މިއުވާންގެ ފާޑުކިޔުން ރައީސް ޔާމީން އަށް: "ފައިސާ"ގެ ވާހަކަ ނުލާ ފަހަކަށް އައިސް އެއްވެސް ވާހަކައެއް ނުދެއްކެވޭ"
އިނގިރޭސި ސަރުކާރާއެކު 1992ގައި އެއްބަސްވުމަކަށް އާދެވުނު
ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން ބޭއްވެވި ނޫސްވެރިންގެ ބައްދަލުވުން
ފައިސާގެ ވާހަކަ ނުދައްކަވާ ކުރީގެ ރައީސް އަބްދުﷲ ޔާމީން އަށް އެއްވެސް ވާހަކަ އެއް ފަހަކަށް އަައިސް ނުދެއްކެވޭ ކަމަށް ވިދާޅުވެ ރައީސް އޮފީހުގެ ތަރުޖަމާނު މިއުވާން މުހައްމަދު ރައީސް ޔާމީން އަށް ވަރަށް ބޮޑަށް ފާޑު ވިދާޅުވެއްޖެއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިއުވާން މިފަދައިން ވިދާޅުވެފައި ވަނީ ޗާގޮސް މައްސަލައިގައި މި ސަރުކާރުން ފައިސާ ނަގާފައިވާ ކަމަށާއި ސަރުކާރުން ޑީލް ހަދާފައިވާ ކަމަށް ބުނެ ރައީސް ޔާމީން ދައްކަވާފައިވާ ވާހަކަތަކާއި ގުޅިގެން "ރާއްޖެ އެމްވީ" އިން ކުރި ސުވާލަކަށް ޖަވާބުދެއްވަމުންނެވެ. މިއުވާން ވަނީ ރައީސް ޔާމީން އާއި އިދިކޮޅު ފަރާތްތަކުން ދައްކަވާ އެފަދަ ވާހަކަތަކަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށް ވިދާޅުވެފައެވެ. ޗާގޮސް އަކީ މޮރިޝަސްގެ ބައެއް ކަމަށް ރާއްޖޭން ގަބޫލުކުރާނެ ކަމަށް އެއްބަސްވެ އެގައުމުގެ ބޮޑުވަޒީރަށް ރައީސް ޞާލިހް ފޮނުއްވި ސިޓީފުޅަށް އިޝާރާތްކުރައްވާ ރައީސް ޔާމީން ވަނީ އެއީ ގައުމު ވިއްކާލުން ކަމަށް ވެސް ވިދާޅުވެފައެވެ. އެފަދަ ވާހަކަތަަކަށް އިޝާރާތްކުރައްވާ މިއުވާން ވިދާޅުވީ އެފަދަ ވާހަކަތައް ދައްކަނީ އޮޅުވާލުމުގެ ނިޔަތުގައި ކަމަށާއި މި މައްސަލައިގެ ލިޔެކިޔުންތައް ބެލުމުން އެކަން ވަރަށް ރަނގަޅަށް ހާމަވާނެ ކަމަށް ވެސް މިއުވާން ވަނީ ވިދާޅުވެފައެވެ.
މިއުވާން އިތުރަށް ވިދާޅުވީ ޗާގޮސްގެ މައްޗަށް މޮރިޝަސްގެ ބާރު ހިނގާނެ ކަމަށް ނިންމީ ރާއްޖޭން ނޫން ކަމަށާއި އެގޮތަށް ނިންމީ އިންޓަނޭޝަނަލް ކޯޓު، އައިސީޖޭ އިން ކަމަށެވެ. އެހެންކަމުން އެ މައްސަލައިގާ ރާއްޖޭގެ ސިޔާސަތު ބަދަލުވުމުގެ ސަބަބުން ރާއްޖެ އަށް ވާނެ ގެއްލުމެއް ނެތް ކަމަށާއި އެކަމުން ވާނީ ފައިދާ ކަމަށް މިއުވާން ވިދާޅުވިއެވެ. އެގޮތުން އެއީ ބައިނަލްއަގުވަމީ މުޖުތަމައުގައި ރާއްޖެ އިތުރަށް ބަލައިގަންނަނާނެ ކަމެއް ކަމަށް މިއުވާން ވަނީ ފާހަގަކުރައްވާފައެވެ. މީގެ އިތުރުން 2019 ވަނަ އަހަރު މޮރިޝަސްއާ ދެކޮޅަށް ވޯޓު ދިނުމުން ޕީޕީއެމުން އޭރު ކަންބޮޑުވުން ފާޅުކުރި ނަމަވެސް ޕީޕިއެމް ސަރުކާރުގައި މި މައްސަލައިގައި ވޯޓު ދިން ގޮތުގެ ތަފްސީލް ވެސް ހިއްސާކޮށްފައި ނުވާތީ މިއުވާން ވަނީ އެކަމަށް ވެސް ފާޑު ވިދާޅުވެފައެވެ.
ހަމައެހެމެންމެ ޗާގޮސް އައިލޭންޑް ނުވަތަ ފޯޅަވައްސާއި ދިވެހިރާއްޖެ އާ ދެމެދު ހިމެނޭ ކަނޑުގެ ސަރަހައްދު ހަަމަހަމައަށް ބަަހަން ދިވެހި ސަރުކާރުން އިނގިރޭސި ސަރުކާރާއެކު 1992ގައި އެއްބަސްވުމަކަށް އާދެވުނު ކަން އެނގެން އޮތް އިރު މި މައްސަލައިގައި ސަރުކާރަށް އެންމެ ބޮޑަށް ފާޑުވިދާޅުވާ ބޭފުޅުންގެ ތެރޭގައި މި މަރުހަލާގައި ބައިވެރިވި މީހުން ހިމެނޭ ކަމަށް ވެސް މިއުވާން ވިދާޅުވިއެވެ.
