ސިއްހީ ދާއިރާގެ މުސާރަ އެއްހަމަކުރުމަށްް 500 މިލިއަން ރުފިޔާއާއި ގާތްކުރާ އަދަދެއް
31 އޮކްޓޯބަރު 2022 | ހޯމަ 04:39ދައުލަތުގެ މުސާރައިގައި ހުރި ފަރަގުތައް ކުޑަކޮށް އެއްހަމަކުރުމަށް އިސްކަންދޭނެ
ފިނޭންސް މިނިސްޓަރު އިބްރާހިމް އަމީރު
ސިއްހީ ދާއިރާގެ މުސާރަ އެއްހަމަ ކުރުމަށްް 500 މިލިއަން ރުފިޔާއާއި ގާތްކުރާ އަދަދެއް އަންނަ އަހަރުގެ ދައުލަތުގެ ބަޖެޓުގައި ހިމަަނައިފިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހަޅުއްވަމުން ހޯމަ ދުވަހުގެ މަޖިލިސް ޖަލްސާގައި ފިނޭންސް މިނިސްޓަރު އިބްރާހިމް އަމީރު ވިދާޅުވީ، ދައުލަތުގެ މުސާރައިގައި ހުރި ފަރަގުތައް ކުޑަކޮށް އެއްހަމަކުރުމަށާއި އެންމެ ކުޑަ އުޖޫރަ ކަނޑައެޅުމުގެ މަސައްކަތްތައް މިހާރު ފެށިފައިވާ ކަމަށެވެ.
އަދި މުސާރަތައް ހަމަހަމަކުރުމުގެ ސިޔާސަތުގެ ދަށުން ނެޝަނަލް ޕޭ ކޮމިޝަނުން މުސާރާއިގެ އައު އޮނިގަނޑެއް ތައްޔާރުކުރުމުގެ މަސައްކަތް ފަށާފައިވާކަމަށް ވެސް މިނިސްޓަރު ވިދާޅުވިއެވެ.
ސިއްހީ ދާއިރާގެ އެންމެ މުހިންމު ވަސީލަތަކީ އިންސާނީ ވަސީލަތްކަން ފާހަގަ ކުރައްވައި މިނިސްޓަރު ވިދާޅުވީ، ޕޭ ހާމަނައިޒޭޝަން މަސައްކަތުގެ ތެރެއިން ދެން އެންމެ އަވަހަށް މުސާރަތައް އެއްހަމަ ކުރެވިގެންދާނީ ސިއްހީ ޚިދުމަތްތެރިންނަށް ކަމަށެވެ. އެގޮތުން އަތޮޅުތެރޭގައި 24 ގަޑިއިރު ޚިދުމަތްދޭ ސިއްހީ މަރުކަޒުތަކަށް ބަޖެޓުވާނީ އިތުރުކޮށްދީފައި ކަމުގައި މިނިސްޓަރު ވިދާޅުވިއެވެ.
މީގެ އިތުރުން، ސިއްހީ ޚިދުމަތްތެރިންގެ އަދަދު އިތުރުކުރުމަށް 40.3 މިލިއަން ރުފިޔާ ބަޖެޓު ކުރެވިފައިވާކަންވެސް މިނިސްޓަރު ފާހަގަ ކުރެއްވިއެވެ.
މިނިސްޓަރު ހުށަހެޅުއްވި ބަޖެޓުގައި ބަޔާން ކޮށްފައިވާ ގޮތުގައި 2022 ވަނަ އަހަރުގެ ތެރޭގައި ސަރުކާރުން އެ އައު އޮނިގަނޑުގެ ދަށުން ތައުލީމީ ދާއިރާގެ މުވައްޒަފުންނަށް މުސާރަދޭން ފަށާފައިވާއިރު، ސަރުކާރުން ރާވައިފައިވަނީ ދައުލަތުގެ ބަޖެޓަށް ބުރަ ބޮޑުނުވާނޭ ފަދައިން އެކި އަހަރުތަކަށް ބަހާލައިގެން މުސާރަ ހަމަހަމަކުރުމުގެ ސިޔާސަތު ތަންފީޒުކުރުމަށެވެ.
ބަޖެޓުގައިވާ ގޮތުން އަންނަ އަހަރުގެ ނިއު ޕޮލިސީ އިނީޝިއޭޓިވްއެއްގެ ގޮތުގައި މުވައްޒަފުންނަށް ހިނގާ ޚަރަދުގެ ތެރެއިން 500 މިލިއަން ރުފިޔާ އާ ގާތްކުރާ އަދަދެއް ކަނޑައެޅިފައިވަނީ ސިއްހީ ދާއިރާގެ ޑޮކްޓަރުން، ނަރުހުން އަދި އެލައިޑް ހެލްތު ޕްރޮފެޝަނަލުންނަށް މުސާރަ އެއް ހަމަކުރުމަށްޓަކައި ކުރެވޭ ޚަރަދަށެވެ.
އޭގެ އިތުރުން، އެ އަދަދުގެ ތެރޭގައި މުވައްޒަފުންގެ ޕެންޝަނަށް ހިނގާނެ ޚަރަދު ވެސް ހިމެނިފައިވާނެކަން ބަޖެޓުގައި ބަޔާންކޮށްފައިވެއެވެ. އަދި މުސާރަ ހަމަހަމަކުރުމުގެ ސިޔާސަތު ތަންފީޒު ކުރުމަށްޓަކައި މެދުރާސްތާގައި 3 ބިލިއަން ރުފިޔާ ޚަރަދުވާނެކަމަށް އަންދާޒާކުރެވޭކަން ވެސް ބަޖެޓުގައި ވަނީ ބަޔާންކޮށްފައެވެ.
އެހެންކަމުން 2025 ވަނަ އަހަރުގެ ނިޔަލަށް މުސާރައިގެ އައު އޮނިގަނޑުގެ ދަށުން ހުރިހާ މުވައްޒަފުންނަށް މުސާރަ ދެވޭނެ ގޮތަށް ބަޖެޓުގައި ހިމަނައިފައިވެއެވެ.
ބަޖެޓުގައިވާ ގޮތުން ދައުލަތުގެ ބަޖެޓުން އެންމެ ބޮޑު ހޭދައެއް ކުރެވެނީ ވެސް ދައުލަތުގެ މުވައްޒަފުންގެ މުސާރައާއި އިނާޔަތްތަކަށް ހިނގާ ޚަރަދުތަކަށެވެ. އެގޮތުން މި ފާއިތުވި 5 އަހަރު ދުވަހުގެ ތެރޭގައި ވެސް، ދައުލަތުގެ ބަޖެޓްގެ ރިކަރަންޓް ޚަރަދުގެ ތިން ބައިކުޅަ އެއްބަޔާ ގާތްކުރާ މިންވަރެއް މުވައްޒަފުންގެ މުސާރައާއި އިނާޔަތް ދިނުމަށް ޚަރަދުކުރެވިފައިވާކަމަށް ބަޔާންކޮށްފައިވެއެވެ.
2022 ވަނަ އަހަރާއި އަޅައިބަލާއިރު އަންނަ އަހަރު މުވައްޒަފުންނަށް ކުރާ ޚަރަދު 5.17 އިންސައްތަ އިތުރުވާނެކަމަށް ލަފާކުރެވޭ ކަމަށް ވެސް ބަޖެޓުގައި ބުނެފައިވެއެވެ. އެގޮތުން މިއީ މުސާރަ ހަމަހަމަކުރުމުގެ ސިޔާސަތުގެ ދަށުން ތައުލީމީ ދާއިރާ އާއި ސިއްހީ ދާއިރާގެ މުވައްޒަފުން މުސާރައިގެ އައު އޮނިގަނޑަކަށް ހިޖުރަކުރުމަށް ބަޖެޓުގައި ހިމަނާފައިވާތީ އައި އިތުރުވުމެއްކަން ވެސް ބަޖެޓުގައި ފާހަގަކޮށްފައިވެއެވެ.
މީގެ އިތުރުން ސިއްހީ ދާއިރާއަށް އިތުރު 1000 މުވައްޒަފުން އިތުރުކުރުމަށް ރާވައިފައިވާތީ ވެސް އެ ބައިގެ ޚަރަދު އިތުރުވާނެކަމަށް ލަފާކުރެވޭކަމަށް ބަޖެޓުގައި ބުނެއެވެ.
