އިނގިރޭސި ޕްރިމިއާ ލީގުގައި އާސެނަލުން ސައުތެމްޕްޓަނާ ދެކޮޅަށް ކުޅުނު މެޗުގައި އެ ޓީމަށް ލިބުނު ފުރުސަތުތައް ބޭނުން ނުކުރެވި، ބޭކާރުވުމުން އުނދަގޫވާ ކަމަށް އެ ޓީމުގެ ކޯޗު މިކޭލް އާޓެޓާ ބުނެފިއެވެ.

ލީގުގައި އެ ދެ ޓީމު ބައްދަލު ކުރި މެޗު ނިމުނީ އެއްވަރުވެގެންނެވެ. މިއީ މި ސީޒަންގެ ލީގުގައި އާސެނަލް މެޗަކުން އެއްވަރުވި ފުރަތަމަ މެޗެވެ. ކުޅުނު 11 މެޗުގެ ތެރެއިން އެ ޓީމު ވަނީ ނުވަ މެޗުން މޮޅުވެފައެވެ. އެއް މެޗު އެއްވަރުވީއިރު، އަނެއް މެޗުން ވީ ބައްޔެވެ. އާސެނަލް އޮތީ ލީގު ތާވަލްގެ އެއް ވަނަ މަގާމުގައެވެ.

މެޗަށްފަހު އާޓެޓާ ބުނީ އޭނާ ހުރީ އުނދަގޫވެފައި ކަމަށެވެ. ސަބަބަކީ މެޗުގައި ލިބުނު ފުރުސަތުގެ ބޭނުން ނުކުރެވުމުން ކަމަށް އޭނާ ބުންޏެވެ. އާޓެޓާ ބުނީ އެހެން މެޗުތަކާ ބަލާއިރު އެ މެޗުގެ ފުރަތަމަ ހާފުގައި އާސެނަލްގެ ކުޅުން ދަށެވެ. އޭނާ ވަނީ ދެ ވަނަ ހާފުގައި ސައުތެމްޕްޓަން އިން ވަރަށް ރަނގަޅަށް ކުޅުނުކަން ފާހަގަކޮށްފައެވެ. އޭނާ ބުނީ މެޗުގައި ކުޅުންތެރިން ގޯސްތަކެއް ވެސް ހެދުނު މަންޒަރު ފެނުނު ކަމަށެވެ.

މީގެ އިތުރުން އާޓެޓާ ބުނީ މިއީ ފިލާވަޅެއް ކަމަށާއި، އެގޮތަށް ދެކިގެން ކުރިއަށް ދާން ޖެހޭނެ ކަމަށެވެ. އޭނާ ބުނީ މެޗު ނިންމާލާފަ ދާން ޖެހެނީ ކޮންމެ ވެސް ވަރެއްގެ ނުތަނަވަސްކަމަކާއެކު ކަމަށެވެ. އާޓެޓާ ޤަބޫލުކުރާ ގޮތުގައި އާސެނަލަށް އެ މެޗުގައި ގިނަ ލަނޑު ޖަހާ މޮޅުވެވޭނެއެވެ.