ސައޫދީ އަރަބިއްޔާގެ ދާޚިލީ ވުޒާރާގެ އިސްބޭފުޅުންގެ ވަފުދެއް ރާއްޖެވަޑައިގެންފި
ދެގައުމުގެ ގުޅުން އިތުރަށް ބަދަހިކުރުމާއި، ދާޚިލީ ސަލާމަތާގުޅޭ ކަންކަމުގައި އެހީތެރިވެދިނުމާ ގުޅޭގޮތުން މަޝްވަރާކޮށްފައިވޭ
ސައޫދީ އަރަބިއްޔާގެ ދާޚިލީ ވުޒާރާގެ އިސްބޭފުޅުންގެ ވަފުދެއް ރާއްޖެވަޑައިގަތުން
މިނިސްޓަރ އިމްރާން އަބްދުﷲގެ ދައުވަތަކަށް ސައޫދީ އަރަބިއްޔާގެ ދާޚިލީ ވުޒާރާގެ އިސްބޭފުޅުންގެ ވަފުދެއް ރާއްޖެވަޑައިގެންފިއެވެ.
ވަފުދުގެ ބޭޅުންނާ މިނިސްޓަރ ވަނީ ބައްދަލުކުރައްވާފައެވެ. މިބައްދަލުކުރެއްވުން އޮތީ ހޯމަ ދުވަހު މިނިސްޓްރީ އޮފް ހޯމްއެފެއަރޒްގައެވެ.
މިއީ ސައޫދީ އަރަބިއްޔާގެ ދާޚިލީ ވުޒާރާ، މިނިސްޓްރީ އޮފް އިންޓީރިއާ އޮފް ދަ ކިންގްޑޮމް އޮފް ސައޫދީ އަރަބިއްޔާއިން ފޮނުއްވި ވަފުދެކެވެ.
ވަފްދުގެ އެންމެ އިސްބޭފުޅަކަށް ހުންނެވީ މޭޖަރ ޖެނެރަލް ނާސިރު އުސްމާން އައްނާސިރުއެވެ. 9 ބޭފުޅުން ހިމެނި ވަޑައިގަންނަވާ ވަފުދުގެ ބޭފުޅުންނާއެކު މަޝްވަރާކުރެއްވީ، ދެގައުމުގެ ގުޅުން އިތުރަށް ބަދަހިކުރުމާއި، ދާޚިލީ ސަލާމަތާގުޅޭ ކަންކަމުގައި އެހީތެރިވެދިނުމާ ގުޅޭގޮތުންނެވެ. އަދި އެހީތެރިކަން ފޯރުކޮށްދެވޭނެ ދާއިރާތަކާ ގުޅޭގޮތުންވެސް މަޝްވަރާކުރެއްވިއެވެ.
މިބައްދަލުކުރެއްވުމުގައި މިނިސްޓަރ އޮފް ސްޓޭޓް ފޮރ ހޯމްއެފެއަރޒް މުހައްމަދު މާހިރު އީސާއާއި، މިނިސްޓަރ އޮފް ސްޓޭޓް ފޮރ ހޯމްއެފެއަރޒް އަލީ ނަޒީރުއާއި، މިނިސްޓަރ އޮފް ހޯމްއެފެއަރޒްގެ ނައިބު ލުއައްޔު ސައީދުއާއި، އަބޫބަކުރު އަބްދުލްކަރީމް ބައިވެރިވެވަޑައިގެންނެވިއެވެ.
ތިން ދުވަހުގެ މުއްދަތަށް ރާއްޖެއަށް ކުރައްވާ ޒިޔާރަތުގައި މިވަފުދުގެ ބޭފުޅުން ދިވެހި ފުލުހުންގެ ޚިދުމަތާއި، މޯލްޑިވްސް ކަރެކްޝަނަލް ސަރވިސްގެ އިސް ބޭފުޅުންނާވެސް ބައްދަލުކުރައްވާނެއެވެ.
މިނިސްޓަރ އިމްރާން އަބްދުﷲ ވަނީ، މިއަހަރުގެ މާރޗް މަހު ސައޫދީ އަރަބިއްޔާގެ ދާޚިލީ ވަޒީރުގެ ދައުވަތަކަށް އެގައުމަށް ވަޑައިގެންވެސް މަޝްވަރާތައް ކުރިއަށް ގެންދަވާފައެވެ.
