އަކްޝޭއާ ބައްދަލު ކުރަން ހިނގާފަ 900 ކިލޯމީޓަރު ކަނޑަތުކޮށްފި
އޭނާ ވަނީ 18 ދުވަސް ހޭދަކޮށްފައި
އަލީ ސަމާޚް | 2 ސެޕްޓެމްބަރު 2019 | ހޯމަ 13:28
އަކްޝޭ އާއި އޭނާގެ ފޭން ޕްރަބާތް
ބޮލީވުޑްގެ އެކްޓަރު އަކްޝޭ ކުމާރްއާ ބައްދަލުކުރަން އޭނާގެ ފޭނެއް ކަމަށްވާ ޕްރަބާތް 900 ކިލޯ މީޓަރު ހިނގާފައި މުމްބާއި އަށް ގޮސްފިއެވެ.
އަކްޝޭ ވަނީ ޕްރަބާތްއާ އެކު ނަގާފައިވާ ފޮޓޯއަކާއި ވީޑިއޯއެއް ޓްވިޓާގައި ޝެއާ ކޮށްފައެވެ. އެ ޓްވީޓްގައި ޕްރަބާތް ބުނީ، 900 ކިލޯމީޓަރު ހިނގާފައި އަކްޝޭއަށް ބައްދަލުކުރަން ދިޔައީ އޭނާ އަކީ އަކްޝޭ ގޮތަށް ފިޓް މީހެއްކަން ދައްކުވައި ދިނުމަށް ކަމަށެވެ. ގުޖުރާތްގެ ސްޓޭޓްގެ ގްވާކް އިން ހިނގާފައި މުމްބާއި އަށް ދާން ޕްރަބާތް ވަނީ 18 ދުވަސް ހޭދަކޮށްފައެވެ. އާދިއްތަ ދުވަހު އޭނާ އަށް މުމްބާއި އަށް ދެވުނީ ރޭގަނޑު ގަޑީގައިވެސް ހިނގައިގެންނެވެ.
ދެން އިތުރަށް އެގޮތަށް ކަންތައް ނުކުރުމަށް އަކްޝޭ ވަނީ ޕްރަބާތް އަށް ނަސޭހަތް ދީފައެވެ.
