އިންޑިޔާގެ 1 ބިލިއަން ވަނަ ބޭބީ މިހާރު ކޮބާ؟

އިންޑިޔާގެ އެއްބިލިއަން ވަނައަށް އުފައްވި ކުއްޖާއަށް ދީފައިވާ ނަމަކީ އާސްތާ އަރޯރާއެވެ. އޭނާ އުފަންވެފައިވަނީ 11 މޭ 2000 ވަނަ އަހަރު ޑެލްހީގެ ސަފްޑާޖުންގ ހޮސްޕިޓަލުގައެވެ. ފަތިހުގެ ވަގުތެއްގައި އޭނަ އުފަންވިތާ ދެތިން ގަޑިއިރުގެ ތެރޭގައި އިންޑިޔާގެ އެއްބިލިއަންވަނަ ރައްޔިތުގެ ގޮތުގައި ވަނީ ދުނިޔެއަށް ހާމަކޮށްފައެވެ. ފިޔާތޮށިކުލައިގެ ރަޖަޔަކަށް ލާފައި އޮތް ބޭބީ އުރުވަޑުވައިގެން ސަރުކާރު މިނިސްޓަރުން އެކި ގޮތްގޮތަށް ފޮޓޯ ނަންގަވާފައި ވެއެވެ. އަދި އަނެއްބައި މިނިސްޓަރުން ތަފާތު ވައުދުތައް ވެވަޑައިގަންނަވަމުން ގެންދެވިއެވެ. އޭނާއަށް ތައުލީމް ހިލޭކޮށްދެއްވާނެކަމާއި، ހިލޭ ސިއްހީ ފަރުވާ ހަމަޖައްސަވައިދެއްވާނެކަމާއި، ހިލޭ ރޭލު ދަތުރު ހަމަޖައްސަވާނެކަމަށާއި މިފަދަ މިފަދަ ވައުދުފުޅުތަކެވެ. ނަމަވެސް މިއިން އެއްކަމެއްވެސް ނުފުދޭކަމަށް އާއިލާއިން ބުނެފައިވެއެވެ.

އާސްތާ އުފަންވުމާއެކު އިންޑިޔާވެސް ވަނީ އާބާދީގެ ގޮތުން ޗައިނާއާއެކު "އެކްސްކްލޫސިވް" ކްލަބަކާ ގުޅިފައެވެ. އެހެނީ އެއްބިލިއަނަށްވުރެ އާބާދީ ބޮޑީ ހަމައެކަނި ޗައިނާގައިކަމަށް ވާތީއެވެ.

އާސްތާ އުފަން ވުމާއެކު އޭނާގެ މަންމައާ ބައްދަލުކޮށް ނޫސްވެރިން އައީ ތަފާތު ރިޕޯޓުތައް ލިޔަމުންނެވެ. އޭރު އެގެޔަށް ދިޔަ ބީބީސީގެ ރިޕޯޓަރަކު ވަނީ ބާވީސް އަހަރު ފަހުން އާސްތާގެ ހާލު ބަލާފައެވެ.

ނޫސްވެރިޔާ އެގެއަށް ދިއުމުން ރީތި ހިނިތުން ވެލުމަކާއެކު މަރުހަބާ ކިޔާފައިވަނީ 22 އަހަރުގެ އާސްތާކަމަށްވެއެވެ. އޭނާ ވަނީ ދާދިފަހުން ފުރަތަމަ ވަޒީފާގައި މަސައްކަތްކުރަން ފަށާފައެވެ. އޭނާއަކީ މިއަދު ޕްރައިވެޓް ހޮސްޕިޓަލެއްގެ ނަރުހެކެވެ.

އޭނާ ބުނި ގޮތުގައި އޭނާއަކީ ޚާއްސަކަމެއް ދެވުނު ޒުވާނެއްކަމުގެ އިހުސާސް ނުކުރެވޭތާ މިހާރު އެތައް އަހަރެއް ވެއްޖެއެވެ. އުފަންވިއިރު ހުރިހާ އެންމެން ދިން ޚާއްސަކަން މިހާރު ފިލައިހިނގައްޖެކަމަށް އޭނާ ބުނެފައިވެއެވެ. އަދި އޭނާ އުފަންވީއިރު އެކިއެކި ސިޔާސީ ފަރާތްތަކުން ވެވަޑައިގެންނެވި ވައުދުތައްވެސް އަދިވެސް ހުރީ ނުފުދިކަމަށް އޭނާ ބުނެފައިވެއެވެ.

އާސްތާ ބުނިގޮތުގައި އޭނާ ބޭނުންވީ ސައިންސްގެ ރޮނގުން ކުރިއަށްގޮސް ޑޮކްޓަރަކަށް ވާށެވެ. ނަމަވެސް އޭނާގެ މައިންބަފައިންނަށް އެވަރުގެ ޚަރަދެއް ކުރެވެން ނެތުމުން އޭނާގެ ހުވަފެންތައަ ދޫކޮށް، ނަރުހަކަށް ވީކަމަށް ބުނެފައިވެއެވެ. އޭނާއަކީ ސްކޫލްގައި ހުރިހާގޮތަކުންވެސް ވިދާލި ދަރިވަރެކެވެ. ނަމަވެސް ކިޔެވުމުގެ ފަހު އަހަރުތަކުގައި ފައިސާގެ ދަތިކަން ކުރިމަތިވުމުން، ސަރުކާރު ސްކޫލަކަށް ބަދަލުވާން މަޖްބޫރުވިކަމަށް ބުނެފައިވެއެވެ.

އެއްބިލިއަން ވަނަ ބޭބީއާ ބެހޭގޮތުން ނޫސްތަކުގައި ލިޔެފައި ހުރި އާޓިކަލްތައް އޭނާގެ މައިންބަފައިން އޭނާއަށް ދެއްކުމަށްޓަކައި އައީ ރައްކާކުރަމުންނެވެ. އޭނާ ބުނިގޮތުގައި، ކަމުގެ މުހިންމުކަން އޭނާއަށް އަމިއްލައަށް ފުރަތަމަ އިހުސާސްކުރެވުނީ އުމުރުން 4 ނުވަތަ 5 އަހަރުގައި އައި ވޯރލްޑް ޕޮޕިއުލޭޝަން ޑޭގައި، ކެމެރާ ކްރޫ އޭނާގެ ސްކޫލަށް ގޮސް އޭނަގެ ހަރަކާތްތައް ވީޑިއޯކުރަން ފެށުމުންނެވެ. ޓީވީއަށް އަރާލުމަކީ އޭނާވެސް ވަރަށް އުފާވި ކަމެއް ކަމަށް ބުނެފައިވެއެވެ.

އާސްތާގެ އާއިލާއިން ބުނިގޮތުގައި، އޭނާއަށް ލިބުނުހާވެސް ފައިސާގެ އިނާޔަތަކީ ޔޫ.އެން.އެފް.ޕީ.އޭ.އިން ދިން 2،425 ޔޫއެސް ޑޮލަރެވެ. އެއީ އޭރު އިންޑިޔާގެ ދެލައްކަ ރުޕީސްއެވެ. އާސްތާއަށް 18 އަހަރު ފުރުނުއިރު އެފައިސާ ހުރީ ހަތްލައްކަ ރުޕީސްއަށް އިތުރުވެފައެވެ. މިފައިސާ ބޭނުންކުރީ އޭނާގެ ނަރސިންގ ކޯހުގެ ފީއަށެވެ.

2000 ވަނަ އަހަރު އިންޑިޔާގެ އެއްބިލިއަން ވަނަ ކުއްޖާ އުފަންވިއިރު ޔޫ.އެން.އެފް.ޕީ.އޭ.އިން އަންދާޒާކޮށްފައިވަނީ އާބާދީގެ ގޮތުން އިންޑިޔާއިން ޗައިނާ ފަހަތަށް ޖައްސާލައި، ދުނިޔޭގެ އެންމެ އާބާދީ ބޮޑު ގައުމަށް 2045 ވަނަ އަހަރު ވާނެކަމަށެވެ.

ނަމަވެސް މިއަހަރުގެ ޖުލައިމަހު ޔޫ.އެން.އެފް.ޕީ.އޭ.އިން ބުނެފައިވަނީ މިކަން މިއަންނަ އަހަރު، އާދެ 2023ގައި ވާނެކަމަށެވެ. މި އަންނަ އަހަރު އިންޑިޔާގެ އާބާދީ 1.4 ބިލިއަނަށް އަރާނެއެވެ. އަދި މިއަހަރުގެ ނޮވެމްބަރު މަހު މުޅި ދުނިޔޭގެ އާބާދީ 8 ބިލިއަނަށް އަރާނެކަމަށް ޔޫ.އެން.އެފް.ޕީ.އޭ.އިން އަންދާޒާކޮށްފައިވެއެވެ.

އާސްތާ އެދެނީ އިންޑިޔާގެ އާބާދީ ދުވަހަކުވެސް 2 ބިލިއަނަށް ނޭރުމެވެ. އޭނާ ބުނިގޮތުގައި، މީހުން ގިނަވުމުން ދިމާވާ އެންމެ ބޮޑު އެއް މައްސަލައަކީ އެއް ކަމަކަށް މާގިނަ މީހުން ކުރިމަތިލުމެވެ. އެއީ ސްކޫލްގެ ޖާގައަކަށް ވިޔަސް، އަދި ވަޒީފާއަކަށް ވިޔަސް ވެހެވެ.

އޭނަ ބުނިގޮތުގައި، އިންޑިޔާގެ އާބާދީ އެވަރަށް ބޮޑުވެގެން ދިޔައީ ފިރިހެން ކުއްޖަކު ލިބެންދެން އަންހެނުންނަށް ވިހަން ޖެހޭތީއެވެ. ގިނަ ފިރިހެނުން ގަބޫލުކުރާގޮތުގައި އެމީހުންގެ ނަން ދެމެހެއްޓޭނީ ފިރިހެން ދަރިއަކު ލިބިގެންނެވެ. މި ވިސްނުން ބަދަލުކުރަން ސަރުކާރުން މަސައްކަތްކުރަން އެބަ ޖެހޭކަމަށް އާސްތާ އަރޯރާ ބުނެފައިވެއެވެ.