ފުލުހުންގެ ބެލުމުގެ ދަށުގައި ހުއްޓާ މީހަކު މަރުވި މައްސަލައެއް ބަލަމުން އަންނަ ކަމަށް މިނިސްޓަރ އޮފް ހޯމް އެފެއަރޒް އިމްރާން އަބްދުﷲ ވިދާޅުވެއްޖެއެވެ.

އަންގާރަ ދުވަހު ކުރެއްވި ޓްވީޓެއްގައި އިމްރާން ވިދާޅުވީ މަރުވެފައިވަނީ ކުށުގެ ތުހުމަތުގައި ފުލުހުންގެ ބެލުމުގައި ދަށުގައި ހުރި މީހެއްކަމަށެވެ. އެ މައްސަލަ ޕްރޮފެޝަނަލް ސްޓެންޑަރޑްސްއިން މިހާރު ބަލަން ފަށާފައިވާ ކަމަށްވެސް އޭނާ ވިދާޅުވިއެވެ.

އިމްރާން ވިދާޅުވީ ޕްރޮފެޝަނަލް ސްޓެންޑަރޑްސްގެ އިތުރުން، ކަމާ ގުޅުންހުރި އެހެނިހެން އިދާރާތަކުންވެސް އެ މައްސަލައަށް ޚާއްސަ ސަމާލުކަމެއް ދީގެން ބެލުމަށް ދަންނަވާފައިވާނެ ކަމަށެވެ.

މީގެ އިތުރުން މި މައްސަލައިގައި ފުލުހުން އިހުމާލުވެފައިވާކަމަށް ނުވަތަ އަނިޔާވެރި އަމަލެއް ހިންގާފައިވާކަމަށް ތަހުގީގަށް ސާބިތުވެއްޖެނަމަ އަޅަންޖެހޭ ފިޔަވަޅެއް އަޅާނެ ކަމަށްވެސް އިމްރާން ވިދާޅުވިއެވެ. އަދި ފިޔަވަޅު އެޅުމުގައި ފަސް ނުޖެހޭނެ ކަމަށްވެސް ވިދާޅުވިއެވެ.

ފުލުހުން ބުނީ، މަރުވެފައިވަނީ އަންގާރަ ދުވަހު ގދ. ހޯނޑެއްދޫއިން ފުލުހުންގެ ބެލުމުގެ ދަށަށް ގެންދިޔަ އުމުރުން 43 އަހަރުގެ ދިވެހި ފިރިހެނެއް ކަމަށެވެ. އޭނާގެ މެޔަށް ތަދެއް އަރައި، ސީޒާއެއް ޖެހުންފަދަ އަލާމާތްތަކެއް ފެނުމާ ގުޅިގެން ގދ. މަޑަވެލީ ހެލްތު ސެންޓަރަށް ގެންދިޔަކަމަށާއި، ހެލްތު ސެންޓަރަށް ގެންދިޔައިރުވެސް އޭނާ މަރުވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުނެއެވެ.

އެ މީހާ މަރުވި ސަބަބު ދެނެގަތުމަށް އޮޓޮޕްސީ ހެދުމަށްވެސް ފުލުހުން ވަނީ ނިންމާފައެވެ. އަދި މިހާދިސާއާގުޅޭ މައުލޫމާތު ނޭޝަނަލް އިންޓެގްރިޓީ ކޮމިޝަނާއި އެޗްއާރުސީއެމްއާ ހިއްސާ ކޮށްފައިވާ ކަމަށްވެސް ފުލުހުން ބުންޏެވެ.

ފުލުހުން ބުނީ އޭނާ ފުލުހުންގެ ބެލުމުގެ ދަށަށް ގެންދިޔައީ ކުއްޔަށް ހިފާފައިވާ ލޯންޗެއްގައިކަމަށާއި، އެ ލޯންޗުގައި އާއްމުންވެސް ތިބިކަމަށެވެ.