އިނގިރޭސި ޕްރިމިއަރ ލީގުގައި ހާލާންޑްގެ 17 ވަނަ ގޯލާއެކު ބްރައިޓަން އަތުން މެންޗެސްޓަރ ސިޓީ މޮޅުވެއްޖެއެވެ.
ލިވަޕޫލް އަތުން ބަލިވި މެޗަށްފަހު, ބްރައިޓަން އަތުން ސިޓީ މޮޅުވީ 3-1ންނެވެ. މެޗުގައި ސިޓީގެ ފުރަތަަމަ ދެ ލަނޑު ފުރަތަމަ ހާފްގައި ޖެހީ ހާލާންޑްއެވެ. ލީގުގެ ޓޮޕް ސްކޯރަރގެ މަގާމްގައި ހުރި ހާލާންޑް ފުރަތަމަ ލަނޑު ޖެހީ (ޑިފެންޑަރ އެޑަމް ވެބްސްޓާއަށް ފުރުސަތު ނުދީ) 22 ވަނަ މިނިޓްގައެވެ. ހާފް ނިމެން ދެ މިނިޓަށް ވެފައިވަނިކޮށް ދެވަނަ ލަނޑު ޖެހީ ޕެނަލްޓީއަކުންނެވެ. އެއީ ބާނާޑޯ ސިލްވާއަށް ލެވިސް ޑަންކް ކުރި ފައުލަކަށް ވީއޭއާރުން ބެލުމަށްފަހު ދިން ޕެނަލްޓީއެކެވެ. ދެވަނަ ހާފް ފަށައިގެން އަށްވަނަ މިނިޓްގައި ބްރައިޓަންއިން ލަނޑެއް ޖަހައި ފަރަގު ކުޑަކުރިއެވެ. ލަނޑު ޖެހީ ޓްރޮސާޑްއެވެ. އެކަމަކު އިތުރު ފުރުސަތެއް ނުދީ ކެޕްޓަން ޑެބުރޭނޭ ލަނޑެއްޖަހާ ސިޓީން އަލުން ފަރަގު ބޮޑުކުރިއެވެ. ބާނާޑޯ ސިލްވާ ތަނަވަސްކޮށްދިން ފުރުސަތުން ޑެބުރޭނާ ލަނޑު ޖެހީ 75 ވަނަ މިނިޓްގައެވެ.
މިމޮޅާއެކު ސިޓީން ވަނީ އެއްވަނާގައި އޮތް އާސެނަލްއާ ޕޮއިންޓަކަށް ކައިރިކޮށްފައެވެ. އެކަމަކު އެއީ އާސެނަލްއަށްވުރެ އިތުރަށް މެޗެއް ކުޅެގެންނެވެ. އާދިއްތަ ދުވަހު ހަވީރު އާސެނަލް ވާދަކުރާނީ ސައުތުހެމްޓަންއާއެވެ.
