އިންޓަރނެޓްއަކީ އޭގެ ބޭނުން ހެޔޮ ގޮތުގައި ހިފާނަމަ، އެކަމުގެ އިންތިހާ ފައިދާ، ދިރިއުޅުމަށް ކުރާނެ ކަމެއް ކަން ސާބިތު ކޮށްދެމުން ދާ އެއް ބަޔަކީ އިންޑިއާގެ ކުޑަ އަވަށަކަށް ނިސްބަތްވާ ޒުވާނުންތަކެއްގެ މައްޗަށް އެކުލެވިގެންވާ ކުޑަކުޑަ ފިލްމު ކުރޫއެކެވެ. ޔޫޓިއުބްގެ އެހީގައި މިއަދު އެ ޒުވާނުންނަކީ އިންޓަރނެޓްގެ ބަޠަލުންތަކެކޭވެސް ދެންނެވިދާނެއެވެ.
ދުނިޔޭގެ އެންމެ ބޮޑު ފިލްމީ ސިނާއަތުގެ ގޮތުގައި ސިފަ ކުރަމުން އަންނަ ބޮލީވުޑްއިން ހިތްވަރު ލިބިގެން މި ޒުވާނުން އުފައްދަމުން ދަނީ ބިނާ ކުރަނިވި ވީޑިއޯތަކެކެވެ. ހެއްވާ މަޖާ މަންޒަރުތަކުގެ އިތުރުން އިންޑިއާ ސިނާމާތަކުގައި އެންމެ މަޤުބޫލު އެކްޝަން ޝޮޓްތަކުގެ އިތުރުން، ހޭލުންތެރި ކުރުވުމުގެ ވީޑީއޯތައްވެސް އާންމު ކުރެއެވެ. އަދި އަމިއްލައަށް އުފައްދާ ރެޕް ލަވަތައްވެސް އާންމުންނަށް ދޫކޮށްލައެވެ.
"ބީއިންގް ޗައްތީޝްގަރްޔާ"ގެ ނަމުގައި ހިންގާ މި ޔޫޓިއުބް ޗެނަލަށް ސަބްސްކްރައިބް ކޮށްފައި ވާ މީހުންގެ ޢަދަދު، 120000 އާ ގާތް ކުރެއެވެ. އަޕްލޯޑް ކޮށްފައި ވާ ވީޑިއޯތަކުގެ ޢަދަދު، 200 އަށް ވުރެ ގިނައެވެ.
މި މަސައްކަތް ފެށިގެން އައީ މީގެ 5 ވަރަކަށް އަހަރު ކުރިންނެވެ. އެއީ، 2 އެކުވެރިން ކަމަށް ވާ ޖިޔަނެންދްރާ ޝުކްލާއާއި ޖައި ވަރުމާއަށް، ޔޫޓިއުބް ވީޑިއޯތަކެއް ފެނި، އެމީހުންނަށްވެސް އެކަހަލަ މަސައްކަތްތަކެއް ކުރެވިދާނެ ކަމަށް، ޤަބޫލު ކުރެވެން ފެށި ހިސާބުންނެވެ. ނަޞީބު އަތުގައި ހިފީ އިންޑިއާގައި ލިބެމުން ދިޔަ އަގު ހެޔޮ އިންޓަރނެޓްގެ ސަބަބުންނެވެ.
އެންމެ ފުރަތަމަ މި މަސައްކަތް ފަށައިގަތް އިރު އަހަރަމެންނަކަށް ނޭނގުނު ހަދާނީ ކޮން ކަހަލަ ވީޑީއޯއެއް ކަމެއް. ނުވިތާކަށް، އެ ހާދާނީ ކިހިނެއް ކަމެއްވެސް. އަހަރަމެން އަތުގަ ކެމެރާގަނޑެއްހާ ހިސާބުވެސް ނެތް. އެހެންވެ، މޯބައިލް ފޯނުތަކުން މަންޒަރުތައް ނަގަން ފެށި. ވީޑިއޯ އަމާޒު ކުރަމުން ދިޔައީ އަހަރަމެންގެ އަވަށު މީހުންނަށް ވީމައާއެވެސް އެކީ. ވީޑިއޯ ޝޫޓްކޮށް، އެޑިޓް ކުރުމުގެ މަސައްކަތް ފެށީ މޯބައިލް ފޯނުން. އެކަމަކު، އަޕްގްރޭޑް ކުރަން އަހަރަމެން އަމާޒު ހިފީ. ކެމެރާ ބޭނުން ކރުަން ދަސްކުރީވެސް ޔޫޓިއުބްއިން. މައިކް ބޭނުން ކުރާ ގޮތްވެސް ހަމަ އެހެން. ދަސްކުރަމުން، މަންޒަރުތައް ނަގަމުން ދިޔައީ. މިހާރު އަހަރަމެންގެ ސަބްސްކްރައިބަރުންގެ ޢަދަދުވެސް ވަރަށް ރަނގަޅު.ޖިޔަނެންދްރާ ޝުކްލާ؛ އިންޑިއާގެ ޔޫޓިއުބަރެއް
ކޮމްޕިއުޓަރ ނެޓްރވަރކިންގ އެކްސްޕަރޓްއެއްގެ ވަޒީފާ އަދާ ކުރަމުން އަންނަ، 32 އަހަރުގެ ޝުކްލާ ބުނި ގޮތުގައި، އެންމެ ފުރަތަމަ ވީޑިއޯތައް ހަދަން ފެށިއިރު، އެއީ ކިހިނެއްވާ ކަމެއްކަން މާ ފުރިހަމައަކަށް ފަޙުމެއްވެސް ނުވެއެވެ.
އަވަށު މީހުންގެ މެދުގައި ވީޑިއޯތަކަށް ޝަޢުޤު އުފެދެން ފެށީ ކޮވިޑް-19 އާ ގުޅިގެން 2020 ވަނަ އަހަރު ތަންފީޒު ކުރަން ފެށި ލޮކްޑައުންއާއެކުގައެވެ. އެތައް ބައެއްގެ ވަޒީފާ ގެއްލި، ގޭގައި ބަންދުވާން ޖެހުނު ހިސާބުންނެވެ. މިއަދު ވީޑިއޯ އުފެއްދުމުގެ މަސައްކަތުގައި ހަރަކާތްތެރިވާ ރަށްވެހިންގެ ޢަދަދު ސަތޭކައިން ގުނާލެވެއެވެ. ސްކްރީނުން ފެންނަ ތަރިންގެ އިތުރުން ޕޯސްޓް ޕްރޮޑަކްޝަން މަސައްކަތުގައިވެސް ގިނަ ބަޔަކު ހަރަކާތްތެރިވެއެވެ.
ވަރުމާ ކިއާދިން ގޮތުގައި އޭނާ އެންމެ ފުރަތަމަ އަޕްލޯޑް ކުރަން ފެށީ ދެތިން މިނެޓްގެ ކުރު ވީޑިއޯއެވެ. ނަމަވެސް ދިގު ވީޑިއޯތައް ހަދާ، އެ ވީޑިއޯތަކުގައި އިޝްތިހާރު ކުރުމުގެ ފުރުޞަތު އޮތް ކަމާއި، އެގޮތުން އާމްދަނީ އިތުރު ކުރެވިދާނެ ކަން އޭނާއަށް ދަސްވީއެވެ. މިހާރު އުފައްދާ ވީޑިއޯތަކަށް އެއްގަޑި އިރަށްވެސް ދެމިގެން ދެއެވެ. ޗެނަލަށް ސަބްސްކްރައިބް ކުރާ މީހުންގެ ޢަދަދު 1000 އަށް އަރާ، އެ ޗެނަލްގެ ވީޑިއޯ ބަލާފައިވާ ގަޑިއިރުގެ ޢަދަދު 4000 އަށް އެރުމުން، އެ ޗެނަލްގައި ކުރާ އިޝްތިހާރުތަކަށް ޔޫޓިއުބްއިން ފައިސާ ދޭކަން ޝުކްލާ ފާހަގަ ކުރެއެވެ.
ޝުކްލާއާއި އޭނާގެ ޓީމުން، މަހެއްގެ މައްޗަށް ދެތިން އާ ވީޑިއޯ، ޔޫޓިއުބްއަށް އަޕްލޯޑް ކުރެއެވެ. އަދި އާމްދަނީއެއްގެ ގޮތުގައި 40000 ރުޕީޒް ނުވަތަ 485 އެމެރިކާ ޑޮލަރު ހޯދައެވެ. އެއީ އެމީހުން ކުރިން އަދާ ކުރަމުން ދިޔަ ވަޒީފާތަކުން މަހެއްގެ މައްޗަށް ޖެހުނު 15000 ރުޕީޒް ނުވަތަ 182 ޑޮލަރާ އަޅާ ބަލާއިރު ބޮޑު ޢަދަދެކެވެ.
ސިލްސިލާ ގޮތެއްގައި ޔޫޓިއުބްއަށް ވީޑިއޯ އަޕްލޯޑް ކުރާ މީހުންނަށް މިއަދު ކުރިމަތިލާން ޖެހިފައި ވާ އެންމެ ބޮޑު ގޮންޖެހުމަކީ ވީހާވެސް ގިނަ ބައެއްގެ ޝަޢުޤުވެރިކަން ލިބޭ ގޮތަށް ނުވަތަ ސަބްސްކްރައިބަރުންގެ ޢަދަދު އިތުރު ވާނެ ގޮތަކަށް ޗެނަލްގެ ކޮންޓެންޓް ދަމަހައްޓާ، އާމްދަނީ ކަށަވަރު ކުރުމެވެ. އަދި ޓީމުގެ މެންބަރުންނަށް ދޭނެ އުޖޫރަ ކަށަވަރު ކުރުމަކީވެސް ކުރިމަތިވާ ގޮންޖެހުމެއް ކަމަށް، ޔޫޓިއުބް ޗެނަލަށް ކޮންޓެންޓް ތައްޔާރުކޮށްދިނުމަށްޓަކާ، ކުރިން އަދާ ކުރި ޓީޗަރެއްގެ ވަޒީފާވެސް ދޫކޮށްލައިގެން ހުރި ވަރުމާ ބުންޏެވެ.
3000 އެއްހާ މީހުންގެ އާބާދީއެއް އޮތް، ކުޑަކުޑަ ތުލްސީ އަވަށުގެ ޔޫޓިއުބް ޗެނަލުން ފެނިގެންދާ ގިނަ ބަޠަލުންނާއި ބަޠަލާއިންނަށް އުޖޫރައެއް ނުދެއެވެ. ޗެނަލް ހިންގައިގެން ލިބޭ ފައިސާ ޚަރަދު ކުރަނީ، އިތުރު ވަޞީލަތްތައް ގަނެ، ޗެނަލްގެ މުސްތަޤުބަލު އުޖާލާ ކުރުމަށެވެ.
މީ ގާތްގަނޑަކަށް 3000 އެއްހާ މީހުންގެ އަވަށެއް. އޭގެ ތެރެއިން 1000 އެއްހާ މީހުން މިއުޅެނީ ޔޫޓިއުބް ވީޑީއޯ އުފެއްދުމުގެ މަސައްކަތުގަ. ބައެއް މީހުން އެކްޓް ކުރަނީ، އަނެއް ބަޔަކު ވީޑީއޯ ކުރުމުގެ މަސައްކަތުގަ. އަނެއް ބަޔަކު، އަމިއްލަ ޗެނަލް ހިންގުމުގަ. ޔޫޓިއުބް ވީޑިއޯ މަސައްކަތުގަ 1000 މީހުން ބައިވެރިވޭ.ޖިޔަނެންދްރާ ޝުކްލާ؛ އިންޑިއާގެ ޔޫޓިއުބަރެއް
ވީޑިއޯތަކުން އެމީހުން ފެނިލުމަށް އަވަށުގެ މީހުން ލޯބި ކުރެއެވެ. އެކްޓް ކުރުމަށް ހިތުގައި ދެވިފައި އޮންނަ ހާއްސަ މަޤާމެއްގެ ސަބަބުންވެސްމެއެވެ. ގޭގެ މަސައްކަތްތަކާއި، ދެންވެސް ކުރަން ޖެހިފައި ހުންނަ މަސައްކަތްތައް ނިންމާލުމަށްފަހު، ޔޫޓިއުބް ވީޑިއޯ ޝޫޓިންގްގައި އުޅުމަށް އެމީހުން ލޯބި ކުރެއެވެ. ޅަފަތުގެ ދުވަސްތައް ގުނަމުންދާ ތުއްތު ކުދިންނާ ހިސާބުން ފެށިގެން، 80ގެ އަހަރުތައް ގުނަމުންދާ މައިންވެސް އެ މަސައްކަތުގައި ހަރަކާތްތެރިވެއެވެ.
ތުލްސީ އަވަށުގެ އެންމެ މަޝްހޫރު އެއް ޔޫޓިއުބް އެކްޓަރު ފާހަގަ ކުރި ގޮތުގައި އެ މަސައްކަތުން އޭނާއަށް ދުވާލެއްގެ މައްޗަށް، 6 ޑޮލަރާއި 12 ޑޮލަރާ ދެމެދުގެ އާމްދަނީއެއް ލިބެއެވެ. އަދި އަމިއްލަ ޗެނަލެއް ހިންގައިގެން އޭނާއަށްވެސް މަހެއްގެ މައްޗަށް 121 ޑޮލަރާއި 182 ޑޮލަރާ ދެމެދު ޢަދަދެއްގެ އާމްދަނީއެއް ލިބޭކަން އޭނާ ފާހަގަ ކުރިއެވެ.
ވަރުމާއާއި ޝުކްލާ ފަދައިން، ބައެއް މީހުން ވަނީ އެމީހުންގެ ދާއިމީ ވަޒީފާތައް ދޫކޮށް، ޔޫޓިއުބް ޗެނަލް ހިންގުމުގެ މަސައްކަތަށް ވަގުތު ހުސްކޮށްލާފައެވެ. އެއީ އަމިއްލަ ހުވަފެންތަކުގައި ޙަޤީޤީ ކުލަ ޖެއްސުމުގެ ފުރުޞަތުވެސް ތަނަވަސް ކުރުމުގެ މަޤްޞަދުގައެވެ.
އެންމެ ބޮޑު އަމާޒަކީ އަހަރަމެންގެ އަމިއްލަ ޕްރޮޑަކްޝަން ހައުސްއަކުން ބޮޑެތި ފިލްމުތަކާއި ވެބް ސީރީޒްތައް އުފައްދާ، ނެރުން. އަދި ހަމަ އެކަނި އިންޑިއާއެއް ނޫން، މުޅި ދުނިޔެއަށްވެސް އަހަރަމެން އެނގެން ބޭނުން ވަނީ.ޖައި ވަރުމާ؛ އިންޑިއާގެ ޔޫޓިއުބަރެއް
"ބީއިންގް ޗައްތީޝްގަރްޔާ" ޔޫޓިއުބް ޗެނަލަށް އަޕްލޯޑް ކުރާ ވީޑިއޯގެ އެވަރޭޖް ވިއުޒް އުޅެނީ 20000 އާއި 40000 އާ ދެމެދުގައެވެ. ބައެއް ވީޑިއޯތަކަށް 100000 ވިއުޒްވެސް ލިބިފައި އެބަ ހުއްޓެވެ.
