އެއާޕޯޓްގެ ބިން ހިއްކައި ޝީޓް ޕައިލްކުރުމުގެ މަސައްކަތް ފަށައިފި
22 ޖޫން 2017 | ބުރާސްފަތި 11:20އާ ރަންވޭގެ ބިން ހިއްކާ ނިންމާލެވިފައިވަނީ 10 ޖޫން 2017 ގައި
އާ ރަންވޭގެ ބިން ހިއްކާ ނިންމާލެވިފައިވަނީ 10ޖޫން 2017 ގައި
ވެލާނާ އިންޓަރނޭޝަނަލް އެއަރޕޯޓްގެ ބިން ހިއްކައި ޝީޓް ޕައިލް ކުރުމުގެ ޓެސްޓް މަސައްކަތްތައް ބުރާސްފަތި ދުވަހު ފަށައިފިއެވެ.
އެއާޕޯޓްގެ އާ ރަންވޭ އެޅުމަށް ބެއިޖިންގ އާބަން ކޮންސްޓްރަކްޝަން ގްރޫޕްއާ 2016 ވަނަ އަހަރު ޖުލައިމަހު ހަވާލުކުރި ކޮންޓްރެކްޓްގެ ދަށުން 65 ހެކްޓަރުގެ ބިން ހިއްކާ ނިމިފައިވަނީ މި އަހަރުގެ ޖޫންމަހުގެ ތެރޭގައެވެ.
" ޝީޓް ޕައިލް ކުރުމުގެ ޓެސްޓިންގ މަސައްކަތް މިއަދު މިފަށަނީ އެހެން ވީމަ އަޅުގަނޑުމެން މި ބަލަނީ ކުރިޔަށް އޮތް ވަން ވީކް ނޫނީ އެއަށްވުރެވެސް އަވަހަށް އޭގެ އަމަލީ މަސައްކަތް ފެށިގެން ކުރިޔަށް ދިއުން" ބިން ހިއްކުމުގެ މަސައްކަތް ނިމުން އިއުލާނު ކުރުމަށް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އެމްއޭ ސީއެލްގެ މެނޭޖިންގ ޑިރެކްޓަރ އާދިލް މޫސާ ވިދާޅުވިއެވެ.
ބެއިޖިންގ އާބަން ކޮންސްޓްރަކްޝަން ގްރޫޕުން ބިން ހިއްކުމުގެ މަސައްކަތް ކުރިޔަށް ގެންގޮސްފައިވަނީ ސަބްކޮންޓްރެކްޓް އުސޫލުން ގަލްފް ކޮބްލާ ކުންފުންޏާ ހަވާލުކޮށްގެންނެވެ.
އަލަށް ހިއްކާ ނިންމި ސަރަހަހައްދާއެކު ހުޅުލޭގެ މިހާރުގެ ބިމަށް 33 އިންސައްތަ އިތުރުވެގެންދާނެއެވެ.
"ބިން ހިއްކާ ޝީޓްޕައިލް ކުރުމަކީ މި ޕްރޮޖެކްޓްގެ އެއް މަސައްކަތް، ދެން ރަންވޭ އެޅުމާ ކާގޯ ކޮމްޕްލެކްސްއާ ފިއުލް ފާމްގެ މަސައްކަތްވެސް" އާދިލް ވިދާޅުވިއެވެ.
ބިންހިއްކުމަށްފަހު ރަންވޭގެ މަސައްކަތްވެސް މިހާރުވަނީ ފަށާފައެވެ.
" އަޅުގަނޑުމެން މިބަލަނީ މިހާރު ފުރަތަމަ އޭގެ ސަބް ފޭސް ފެށިގެން ކުރިޔަށް އެދަނީ ، އިރާދަ ކުރެއްވިއްޔާ މި މަސައްކަތް ހަމަ ކޮންޓިނިއަސްކޮށް ގޮސް މި އަންނަ އަހަރުގެ ތެރޭގައި ރަންވޭގެ މަސައްކަތް ނިންމާލުން އެއީ އަޅުގަނޑުމެންގެ އަމާޒު," އާދިލް ވިދާޅުވި އެވެ.
ރަންވޭގެ މަސައްކަތް ނިމުމާއެކު އާ ސީޕްލޭންގެ މަސައްކަތްވެސް ނިމި އޮޕަރޭޝަނަން ގެނެވޭނެ ކަމަށް އެމްއޭސީއެލްއިން ބުނެއެވެ.
ހުޅުލޭގެ ހުޅަނގު ދެކުނުން 7.8 ހެކްޓަރުގެ ބިން ހިއްކައި ޝީޓް-ޕައިލްކުރުމުގެ މަސައްކަތް ފަށާފައިވާއިރު އާ ޓާމިނަލް އިމާރާތް ކުރުމުގެ މަސައްކަތް ހަވާލު ކޮށްފައި ވަނީ ސަޢޫދީ އަރަބިއްޔާގެ އެންމެ ބޮޑު އެއް ކުންފުނިކަމަށްވާ ބިންލާދިން ގުރޫޕާއެވެ.
