އަންނަ މަހު ޕިކްނިކް އައިލެންޑު ހުޅުވަންް މަސައްކަތްކުރަނީ
21 އޮކްޓޯބަރު 2022 | ހުކުރު 10:55އެންމެ ފުރަތަމަ މަސައްކަތްކުރީ ޖުލައި 26 ގައި ހުޅުވަން
ޕިކްނިކް އައިލެންޑް ކުޑަގިރި
މާލެ ސަރަހައްދުގައި ދިރިއުޅޭ މީހުން ދަތުރުދިއުމަށް ޚާއްސަކުރާ ކުޑަގިރި ޕިކްނިކް އައިލެންޑު އަންނަ މަހު ހުޅުވޭތޯ މަސައްކަތްކުރަމުންދާކަމަށް ރައީސް އޮފީހުން ބުނެފިއެވެ.
ކުޑަގިރީގައި ތަރައްގީކުރާ ޕިކްނިކް އައިލެންޑުގެ މަސައްކަތް ނިންމައި އާންމުންނަށް ހުޅުވާލެވޭނެ ތާރިޚެއްގެ ގޮތުގައި އެންމެ ފުރަތަމަ ދީފައިވަނީ ޖުލައި 26 އެވެ. އެހެންނަމަވެސް އެ ތާރީޚަށް މަސައްކަތް ނިމިފައިނުވާތީ މިއަހަރު ތެރޭގައި މަސަައްކަތް ނިންމާލެވޭނެކަމަށް ސަރުކާރުން ވަނީ ބުނެފައެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ކުޑަގިރި ޕިކްނިކް އައިލެންޑް އަންނަ މަހުގެ ތެރޭގައި ހުޅުވޭތޯ މަސައްކަތްކުރަމުންދާކަމަށެވެ.
އެ ރަށަކީ ބިން ހިއްކައިގެން ހަދާ ރަށަކަށް ވާތީ ގިނަ މަސައްކަތްތަކެއް ކުރަންޖެހޭކަން މިއުވާން ފާހަގަކުރެއްވިއެވެ. އެހެންނަމަވެސް މިހާރު ބޮޑުބައި ނިމި ފައިނަލް މަސައްކަތްތައް ކުރިއަށްދާކަން މިއުވާން ވަނީ ފާހަގަކުރައްވާފައެވެ.
ސަރުކާރުން ބުނީ ކުޑަގިރި ހުޅުވުން ފަސްކުރީ އެ ރަށް ފެހިކުރުމުގެ މަސައްކަތާއި ރަށުގައި ވަސީލަތްތައް ގާއިމުކުރުމުގެ މަސައްކަތް އެއްކޮށް ނިމިފައި ނުވާތީކަމަށެވެ. ކުޑަގިރީގެ ފަޅު ހިއްކައިގެން ޕިކްނިކް އައިލެންޑް ތަރައްގީކުރަން ޕްލޭނިންގ މިނިސްޓްރީން ބަޔަކާ ހަވާލުކޮށްފައި ވަނީ 150 ދުވަހުގެ ތެރޭގައި ނިންމާގޮތަށެވެ. އެ މަސައްކަތުގެ އަގަކީ 41.4 މިލިއަން ރުފިޔާއެވެ. ކުޑަގިރިފަޅުން 8 ހެކްޓަރުގެ ބިން ހިއްކައި 397.27 މީޓަރުގެ ބޮޑު ހިލައިގެ ބްރޭކްވޯޓަރއަކާއި، 428.32 މީޓަރުގެ ބޮޑު ހިލައިގެ ގްރޮއިންސް ވަނީ އަޅާފައެވެ.
މާލެ ސަރަހައްދުގައި ދިރިއުޅޭ މީހުން ދަތުރު ދިއުމަށް ޕިކްނިކް އައިލެންޑެއް ގާއިމްކޮށްދެއްވުމަކީ ރައީސް އިބްރާހީމް މުޙައްމަދު ޞާލިޙުގެ ރިޔާސީ ވައުދެކެވެ.
