ދަށް ނަތީޖާތަކެއް ލިބުނަސް ޑެޝޯމްޕްސް އަށް ހާސް ކަމެއް ނެތް

އަންނަ ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕްގައި އެންމެ ގިނަ ބައެއްގެ ލޯ އަމާޒުވާނެ އެއް ޓީމަކީ ފްރާންސްއެވެ.

އެއީ ސަބަބެއް ވެސް ނެތިއެއް ނޫނެވެ. ފްރާންސްއަކީ މުބާރާތުގެ އެންމެ ފަހުގެ ޗެމްޕިއަންއެވެ. 2018 ވަނަ އަހަރުގެ ވޯލްޑް ކަޕް އެ ޓީމުން ކާމިޔާބުކުރީ ޒުވާން ހުނަރުވެރި ސްކޮޑަކާއެކު ނިކުމެއެވެ. މިއަހަރުގެ ވޯލްޑް ކަޕަށް ދާއިރު، ފްރާންސް އަކީ ފީފާ ރޭންކިންގައި ދުނިޔޭގެ އެއް ވަނަ ޓީމެވެ. މީގެ އިތުރުން އެންމެ ފަހުގެ ޗެމްޕިއަން ޓީމަށް މުބާރާތުގައި ދެވެނީ ކިހާ ހިސާބަކަށްތޯ ބަލަން ބޭނުންވާ މީހުން ގިނަވާނެއެވެ.

އެންމެ ފަހުން ފްރާންސް އިން ކުޅުނު މެޗުގެ ނަތީޖާ ތަކަކީ އެހާ ރަނގަޅު ނަތީޖާތަކެއް ނޫނެވެ. އެންމެ ފަހުން އެ ޓީމު ކުޅުނު ހަ މެޗުގެ ތެރެއިން މޮޅުވީ އެންމެ މެޗަކުންނެވެ. ނޭޝަންސް ލީގު ގްރޫޕް އޭގައި އެ ޓީމު ނިންމާލަން ޖެހުނީ ތިން ވަނައިގައެވެ. ފްރާންސް ވަނީ އަމިއްލަ ދަނޑުގައި ޑެންމާކާއި ކްރޮއޭޝިއާ އަތުން ބެލިވެ، އޮސްޓްރިއާ އަތުން އެއްވަރުވެފައެވެ.

ވޯލްޑް ކަޕްގެ ކުރިން ފްރާންސްގެ ކޯޗު ޑިޑިއޭ ޑެޝޯމްޕްސް ބުނަނީ އެ މީހުންނަކީ އެންމެ ފަހުގެ ޗެމްޕިއަނުން ކަމަށާއި، އެންމެ ޓޮޕްގައި އޮންނަ އިރު ކަންކަން ކުރަން ފަސޭހަ ނުވާނެ ކަމަށެވެ. މުބާރާތުގައި ފްރާންސް އޮތީ އޮސްޓްރޭލިއާ، ޑެންމާކު އަދި ޓިއުނީޝިއާއެކު ގްރޫޕް ޑީގައެވެ. މި ގްރޫޕްގައި ޑެންމާކަކީ ފްރާންސް އަށް ނުރައްކާތެރި ޓީމަކަށްވާނެއެވެ.

ޑެޝޯމްޕްސް ބުނީ އެ ގްރޫޕްގައި އޮތް ހުރިހާ ޓީމަކީ ވެސް ނިސްބަތުން ރަނގަޅު ޓީމުތަކެއް ކަމަށެވެ. ނަމަވެސް ފްރާންސްގެ އެންމެ ފަހުގެ ނަތީޖާ ތަކަކީ ހާސްވާން ޖެހޭ ވަރުގެ ނަތީޖާތަކެއް ނޫން ކަމަށް އޭނާ ބުންޏެވެ. އޭނާ ބުނީ ވޯލްޑް ކަޕަށް ދާނީ މުޅިން އެހެން ތައްޔާރީތަކަކާއެކު ކަމަށެވެ. ނަމަވެސް ޑެޝޯމްޕްސް ބުނީ ގްރޫޕްގައި ތިބި ޓީމުތަކާމެދު ސަމާލުވާން ޖެހޭނެ ކަމަށެވެ. އޭނާ ބުނީ އިދިކޮޅު ޓީމު ތަކަށްވުރެ ފްރާންސްގެ ކުޅުން ރަނގަޅުވާން ޖެހޭނެ ކަމަށެވެ.

މި ގްރޫޕްގައި ފްރާންސް އެންމެ ފުރަތަަމަ ނިކުންނާނީ އޮސްޓްރޭލިއާއާ ދެކޮޅަށެވެ.