ޑައިނަމޯ ޒަގްރެބް ބަލިކޮށް އޭސީ މިލާން ދެ ވަނަ ބުރާ ގާތަށް

ޔުއެފާ ޗެމްޕިއަންސް ލީގުގައި ޑައިނަމޯ ޒަގްރެބް ބަލިކޮށް އޭސީ މިލާނުން ދެ ބުރުގެ ޖާގައަކާ ގާތަށް ޖެހިލައިފިއެވެ.

ގްރޫޕް އީގައި އަންގާރަ ދުވަހުގެ ރޭ ޒަގްރެބްގެ ދަނޑުގައި ކުޅުނު މެޗު މިލާނުން ކާމިޔާބުކުރީ 4-0 އިންނެވެ. މިލާން އޮތީ މި ގްރޫޕްގެ ދެ ވަނައިގައެވެ.

މެޗުގައި މިލާނުން ލީޑު ނެގީ 39 ވަނަ މިނެޓުގައެވެ. އެއީ ޓޮނާލީ ތަނަވަސްކޮށްދިން ފުރުސަތެއްގައި މަޓެއޯ ގަބިއާ ޖެހި ލަނޑުންނެވެ. މިލާންގެ ފަހު ތިން ލަނޑު ފެނުނީ މެޗުގެ ދެ ވަނަ ހާފުގައެވެ. ދެ ވަނަ ހާފުގެ 49 ވަނަ މިނެޓުގައި މިލާންގެ ދެ ވަނަ ލަނޑު ޖެހީ ރަފައެލް ލެއާއޯއެވެ. އެ ޓީމުގެ ތިން ވަނަ ލަނޑަކީ 59 ވަނަ މިނެޓުގައި ލިބުނު ޕެނަލްޓީއެއްގައި އޮލިވިއޭ ޖިރޫޑް ޖެހި ލަނޑެކެވެ. ހަތަރު ވަނަ ލަނޑަކީ ޒަގްރެބްގެ ރޮބާޓް ލުބިޗިޗް އަތުން ބައިކޮޅަށް ވަން ލަނޑެކެވެ.

މެޗުން މޮޅުވެ މިލާން އޮތީ ގްރޫޕްގެ ދެ ވަނަ މަގާމުގައެވެ. އެއީ ފަސް މެޗުން ހަތް ޕޮއިންޓު ހޯދައިގެންނެވެ. ޒަގްރެބަށް ލިބެނީ ފަސް މެޗުން ހަތަރު ޕޮއިންޓާއެކުއެވެ. މި ގްރޫޕުން ދެ ވަނަ ބުރުގެ ފަހު ޖާގަ ހޯދަން މިލާނަށް ބޭނުންވަނީ ފަހު މެޗުން މޮޅެކެވެ. މި ގްރޫޕްގެ އެއް ވަނައިގައި ދެ ވަނަ ބުރަށް ދަތުކުރީ ޗެލްސީއެވެ.