އަންނަ ނޮވެމްބަރު މަހު ގަތަރުގައި ފަށާ ފީފާ ވޯލްޑް ކަޕްގައި ފްރާންސް ޓީމުގައި ހިމަނާނީ މުޅިން ފިޓު ކުޅުންތެރިންކަމަށް، އެ ޓީމުގެ ކޯޗު ޑިޑިއޭ ޑެޝޯމްޕްސް ބުނެފިއެވެ.

ޑެޝޯމްޕްސް މިހެން ބުނީ، މެންޗެސްޓަރ ޔުނައިޓެޑަށް ކުޅެމުން އަންނަ ފްރާންސްގެ ޑިފެންޑަރު ރަފެއެލް ވެރާންއަށް އަނިޔާވެފައިވާ ވަގުތެއްގައެވެ. ޔުނައިޓެޑުން ޗެލްސީއާ ދެކޮޅަށް ކުޅުނު މެޗުގައި ވެރާންގެ ފައިގެ ފަލަމަސްގަނޑަށް ލިބުނު އަނިޔާއެއްގެ ސަބަބުން އޭނާ ވަނީ ބަދަލުކޮށްފައެވެ. އޭނާ ދަނޑުން ފައިބައިގެން ދިޔައީ ރޮމުންނެވެ.

އަނިޔާގެ ސަބަބުން ކުޅުމާ ދުރުގައި މަހެއްހާ ދުވަހު ވެރާން ހުންނަންޖެހިދާނެއެވެ. އެހެންކަމުން ނޮވެމްބަރު މަހުގެ 20 ވަނަ ދުވަހު ފީފާ ވޯލްޑް ކަޕް ފެށެންވާއިރަށް ވެރާން ފިޓުވެދާނެކަމާމެދު ވަނީ ސުވާލު އުފެދިފައެވެ. ޔުނައިޓެޑުގެ ކޯޗު އެރިކް ޓެން ހާގް ވަނީ، ވޯލްޑް ކަޕްގެ ކުރިން ޔުނައިޓެޑުގެ ހުރިހާ މެޗެއް ވެރާންއަށް ގެއްލިދާނެކަމަށްވެސް ބުނެފައެވެ. ޓެން ހާގް ބުނީ ވެރާން ސްކޮޑުގައި ނުހިމަނާ ކަމަށާއި، ވޯލްޑް ކަޕާ ޖެހެންދެން އޭނާ މެޗަކުން ފެންނާނެކަމަށް ނުބެލެވޭ ކަމަށެވެ.

އެކަމާގުޅިގެން ޑެޝޯމްޕްސް ބުނީ، އަނިޔާގައި ހުރި ކުޅުންތެރިޔަކު ސްކޮޑަށް ނަގަން އޭނާ ބޭނުންނުވާ ކަމަށެވެ. ޚާއްސަކޮށް ވޯލްޑް ކަޕް ކަހަލަ ބޮޑު މުބާރާތަކާ ކުރިމަތިލާއިރު އެއީ އޭނާ ކުރާނެ ކަމެއް ނޫންކަމަށްވެސް ޑެޝޯމްޕްސް ބުންޏެވެ. އޭނާ ބުނީ، މުބާރާތް ފެށޭއިރު ނުކުޅޭވޭ ކުޅުންތެރިޔަކު އޭނާ ނަގަން ބޭނުންނުވާ ކަމަށެވެ.

ވެރާންގެ އިތުރުންވެސް ފްރާންސަށް ވަނީ އަނިޔާގެ މައްސަލަތަކާ ކުރިމަތިލާން ޖެހިފައެވެ. 2018 ވަނަ އަހަރު އެ ޓީމުން މުބާރާތް ކާމިޔާބުކުރިއިރު މޮޅު ކުޅުމެއް ދެއްކި އެންގޯލޯ ކާންޓޭއަށް އަނިޔާގެ ސަބަބުން މިއަހަރުގެ މުބާރާތުގައި ނުކުޅެވޭނެއެވެ. މީގެ އިތުރުންވެސް ޕައުލް ޕޮގްބާ، ލޫކަސް ހެނާންޑޭޒްފަދަ މުހިންމު ކުޅުންތެރިން މުޅިން ފިޓެއްނުވެއެވެ. ނަމަވެސް މިހާރު ޕޮގްބާ އަންނަނީ ޔުވެންޓަސްގެ ފަރިތަކުރުންތަކުގައި ބައިވެރިވަމުންނެވެ.