އައިޖީއެމްއެޗްގެ ހިޔަލަ ވިންގުގެ ލިފްޓަށް ދިމާވި މައްސަލަ ހައްލުކޮށް، އެ ވިންގުން ދެމުން އައި ޚިދުމަތްތައް އަލުން އެތަނަށް ބަދަލުކޮށްފައިވާކަމަށް އެ ހޮސްޕިޓަލުން ބުނެފިއެވެ.
ހޯމަ ދުވަހު ނެރުނު ބަޔާނެއްގައި އައިޖީއެމްއެޗުން ބުނީ, އަލުން ޚިދުމަތްތައް ބަދަލުކުރަނީ އަންގާރަ ދުވަހުން ފެށިގެންކަމަށެވެ.
ލިފްޓުގައި މައްސަލަޖެހި، ހިޔަލަ ވިންގުން ދެމުން އައި ބައެއް ޚިދުމަތްތައް ބަދަލުކުރީ ދަރުމަވަންތަ ހޮސްޕިޓަލަށެވެ. މި ބަދަލު ގެނައީ މި މަހުގެ 16 ވަނަ ދުވަހުއެވެ.
އެ ވިންގުގެ ދެވަނަ ފަންގިފިލާއިން ދެމުން ގެންދިޔަ އިމަރޖެންސީ ޚިދުމަތްތައް ބަދަލުކުރީ ޓްރޯމާ އެންޑް އިމަރޖެންސީ ޑިޕާޓްމެންޓުގެ އައިސޮލޭޝަން އޭރިއާއިން ކަމަށް އައިޖީއެމްއެޗުން ބުނެއެވެ. އަދި ހިޔަލަ ވިންގުގައި އެޑްމިޓްކުރަންޖެހޭ ބަލިމީހުން ދެން އެޑްމިޓްކުރަމުން އައީ ދަރުމަވަންތަ ހޮސްޕިޓަލުގެ 12، 16 އަދި 17ވަނަ ފަންގިފިލާގައެވެ.
ލިފްޓުގައި މައްސަލަ ޖެހުނު ނަމަވެސް ހިޔަލަ ވިންގުގެ ފުރަތަމަ ފަންގިފިލާއިން ދެމުންއަންނަ އޯޕީޑީގެ ޚިދުމަތަށް އެއްވެސް ބަދަލެއް ނުގެނެެއެވެ. އަދި 10 ވަނަ ފަންގިފިލާއިން ދެމުން އަންނަ އެންއައިސީޔޫގެ ޚިދުމަތަށްވެސް ބަދަލެއްނުގެނެއެވެ.
