މަހަށް ނުކުމެ އުޅެނިކޮށް ގެއްލުނު ޒުވާނާ - "ހޮސްޕިޓަލަށް ގެންދިޔައިރުވެސް ވިންދެއް ނެތް"

އައްޑޫ ސިޓީގެ ހިތަދޫގަައި މަހަށް ނުކުމެ އުޅެނިކޮށް ގެއްލުނު 24 އަހަރުގެ ތޮލާލް އަހުމަދު ހޮސްޕިޓަލަށް ގެންދިޔައިރުވެސް ވިންދެއް ނެތްކަމަށް އައްޑޫ އިކުއެޓޯރިއަލް ހޮސްޕިޓަލުން ބުނެފިއެވެ.

24 އަހަރުގެ ތޮލާލް އަހުމަދު، ފެހިވިނަ، ސ.ހިތަދޫ ގެއްލުނުކަން އެމްއެންޑީއެފްގެ ސަމާލުކަމަށް އައީ އާދިއްތަ ދުވަހުގެ 11:32ހާއިރު ކަމަށް އެ އިދާރާއިން ބުނެއެވެ. އެ އިދާރާއިން އެންމެ ފުރަތަމަ ބުނީ، އައްޑޫ ސިޓީގެ ހިތަދޫއިން ފުރައިގެން ދިޔަ ޑިންގީއެއްގައި ތިބި ދެ މީހުންގެ ތެރެއިން މީހަކު ގެއްލުނު ކަމުގެ މައުލޫމާތު ލިބިފައިވާކަމަށެވެ. ނަމަވެސް ފަހުން އެމްއެންޑީއެފްއިން ވަނީ ޑިންގީގައި ތިން މީހުން ތިބިކަމަށް މައުލޫމާތުދީފައެވެ. ތޮލާލް ގެއްލުމާގުޅިގެން އެމްއެންޑީއެފްގެ ސަދަރން އޭރިއާގެ ސީޖީ ސްކުއެޑްރޮންއިން ހަރަކާތްތެރިވެފައިވާ ކަަމަށްވެސް އެމްއެންޑީއެފްއިން ބުނެއެވެ.

Advertisement

އެމްއެންޑީއެފްއިން ބުނީ އޭނާ ފެނުނީ މޫދު އަޑިން ކަމަށާއި، ފެނުމާއެކު ހޮސްޕިޓަލަށް ގެންގޮސްފައިވާކަމަށެވެ. އައްޑޫ އިކުއެޓޯރިއަލް ހޮސްޕިޓަލުން "ރާއްޖެ އެމްވީ"އަށް ވިދާޅުވީ، އޭނާ ހޮސްޕިޓަލަށް ގެންދިޔައީ އާދިއްތަ ދުވަހުގެ 12:34ގައި ކަމަށާއި އޭރުވެސް އޭނާގެ ވިންދު ނެތްކަމަށެވެ. އޭނާގެ މަރު ސާބިތުކޮށްފައިވަނީ 01:05 ހާއިރެވެ.