ބަދަވީ އަންހެނުންގެ މި ހޮހަޅާގައި ހިނގާ ކަންކަން ވަރަށްވެސް ތަފާތު!
29 އޮކްޓޯބަރު 2022 | ހޮނިހިރު 07:06އެ ހޮހަޅަ ޚިޔާރު ކުރަން ޖެހުނީ، އެނޫން އެހެން ތަނެއްގައި ފިހާރަ އަޅަން އިޒްރޭލުން ހުއްދަ ނުދިނުމުން
ސުސްޔާގެ ރަށްވެހިންގެ އަމިއްލަ އުފެއްދުންތަކުގެ ތެރޭގައި؛ މާޖަހައިގެން ތައްޔާރުކޮށްފައި ހުންނަ ފަންނުވެރި ސާމާނުގެ އިތުރުން، ސައިބޯންޏާއި ޒައިތޫނި ތެލާއި އަސާރަވެސް ހިމެނޭ
ފިހާރައެކޭ ބުނުމުން ކޮންމެ މީހެއްގެ ޚިޔާލަށް އެންމެ ފުރަތަމަ ގެނެވޭނީ 4 ފާރުގެ އެތެރެ، ކޮންމެވެސް ގޮތަކަށް ފަރުމާކޮށްގެން ވިޔަފާރި މުއާމަލާތް ހިންގާ ތަނެކެވެ. ނުވަތަ އަދުގެ ޓެކްނޮލޮޖީގެ ތަރައްގީން ފަހިކޮށްދީފައިވާ ކޮންމެވެސް އޮންލައިން ޕްލެޓްފޯމެއްގައި ހިންގާ އޮންލައިން ފިހާރައެކެވެ. ނަމަވެސް ފަލަސްތީނުގެ ސުސްޔާގައި ހުންނަ މި ފިހާރައަކީ މި ދެންނެވިފަދަ ހާލަތްތަކުންކުރެ ހާލަތަކަށް ފެތޭ ފިހާރައެއް ނޫނެވެ. ފަލަސްތީނު އަންހެނުންގެ މާޖެހުމުގެ ފަރުމާތަކާއި، އަތްތެރި މަސައްކަތުގެ އެކި އުފެއްދުންތައް ވިއްކަން ހުންނަ މި ފިހާރަ ހުންނަނީ ހުޅަނގު އައްސޭރީގެ ފަރުބަދައެއްގައިވާ ހޮހަޅައެއްގެ ތެރޭގައެވެ.
ފާތިމާ އައްނުވާޖާއަކީ، ފަލަސްތީނުގެ އަވަށެއްކަމަށްވާ ސުސްޔާގެ ޓެންޓުތަކާއި ހޮހަޅަތަކުގައި މިހާރު ދިރިއުޅެމުންދާ މަދު މީހުންގެ ތެރޭގައި ހިމެނޭ އެކަކެވެ. ސުސްޔާއަކީ ހުޅަނގު އައްސޭރީގެ ދެކުނުން ޔަހޫދީން ވެރިވެގެންފައިވާ ސަރަހައްދުތަކާ، އުތުރުން ޔަހޫދީންގެ ކޮންޓްރޯލްގެ ދަށަށް ގެންގޮސްފައިވާ ތާރީޚީ ސައިޓަކާ ދެމެދު އޮންނަ ފަރުބަދަމަތީ ސަރަހައްދުގައި ފެތުރިފައި އޮންނަ، ފަލަސްތީނުގެ އަވަށެކެވެ.
ހުޅަނގު އައްސޭރީގެ ހިބްރޫން ހިލްސްގައި ވަޒަންވެރިވެ އުޅޭ ބަދަވީ އަންހެނުންގެ މަސައްކަތަކަށް ވެފައި ވަނީ އޮންނަނީ މާޖެހުމުގެ އެކި ހުނަރުތަކާއި އަތްތެރިކަމުގެ ހުނަރު ބޭނުންކޮށްގެން ތަފާތު އެކި ކަހަލަ އުފެއްދުންތައް އުފައްދައި، ހޮހަޅަ ފިހާރާގައި ވިއްކުމެވެ.
ސުސްޔާއަށް ޒިޔާރަތްކުރާ ގިނަ އަދަދެއްގެ ބިދޭސީން ނުވަތަ ފަތުރުވެރިންނަކީ، ސުސްޔާގެ ރަށްވެހިންގެ އަމިއްލަ އުފެއްދުންތައް ގަންނަ ބައެކެވެ. ސުސްޔާގެ ރަށްވެހިންގެ އަމިއްލަ އުފެއްދުންތަކުގެ ތެރޭގައި މާޖަހައިގެން ތައްޔާރުކޮށްފައި ހުންނަ ފަންނުވެރި ސާމާނުގެ އިތުރުން، ސައިބޯންޏާއި ޒައިތޫނި ތެލާއި އަސާރަވެސް ހިމެނެއެވެ.
ސުސްޔާ ސަރަހައްދުގެ ހޮހަޅަތައް މައިގަނޑު ގޮތެއްގައި އޮންނަނީ 3 ބަޔަކަށް ބައިކޮށްފައެވެ. އެއީ ދިރިއުޅެން ޚާއްސަ ސަރަހައްދާއި، ގުދަން ކުރާ ސަރަހައްދުގެ އިތުރުން ބަދިގެ ސަރަހައްދެވެ. ނަމަވެސް މި ހޮހަޅަ ފަރުމާކޮށްފައިވަނީ ފިހާރައެއްގެގޮތުގައި ބޭނުންކުރުމަށެވެ. އަވަށުގެ އަންހެނުންނަށް އަބުރުވެރި ދިރިއުޅުމެއް ހޯދައިދީ، އަމިއްލައަށް އާމްދަނީއެއް ހޯދޭނެ މަގު ތަނަވަސްކޮށްދިނުމުގެ ބޭނުމުގައެވެ.
ހުޅަނގު އައްސޭރީގެ ފަރުބަދަތަކުގެ ތެރޭގައި ވަނީ ކިތައް ހޮހަޅަކަން އެނގޭނެ ރަސްމީ ހިސާބުކިތާބެއް ނެތެވެ. ނަމަވެސް ގިނަ އަދަދެއްގެ ހޮހަޅަތައް ހުރީ އޭރިއާ-ސީއޭ ކިއުނު ސަރަހައްދުގައެވެ. އެއީ 1993 ވަނަ އަހަރުގެ އޮސްލޯ އެއްބަސްވުމުގެ ދަށުން، އިޒްރޭލުގެ ފުރިހަމަ ކޮންޓްރޯލް ހިންގާ ސަރަހައްދެކެވެ.
ހުޅަނގު އައްސޭރީގެ ފަރުބަދަތަކުގެ ތެރޭގައި ހުންނަ ހޮހަޅަތަކަކީ ފުން މިނުގައި 60 މީޓަރު ހުންނަ ހޮހަޅަތަކެކެވެ. ހޮހަޅައަށް ވަންނަ ދޮރުތައް ހަދާފައި ހުންނަނީ ހިލަ ކަނޑައިގެންނެވެ.
