ސަބްސިޑީގެ ފައިދާ ލިބޭ މީހުންގެ ތެރޭގައި މުއްސަނދިންނާއި ބިދޭސީންނާއި ވިޔަފާރިވެރިން އަދި ފަތުރުވެރިން
ސަބްސިޑީއަކީ ފަގީރުންނަށް ހާއްސަކޮށްގެން ދެވޭ ސަބްސިޑީގެ ބަދަލުގައި ހުރިހާ އެންމެންނަށް ވެސް ލިބޭ ސަބްސިޑީއެއް
ކަރަންޓު ބިލު - ކަރަންޓަށްދޭ ސަބްސިޑީ ވެސް ހުރިހާ އެންމެންނަށް ލިބޭ
މިހާރު ދޭ ސަބްސިޑީ އިސްތިސްނާއެއް ނެތި ރާއްޖެ އަންނަ ފަރާތްތަކާއި ދިރިއުޅޭ ފަރާތްތަކަށް ލިބެމުންދާ ކަމަށް ފިނޭންސް މިނިސްޓްރީން ބުނެފިއެވެ.
ފިނޭންސް މިނިސްޓްރީން މިކަން ހާމަކޮށްފައިވަނީ، ކަރަންޓުގެ އަގު ކޮންޓްރޯލްކުރަން ފާއިތުވި 3 އަހަރު ދައުލަތުގެ ބަޖެޓުން ސަބްސިޑީޒްގެ ގޮތުގައި ހޭދަވެފައިވާ ޖުމްލަ އަދަދަކީ ކޮބައިތޯ އަދި ސަބްސިޑީ ދޫކުރުމުގައި ކެރިފޯރުންތެރިންނާއި ފަގީރުން ބަލާ މިންގަނޑެއް އޮވޭތޯއާއި ސަބްސިޑީޒް ދޫކުރުމުގައި ކުދި އަދި މެދުފަންތީގެ ވިޔަފާރިތަކަށް އިސްކަންދޭނެ އުސޫލެއް ކަނޑައެޅިފައިވޭތޯ ބެލުމަށް މާފަންނު މެދު ދާއިރާގެ މެންބަރު އިބްރާހިމް ރަޝީދު، ފިނޭންސް މިނިސްޓަރު އިބްރާހިމް އަމީރާއި ލިޔުމުން ޖަވާބު ދެއްވުމަށް ހުށަހެޅި ސުވާލާއި ގުޅިގެންނެވެ.
ފިނޭންސް މިނިސްޓްރީން ބުނެފައިވަނީ ކާބޯތަކެތީގެ ސަބްސިޑީޒްގެ ވަރަށް ކުޑަ މިންވަރެއް (0.1 އިންސައްތަ) ފިޔަވައި ސަރުކާރުން މިހާރު ދޭ ހުރިހާ ސަބްސިޑީއަކީ އިންޑައިރެކްޓް ސަބްސިޑީގެ ގޮތުގައި ތަކެތި ނުވަތަ ހިދުމަތް ފޯރުކޮށްދޭ ފަރާތަށް ދޭ ސަބްސިޑީއެއް ކަމަށެވެ.
ފިނޭންސް މިނިސްޓްރީން ބުނީ މި ސަބްސިޑީއަކީ ފަގީރުންނަށް ހާއްސަކޮށްގެން ދެވޭ ސަބްސިޑީގެ ބަދަލުގައި ހުރިހާ އެންމެންނަށް ވެސް ލިބޭ ސަބްސިޑީއެއް ކަމަށެވެ. މިހާރު ސަބްސިޑީގެ ފައިސާ ލިބޭ ފަރާތްތަކުގެ ތެރޭގައި މުއްސަނދިންނާއި ބިދޭސީންނާއި ވިޔަފާރިތަކާއި ފަތުރުވެރިން ވެސް ހިމެނޭ ކަމަށެވެ. އަދި ބިޔަފާރިތަކަށް ދެވޭ ސަބްސިޑީއަކީ ވެސް ސަބްސިޑީ ހައްގުވާ ހުރިހާ ވިޔަފާރިތަކަކަށް އެއްވަރަކަށް ދެވޭ ސަބްސިޑިއެއް ކަމަށެވެ.
މީގެ އިތުރުން ނެޝަނަލް ސޯޝަލް ޕްރޮޓެކްޝަން އެޖެންސީ މެދުވެރިކޮށް ފަގީރު ހާލަތުގައި ދިރިއުޅޭ އާއިލާތަކަށް ކާޑު ފޯރުކޮށްދިނުމުގެ ގޮތުން އެއިދާރާއިން ކާބޯތަކެތީގެ ސަބްސިޑީ ދޭ ކަމަށެވެ. މި ސަބްސިޑީއަށް ޝަރުތުހަމަވާ އާއިލާއެއް ކަމުގައި ބަލާނީ ރާއްޖޭގެ ޕަވަރޓީލައިނަށް ވުރެ މަދުން އާމްދަނީ ލިބޭ އާއިލާތަކަށް ކަމަށެވެ. މިއީ އަމިއްލައަށް އެދުމުން ދެވޭ ސަބްސިޑީއެކެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން، ފިއުލްސަބްސިޑީ ހިމަނައިގެން ސަބްސިޑީގެ ގޮތުގައި 2019 ވަނަ އަހަރު 491 މިލިއަން ރުފިޔާ އަދި 2020 ވަނަ އަހަރު 160 މިލިއަން ރުފިޔާ ވަނީ ހަރަދުކޮށްފައެވެ. 2021 ވަނަ އަހަރު ސަބްސިޑީއަށް އެކަނި 99.8 މިލިއަން ރުފިޔާ ހަރަދުކޮށްފައިވާ އިރު، އެ އަހަރު ފިއުލް ސަބްސިޑީގެ ގޮތުގައި 460 މިލިއަން ރުފިޔާ ވަނީ ހަރަދުކޮށްފައެވެ.
ކަރަންޓް އަގުހެޔޮކުރުމުގެ ގޮތުން 2019 ވަނަ އަހަރު 468.4 މިލިއަން ރުފިޔާ، 2020 ވަނަ އަހަރު 661.4 މިލިއަން ރުފިޔާ އަދި 2021 ވަނަ އަހަރު 735.5 މިލިއަން ރުފިޔާ ވަނީ ހަރަދުކޮށްފައެވެ.
ކާބޯތަކެތީގެ އަގުހެޔޮކުރުމުގެ ގޮތުން 2019 ވަނަ އަހަރު 321 މިލިއަން ރުފިޔާ، 2020 ވަނަ އަހަރު 422.9 މިލިއަން ރުފިޔާ އަދި 238.9 މިލިއަން ރުފިޔާ ވަނީ ހަަރަދުކޮށްފައެވެ.
ސަބްސިޑިއާއި އެހީގެ ގޮތުގައި 2019 ވަނަ އަހަރު ޖުމްލަ 1.3 ބިލިއަން ރުފިޔާ، 2020 ވަނަ އަހަރު 1.26 ބިލިއަން ރުފިޔާ އަދި 2021 ވަނަ އަހަރު 1.596 ބިލިއަން ރުފިޔާ ވަނީ ހަރަދުކޮށްފައެވެ.
މީގެ އިތުރުން ފާއިތުވެދިޔަ 3 އަހަރު ދައުލަތުގެ ބަޖެޓުން މަސްވެރިންގެ ފިއުލް ސަބްސިޑީއަށް ކޮށްފައިވާ ހަރަދުތައް ވެސް ވަނީ ހާމަކޮށްފައެވެ. މި ތަފާސްހިސާބުތައް ދައްކާގޮތުން، 2019 ވަނަ އަހަރު 167،280 ރުފިޔާ މަސްވެރިންގެ ފިއުލް ސަބްސިޑީއަށް ހަރަދުކޮށްފައިވާ އިރު، 2020 ވަނަ އަހަރު 1.32 މިލިއަން ރުފިޔާ އަދި 2021 ވަނަ އަހަރު ވެސް 1.32 މިލިއަން ރުފިޔާ ވަނީ ހަރަދުކޮށްފައެވެ.
މަސްވެރިންގެ ސަބްސިޑީ ދެނީ ފިޝަރީޒް މިނިސްޓްރީ މެދުވެރިކޮށެވެ. މަސްވެރިން ތެޔޮ ގަތުމަށްފަހު މިނިސްޓްރީގައި އެދުމުން ތެލަަށް ކުރި ހަރަދުގެ ތެރެއިން އިމްޕޯޓް ޑިއުޓީއަށް ޖެހޭ މިންވަރު (5 އިންސައްތަ) މިނިސްޓްރީ މެދުވެރިކޮށް މަސްވެރިންނަށް އަނބުރާ ފޯރުކޮށްދެއެވެ.
