ރ. އިންނަމާދޫ ގޮނޑުދޮށް ހިމާޔަތް ކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފިއެވެ.

ހޯމަ ދުވަހު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި ބޭއްވި ރަސްމިއްޔާތެއްގައި މަޝްރޫއުގެ އެއްބަސްވުމުގައި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ޗީފް އޮޕަރޭޓިންގ އޮފިސަރ ޝާހިދު ހުސައިން މޫސާއެވެ. އަދި ޕްލޭނިންގ މިނިސްޓްރީގެ ފަރާތުން ސޮއި ކުރެއްވީ އެ މިނިސްޓްރީގެ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ.

މި އެއްބަސްވުމުގެ ދަށުން އިންނަމާދޫގެ ގޮނޑުދޮށް ހިމާޔަތް ކުރުމަށް 360 މީޓަރުގެ ސަރަހައްދެއްގައި ގްރޮއިންސް ޖަހާނެއެވެ. އަދި މަޝްރޫއުގެ އަމަލީ މަސައްކަތް ފެށުމުގެ ކުރިން އެ މަސައްކަތަށް ބޭނުންވާ އެންވަޔަރަމެންޓަލް އިމްޕެކްޓް އެސެސްމަންޓް (އީއައިއޭ) ވެސް އެމްޓީސީސީންހަދާނެއެވެ.

އެމްޓީސީސީން ބުނީ އިންނަމާދޫއަށް ދިމާވެފައިވާ އެންމެ ބޮޑު އެއް މައްްސަލައަކީ ރަށުގެ އުތުރު ފަރާތުން ބޮޑު ބައެއް ގިރަމުންދިއުން ކަމަށެވެ. މިކަމާ ގުޅިގެން ރަށުގެ އުތުރު ފަރާތުން ބައެއް މީހުންނަށް ދޫކޮށްފައިވާ ގޯތިތަކާ ހަމައަށްވެސް ރަށްގިރުމުގެ ބިރު އޮތް ކަމަށާއި ނަމަވެސް ގޮނޑުދޮށް ހިމާޔަތް ކުރުމުން އެކަމަށް ހައްލެއް ލިބިގެންދާނެ ކަމަށް އެ ކުންފުނިން ބުންޏެވެ.

މި މަޝްރޫއު އެމްޓީސީސީއާ ހަވާލު ކޮށްފައިވަނީ 15،660،758 (ފަނަރަ މިލިއަން ހަ ލައްކަ ފަސްދޮޅަސް ހާސް ހަތްސަތޭކަ ފަންސާސް އަށެއް) ރުފިޔާ އަށެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ 220 ދުވަހުގެ ތެރޭގައި ނިންމާ ގޮތަށެވެ.