެރޭގައި ދަތުރުކުރެވޭނެ ގޮތަށް ހުންނަންޖެހޭކަމަށާއި އާރުޓީއެލް ފެރީގެ ޚިދުމަތާއެކު އެކަމަށް މަގުފަހިވެފައިވާކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ފަތުރުވެރިކަން ކުރިއެރުވުމަށް ބޭނުންވާކަންކަން ފަހިކުރުމަށް ރަށްރަށުގެ ކައުންސިލްތަކާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި ވިޔަފާރިކުރަން ބޭނުންވާ ފަރާތްތަކާއި މިނިސްޓްރީގެ ފަރާތުން ވާހަކަދައްކަމުންދާކަމަށެވެ. އެގޮތުން ހއ އަދި ހދ ގެ ރަށްރަށުގެ ތެރެއިން އެއް ރަށް ފިޔަވައި އެހެން ހުރިހާ ރަށަކަށް މިނިސްޓްރީގެ ޓީމުތައް ދަތުރުކޮށްފައިވާކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ރަށްރަށުން ފަތުރުވެރިކަން ކުރިއަރުވަން ބޭނުންވާކަމަށާއި އެތަންތަނަށް އިންވެސްޓްމަންޓްތައް ބޭނުންވާކަމަށެވެ.

މިނިސްޓަރު ވިދާޅުވީ ފަތުރުވެރިންނަށް ފަހިވާގޮތަށް ރަށްރަށުގައި ހިދުމަތްތައް ހުންނަންޖެހޭކަމަށެވެ. އަދި ރަށްރަށުގެ ރައްޔިތުންގެ ވިސްނުންވެސް އެކަމަށް މަރުހަބާ ކިޔާގޮތަށް ވިސްނުން ހުންނަންޖެހޭކަމަށެވެ.

ހދ އަތޮޅުގައި އެއާޕޯޓް ހުޅުވިގެންދާއިރު އެމަގުން އެއާޕޯޓަށް ފަހިވާގޮތަށް އެނދުވެސް ހުންނާނެކަމަށާއި އަތޮޅުގެ ވިސްނުންވެސް އެމަގަށް ހުންނާނެކަމަށް ބެލެވޭކަމަށް މިނިސްޓަރު ވިދާޅުވިއެވެ.

މިވަގުތު ރިޒޯޓު އަދި ގެސްޓުހައުސް ހިމެނޭ ގޮތަށް ހުރީ ހއ ގައި 360 އެނދު، ހދ ގައި 274 އެނދު އަދި ށ އަތޮޅުގައި 517 އެނދު އަދި ހދ. ގައި އެންމެ ރިޒޯޓެކެވެ.