ދައުލަތުގެ އޮފީސްތައް ހިންގުމަށް އަމިއްލަ ފަރާތްތަކުގެ އިމަރާތްތައް ކުއްޔާ ނަގާ މައްސަލަ ހައްލުކުރުމަށް ގަރާރެއް ހުށަހަޅައިފި
މަހަކު 8.5 މިލިއަނަށްވުރެ ގިނަ ރުފިޔާ މިކަމަށް ހޭދަކުރޭ
ދައުލަތުގެ ގިނަ އޮފީސްތައް އަމިއްލަ މީހުންގެ އިމާރާތްތަކުގައި ހިންގާ
ދައުލަތުގެ އޮފީސްތަކާއި އިދާރާތައް ހިންގުމަށާއި ގުދަންކުރުމުގެ ބޭނުމަށް އަމިއްލަ ފަރާތްތަކުގެ އިމާރާތްތައް ދައުލަތުން ކުއްޔަށް ހިފުމަށް ގިނަ އަދަދެއްގެ ފައިސާ ހޭދަކުރަން ޖެހިފައިވާތީ، މިކަމަށް އަވަސް ހައްލެއް ހޯދުމަށް އެދި ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މި ގަރާރު ހުށަހެޅުއްވީ ހެންވޭރު އުތުރު ދާއިރާގެ މެންބަރު އިބްރާހީމް މުޢިއްޒުއެވެ. މި ގަރާރުގައި ބުނެފައިވަނީ ކުރިންސުރެއް ދައުލަތުގެ ބައެއް އޮފީސްތަކާއި އިދާރާތައް ހިންގުމަށާއި، ގުދަން ކުރުމަށް އަމިއްލަ ފަރާތްތަކުގެ އިމާރާތް ދައުލަތުން ކުއްޔަށް ހިފުމަށް ގިނަ އަދަދެއްގެ ފައިސާ ހޭދަކުރަން ޖެހިފައިވާތީ އާއި އެގޮތުން މަހަކު 8.5 މިލިއަނަށްވުރެ ގިނަ ރުފިޔާ (އަހަރަކަށް ބަލާނަމަ 102 މިލިއަނަށްވުރެ ގިނަ ރުފިޔާ) ހޭދަކުރަމުން ގެންދާ ކަމަށެވެ. އަދި ދައުލަތުގެ އިމާރާތްތަކަށް އެ އޮފީސްތަކާ އިދާރާތަކާއި ގުދަންތައް ބަދަލުކުރުމުގެ ވިސްނުމާއި ޕްލޭނެއް އޮތްކަމަށް ނުދެކޭ ކަމަށެވެ.
އަދި މި ނުރަނގަޅު އާދަ ދެމިގެންދާ ގޮތަށް އޮތުމަކީ ދައުލަތުގެ ފައިސާ އިން މެނޭޖު ކުރުމުގައި އިސްރާފު ބޮޑު، އަދި ކޮރަޕްޝަނަށް މަގުފަހިވާނެ ކަމަކަށް ވާހިނދު، އަދި ދައުލަތުގެ އޮފީސްތަކާއި އިދާރާތައް ހިންގުމަށް އެކަށީގެންނުވާ ތަންތަނުގައި އެތަންތަން ހިންގުން ހުއްޓުވުމަކަށް ގެނައުމުގެ ބޭނުންތެރިކަން އޮތްކަމަށް ފެންނާތީ އާއި ހިދުމަތް ހޯދުމަށް ދާ ފަރާތްތަކަށް ވެސް ހިދުމަތް ހޯދުމަށް ފަސޭހަވާނެ ގޮތަށް ދާއިމީ ހައްލެއް ހޯދުމުގެ ބޭނުންތެރިކަން އޮތްކަމަށް ފެންނަކަމަށް މި ގަރާރުގައި ބުނެފައިވެއެވެ.
މީގެ އިތުރުން އެކި ބޭނުންތަކަށް ކުއްޔަށް ހިފާ އިމާރާތްތައް ވަކި މުއްދަތެއް ނެތް ގޮތަށް، ދިގު މުއްދަތަކަށް ދެމިގެންދާ ގޮތަށް ދައުލަތުން ކުއްޔަށް ހިފައި އަހަރެއްގެ މައްޗަށް ދައުލަތުން ހޭދަކުރާ ފައިސާއަކީ މިކަމަށް ހައްލެއް ގެނެވިއްޖެ ނަމަ ދައުލަތުގެ އެހެން ތަރައްގީގެ މަޝްރޫއުތަކުގެ އިތުރަށް އާންމު ރައްޔިތުންނާ ސީދާ ގުޅުން ހުރި ކަންކަމަށް ހޭދަކުރެވޭ ފައިސާ ކަމަށްވާތީ، އަދި އެކަމަށް ދާއިމީ ހައްލެއް ހޯދުމުގެ ވިސްނުމާއި ޕްލޭނެއް އޮތްކަމަށް ނުދެކޭތީ އާއި، ކޮރަޕްޝަނަށް މަގުފަހިވާތީ ދައުލަތުގެ ކަމާ ބެހޭ އިދާރާތައް މަޖިލިސް ކޮމިޓީއަށް ހާޒިރުކޮށް މިކަމަށް އަވަސް ހައްލެއް ގެނެވޭނެ ގޮތްތައް ދެނެގަނެ، އަވަސް ހައްލެއް ހޯދުމަށް ގޮވާލާ ރައްޔިތުންގެ މަޖިލީހުގެ ގަވާއިދުގެ 167 ވަނަ މާއްދާގެ ދަށުން ހުށަހަޅާފައިވާ ގަރާރެއް ކަމަށެވެ.
